Aheberi 6 - Mawu a Mulluku

¹ Vano hankoni nivirellelle ni mahuddero awooniha owaraalla. Noonjerere mahuddero mamodda vaddullu va mahuddero awaamba a dda Khrisitu. Nihikeraattheyettho va ddawaamba nnddo ddiri matthipello awi orukunuwe murima ohiya mitteko ddoohivaha okumi woohimalla, dda waamba omukhulupilila Mulluku,

² dda ehuddiho ya maubatizo, dda wiiyaatthi matta, dda ovenya wa ookhwa ni dda echiweruzo yoohimalla.

³ Sika hankoni nivirellelle owaraalla mu echikhulupililo! Nineereweera ddenndda Mulluku aakhullella.

⁴ Ethiyo vano enaaweereyelle tti tini ayo enahiya echikhulupililwiiwa? Vawaamba yahaakhella owala wa Mulluku, yaallawiha emphaso ddooddullu nave yahaakhellana Munepa Waweella,

⁵ yaallawiha wi mawu a Mulluku tti aphaama navettho yahoona masiva a enthawi yamuhoollo.

⁶ Koma yahiya echikhulupililwiiwa tti woohiworeya wi erukunuwettho murima kaambiiwa enakhalla wonanko enimamutthomeyattho Mwaana a Mulluku vamutandani, enamunyaambusa vamiitthoni va athu.

⁷ Ethaya eyo enamwaakhella murimu navettho enakhumiha ddoohata ddaphaama wa oollima, ethayeeyo ennadalisiwa ni Mulluku.

⁸ Koma yamella kakande ni miiwa enakhalla yoohikhalla ni mutteko sika Mulluku ari vakhuviru oyitembelela ni oyihella munllo.

⁹ Naari ninalloteehu mwawi ddiidda, akhwaaka ookondiwaanyu, ninnasimikiza dda nyuwaano wi moodalisiwa phaama vawi muneerovulluwa.

¹⁰ Vawi Mulluku tti oolungama, khatiwalla mitteko mwaphanreenyu apaalle echikondi munooniheenyu vawaarumeyellani athwaaye.

¹¹ Ninnapaalla wunchichi wi arive muthu a nyuwaano avirellelle wooniha ollipa murima ophiyera omamallihelloni, mvo ddeko munatiyereenyu ddinaakwakhwanihiwiiwa.

¹² Khaninapaalla wi nyuwaano mukhalle oolesi koma mukhalle wonanko ookhulupilila ayo enavillella ophiyera yaakhenlle eyo Mulluku aalonjezilleeye.

Dda lonjezo na Mulluku noohikukureya

¹³ Mvo Mulluku amulonjezilleeye Abrahamu aallupella. Vawi khaarivottho mmodda muullupalli omukhwaranya olliye, aaromonlle nnddina naye nenno voollupellanimvo.

¹⁴ Aallupella wi, “Kineerewuudalisa wunchichi ni wuuvaha edduullu ddinchichi.”

¹⁵ Abrahamu aavillella mwawiithaalla nave sika ahaakhella nnddo Mulluku amulonjezilleeye.

¹⁶ Athu voollupellani ennaromolla nnddina na mmodda oyo ari muullupalli waakhwaranya alliwa nave enallupella wi esimikizelle nnddo enallotiiwa apaalle wi ovaanyihananko omallelle vaavo.

¹⁷ Mulluku aapaalla wi awoonihelle ayo yatiyera waakhella lonjezonno wi aneerokwakhwaniha opaalla waye, sika ahaanjerera ollupella waye va lonjezonno.

¹⁸ Mwawi ddiidda vookhalla ddeko piilli nndda, ollupella ni olonjeza. Khaddisinthiwa nave ddinnooniha wi Mulluku khoottha. Sika wa hiyaano nathawenlle wa olliye naaphwanya ollipihiwa murima wuullupalli wi niphare moollipa etiyerello eyo ninaakhelleehu muhoollo.

¹⁹ Nookhalla ni etiyerello yeella wonanko nangula* ookumaahu eyo eri yookeraattheya ni yoollipa nave ennavollowa ohiyana ni ekatani ya mu enyumba ya Mulluku yooddullu yaphiya muwari mwa nipuro naweella.

²⁰ Yesu aahoolla avollowamo ekaamba ya hiyaano navettho olliyooyo sika ari mullupa mukutho muullupalli wa enthawi yoohimalla wonanko Melkizedeki.*