Aheberi 8 - Mawu a Mulluku

Dda Yesu mullupa mukuthwaahu muullupalli

¹ Mwaha muttheene ninalloteehu tti wawi nookhalla ni mullupa mukutho muullupalli, oyo anakeraatthi onnattanatta na mpando woomwene wa Mulluku Amasiva Mattheene ooddullu.

² Olliye anarumeyella wonanko mullupa mukutho muullupalli mu nipuro naweellesesa na muwari mwa musasamusasa oyo wamakiwe ni Apwiya, ohiri ni athu.

³ Arive mullupa mukutho muullupalli anatthoolliwa wi aheraatthiki mikutho ni emphaso wa Mulluku nave sika mullupa mukuthwaahu muullupalli anaphwanellattho okhalla ni yawi aheraatthi.

⁴ Akhanlleke va ellapo yavatthi, khaakhalle mullupa mukutho vawi ellapo yavattheella yookhalla ni allupa mukutho ayo enaheraatthi mikutho moollikana ni malamulo a Mose.

⁵ Mutteko onaphariwa ni allupa mukuthwaayo tti echisanzo ni echizindikiro ya ddeko ddineereya mu enyumba yooddullu. Nndda ddiri wonanko ddeereyille ni Mose aariiye vakhuviru otthipella musasa, Mulluku aamulleella wi, “Weerethi ddittheddene ollikana ni echisanzo woonihiweewe vamwaangoni valle.”

⁶ Koma vano, mutteko wookhalla mullupa mukutho oyo wavahiwe wa Yesu tti waphaama ohiyana ni wa allupa mukutho akhallaalle. Vawi olliye tti namunkhoswe a echipangano eyo yaari yaphaama ohiyana ni yakhalleeyo vawi yaamakiwa va lonjezo naphaama noohiyana ni nakhallenne.

⁷ Echipangano yawaambeella yakhanlleke yaphaama, khewaakhallettho opaalleya wa yaneepiilli.

⁸ Koma Apwiya aawoona athwaaye wi aachimwa allotilleeye wi, “Mallapo enimawa, enallota tti Apwiya, awi kineerokeraatthiha echipangano yanaanweene ni athu a o Israele ni a o Yuda.

⁹ Khekhallattho wonanko echipangano elle kakeraatthilleemi ni makhollwiiwa, va nllapo kaakusalleemi ni nnatta naka, kaahollelleemi vawaakhumihani mu Iguputo. Vawi kheyaaroromelleye voothwarani echipangano nakeraatthihalleehu, nave sika nameenettho ngaawapwathille.

¹⁰ Vano ella sika echipangano kineereemi kikeraatthihe ni Aisraele m'mallaponi enawaayo, enallota tti Apwiya. Kineerewiiyaatthi malamulwaaka m'maganizoni mwiwa ni waalemba m'murimani mwiwa. Kineerokhalla Mullukwiiwa, nave alliwa eneerokhalla athwaaka.

¹¹ Khavipaalleyattho wi muthu amuhuddihe mukhwaaye, apaalle ollota wa mukhwaaye wi, ‘Waadduwelle Apwiya.’ Vawi attheenaayo eneerokidduwella miyaano, waambeella wa mung'onong'ono, ophiyera wa muullupalli.

¹² Kineerewaakhululukella machimwiiwa nave nguupuwellattho ddoonanara ddiwa.”

¹³ Voollotani dda echipangano yanaanweeneella, Mulluku anallota wi yawaambeelle tti yoomalla mutteko nave erive ello yakhalla yoomalla mutteko nave yaahuwa eri vakhuviru omalla.