Aheberi 9 - Mawu a Mulluku

Dda ollapella wa va ellapo yavatthi ni oddullu

¹ Echipangano yawaambeelle yaakhalla ni malamulwiiwa a mallapello nave yaakhallattho ni musasa woollapellamo wa va ellapo yavatthimva.

² M'musasanimmu, echipinda yawaamba yaakhalla ni yoohiyavo enyali ni tebulo owaaka buledi oovelleelliwa wa Mulluku nave yaromolliwa wi nipuro naweella.

³ Otulli wa ekatani waakhalla echipinda yooromolliwa wi nipuro naweellesesa.

⁴ Mwemmo mwaakhalla nikuwa nagolide vooheraatthella mukutho wa lubani* nave ni nibokosi na echipangano nittheene noomariwa ni golide. Nave muwari mwa nibokosinno mwaakhalla kapu a golide oyo mwahelliwe mana, ekopo ya Aroni yaphuwalle makukhweelle yaari mwemmottho navettho malluku meelli valle valembiwe malamulo a Mulluku.

⁵ Vaddullu va nibokosinno vaari akerubi* oosema awooniha ntitimiho na Mulluku nave muuphellwiiwaayo yaakhuneella vanipuroni nookhululukella machimo, vaddullu vanibokosininno. Nave vano khawuworeya wi nitthopoolle ddittheddene.

⁶ Vano sika otthopoolla wiwa tti wi allupa mukutho yaanavollowa mu nipuro naweellanne nllapo ni nllapo wi yaphare muttekwiiwa wamallapello.

⁷ Koma mullupa mukutho muullupallive sika avollowa muwari mwa musasa nave eera ddenndda omoddave vamuyakhani. Aanakusa nikhame nno aheraatthiiye wa Mulluku ekaamba ya machimwaaye ni ekaamba ya machimo a athu yeeriiwa moohidduwella.

⁸ Munepa Waweella annahuddiha mwawiiweya phaama dda ddeko ddittheddenenndda wi ettilla yoovollowella mu nipuro naweellesesa khenahulliweve waarimi musasa wakhallooyo orivove.

⁹ Ella sika echisanzo ya enthawi ya muttano eyo enattaphullella wi mukutho wa enama wooheraatthiwa wa Mulluku, khonawora omurukunusa muthu ooheraatthooyo okhalla ni murima waphaama.

¹⁰ Vawi ddeko ddenndda ddinallota dda ddoocha, ddoowirya ni ehakallallo ddaweelliha ddoohiyanahiyana. Attheenaalla tti malamulo ayo erivo otiyera enthawi eyo Mulluku anaakeraatthiheeye malamulo anaanweene.

¹¹ Koma Khrisitu awiille wonanko mullupa mukutho muullupalli a ddeko ddaphaama nnddo ddirivo khalle. Aayaattho mu musasa woollapellamo waphaama wunchichi oyo ohimakiwe ni athu nave yooyo khohiyoni wa ellapo yavattheella.

¹² Vano aavollowa omodda o nipuro noopatuleya na oddullu anoopolla omachimoni wa enthawi yoohimalla. Enre yeella vooheraatthini mukutho wa nikhame naayenaaye woohikhalla na epuri apaalle na eng'ombe.

¹³ Moollikana ni malamulo a Mose, athu oochimwa kheyaakhullelliwa omullapella Mulluku. Yeeriwa aweella yamiddiwa nikhame na epuri ni na eng'ombe owaaka ntuura na mwaana a eng'ombe yooheraatthiwa mukutho.

¹⁴ Koma Khrisitu khaarina machimo nave ahiiheraatthi yeekhaaye wonanko mukutho mwa Munepa woohimalla. Ella sika ekaambiiwa nikhame naye niriiwa ni masiva manchichi oorukunusa murimaahu woochimwa okhalla waphaama wi niheereke ddeko nnddo ddinaanihoollelle wookhwa koma wi niwore omurumeyella Mulluku Ookumi.

¹⁵ Khrisitu akhwille wi aavulluse ayo yachimwalle mu enthawi ya echipangano yawaambeelle. Vano tti namunkhoswe a echipangano yanaanweene wi ayo yiithaniwe yaakhelle madaliso oohimalla ayo Mulluku alonjezilleeye.

¹⁶ Echipangano yawi ddiidda tti wonanko omulemba kalata oomukawa katundu muthu akhwa. Kalata yoolla anaphara mutteko muthooyo akhwa.

¹⁷ Nndda ddinattaphullella wi kalata yoolla khanaphara mutteko muthooyo aahikhwa.

¹⁸ Nikhame naapharihiwattho mutteko wi echipangano yawaambeelle yaambe ophara mutteko.

¹⁹ Mose ahaalleella athu ddittheddene nnddo malamulo yallotiiwa wi yeereke. Vano aaphariha mutteko mapururu oofiira oomakellelliwa o ekopo ya hisope* wi aamidde athwaalle owaaka nibukhu na malamulonne nikhame na eng'ombe ni na epuri owaaka maaddi.

²⁰ Ahaalleella athwaalle wi, “Ni nikhamenna Mulluku ookeraatthiha echipangano ni nyuwaano.”

²¹ Mose aamiddattho nikhame musasa woollapellamo ni erive ello yapharihiwe mutteko voollapellani.

²² Moollikana ni malamulo a Mose erive ello yeellihiwa voomiddiwani nikhame. Kheyiivo machimo enaakhululukelliwe nikhame naahihelliwa.

Mukutho muullupalli wa Khrisitu

²³ Ddekonndda tti echisanzo ya ddooddullu nave sika ddinaphwanella ddeellihiwe mwawi ddiidda. Koma ddeko ddooddullu ddineellihiwa mookhwaranya ddenndda.

²⁴ Ella sika ekaambiiwa Khrisitu ahivollowilleeye mu nipuro noopatuleya noomakiwa ni athu nno niri echisanzo ya nipuro nawoona na mallapello. Koma ayiille oddullu nave vano ari wenko ni Mulluku onikavihera hiyaano

²⁵ Khrisitu khaniiheraatthi mukutho wiilliwiilli wonanko mullupa mukutho muullupalli oyo anavollowa mu nipuro noopatuleya orive muyakha wi aheraatthi nikhame na enama.

²⁶ Khrisitu iiheraatthiki mukutho orive muyakha ddaano ahoowaka orive muyakha ovenyera mvo ellapo yavattheella yaphatuselliwiiwa. Koma vano akhwille omoddave waatamella o omamallihello wa ellapo yavatthimva wi iiheraatthi mwaneenaaye mukutho woohuwa machimo.

²⁷ Arive muthu anakhwa omodda nave vatulli viwa aneeruziwa.

²⁸ Emoddamoddave yeeyo Khrisitu aaheraatthiwa mukutho omodda wi atukhulle ni ohuwa machimo a athu anchichi. Aneeroowa wiilli oohikhalla wi eellihe machimo koma aavulluse ayo enamutiyera.