Aheberi 7 - Mawu a Mulluku

Dda Melkizedeki, mullupa mukutho

¹ Melkizedeki aari mwene a o Salemu navettho mullupa mukutho oomurumeyella Mulluku Muullupalli. Abrahamu aweeye ovenyera okhotoni nko aagonjihalleeye mamwene masese, aakumana ni Melkizedeki* nave Melkizedekooyo aamudalisa.

² Nave Abrahamu aavelleella wa Melkizedekooyo yaneekhumi ya ddeko ddittheddene aakhilleeye okhotoninko (Ottaphullella wawaamba wa nnddina na Melkizedekinna tti wawi, “Mwene Oolungama” nave kaambiiwa aari mwene a o Salemu, nnddina nayenna ninattaphullellattho wi, “Mwene amurendelle”.)

³ Ollota dda attiitthinnya apaalle amennya apaalle ntthopoollo na makhollo a Melkizedekooyo kheyiivo mvo elembiweewavo naarittho dda oyariwa waye ni okhwa waye. Ari wonanko Mwaana a Mulluku, mullupa mukutho oovirellella wa enthawi yoohimalla.

⁴ Vano mohoona wi aari muthu muullupalli. Abrahamu nikhollo nahu noodduwanyeyanne, aamuvaha yaneekhumi ya ddittheddene akusalleeye okhotoni.

⁵ Malamulo ennalamula wi edduullu dda Levi ayo eri allupa mukutho yaakhelleke yaneekhumeeyo ovenyera wa Aisraele. Sika wi yaakhelleke ovenyera wa Aisraele akhwiiwa naari alliwattho yaari edduullu dda Abrahamu.

⁶ Melkizedeki khaavenyenre mu edduullu dda Levi koma ahaakhella yaneekhumi ovenyera wa Abrahamu navettho aamudalisa muthu oyo aakhenlle malonjezo a Mulluku.

⁷ Kheyiivo yoottikhiniha wi muthu oyo anadalisa sika ari muullupalli omukhwaranya oyo anadalisiwa.

⁸ Ollota dda allupa mukutho ayo enaakhella yaneekhumeeyo, alliwaalla tti athu awi ennakhwa. Koma ollota dda Melkizedeki mawu a Mulluku eni yaneekhumeeyo yahaakhelliwa ni muthu oohikhwa.

⁹ Nave ninaakhulle ollota wi, Abrahamu avellelleeye yaneekhumi, Levi, (oyo edduullu ddaye ddaakhella yaneekhumeeyo) nayeenettho aavelleella wa Melkizedeki.

¹⁰ Naari Levooyo aari ahinayariwe, Abrahamooyo akumanneeye ni Melkizedeki, Levooyo aari ariwo oweella mwa nikhollo naye Abrahamu.

¹¹ Naari malamulo a Mose ellotaka wi allupa mukutho ekhalleke edduullu dda Levi, allupa mukuthwaalla kheyaawora oweelliha athu. Vano vaapaalleya wi viwe mullupa mukutho wonanko Melkizedeki, oyo ahiri edduullu ya Aroni.

¹² Nave nlloko na allupa mukutho nasintha, vinapaalleyattho wi malamulo esinthe.

¹³ Nave Apwiihu ayo ninawaakehwaalla, yaari a nlloko nimodda nave khaarivo muthu a nlloko niwa oyo arumeyelle wonanko mullupa mukutho.

¹⁴ Tti ddoodduwanyeya phaama wi yayariwelle o nlloko na Yuda. Nave Mose khaaromonlle dda nlloko nenna ovenyera khalle voollotani dda allupa mukutho.

Dda mullupa mukutho wonanko Melkizedeki

¹⁵ Mwaha yoolla onniiweya phaama namoonaka mullupa mukutho mmodda wonanko Melkizedeki oyo aphiyalle.

¹⁶ Aari mullupa mukutho ohiri ekaamba ya nlloko naye moollikana ni malamulo koma ekaamba ya masiva a okumi woohimalla.

¹⁷ Vawi mawu a Mulluku enallota wi, “We tti mullupa mukutho wa enthawi yoohimalla omullupa mukuthweene wonanko wa Melkizedeki.”

¹⁸ Vano lamulo nakhallenne noohiyiwa kaambiiwa naari noohikhalla ni masiva nave khanaarina mutteko.

¹⁹ Vawi malamulo a Mose kheyaaworille weeriha ddeko ddittheddene okhalla ddaphaama. Koma vano noovahiwa etiyerello yuullupalli eyo enanaatamelliha vakhuviru ni Mulluku.

²⁰ Vawaanjereravo, vookhallattho nllupello na Mulluku. Nllupello wonanko nenna khanaariwo khalle wa amodda ayo yakhalla allupa mukutho.

²¹ Koma Yesu avolloweeye wi akhalle mullupa mukutho Mulluku aallupella wi, “Mi Apwiya kaallupella ngisintha maganizwaaka awi, ‘Weyaano tti mullupa mukutho wa enthawi yoohimalla.’ ”

²² Ekaamba ya yeella Yesu annasimikiza wi echipangano eyo Mulluku ariiyena wa hiyaano tti yaphaama ohiyana ni yakhalle.

²³ Vookhallattho ohiyana omodda vawi allupa mukutho akhallaalle yaari anchichi kaambiiwa yaanakhwa sika kheyaawora ovirellella ni muttekwiiwa.

²⁴ Koma Yesu annavirellellave okhalla ni okumi enthawi yoohimalla, sika muttekwaaye wookhalla mullupa mukutho, khanamuhiyerattho muthu mmodda.

²⁵ Nave sika annawora, ollello ni mallapo mattheene waavullusa ayo enawa wa Mulluku oweella mwa olliye vawi ookhalla ni okumi woohimalla wi aavekellelleke athu wa Mulluku.

²⁶ Vano Yesu sika mullupa mukuthwaahu muullupalli oyo anakwakhwaniha ddoopaalla ddahu. Olliyooyo tti aweella, oohikhalla ni machimo nave aahiyanihiwa ni athu oochimwa nave aawellihiwa oya oddullu.

²⁷ Khanaphwanaphwana ni allupa mukutho uullupalli akhallaalla vawi khanapaallattho wi aheraatthiki mukutho nllapo ni nllapo wa machimwaaye vawaamba nave wa machimo a athu. Aaheraatthi mukutho omodda nave yooyo waari wa mallapo mattheene iiheraatthilleeye mwaneenaaye.

²⁸ Malamulo a Mose ennaatthoolla athu oolephela wi ekhalle allupa mukutho uullupalli. Koma lonjezo na Mulluku nno neeriwe ni nllupello ni nno nawiille vatulli va malamulo ninnamutthoolla Mwanaye. Nave tti mullupa mukutho muullupalli wa enthawi yoohimalla.