Aheberi 5 - Mawu a Mulluku

¹ Arive mullupa mukutho muullupalli anatthoolliwa ni athu akhwaaye wi awiimellelle voomurumeyellani Mulluku. Muttekwaaye sika oheraatthi mukutho ni emphaso ekaamba ya machimo a athu.

² Vawi nayeenettho tti oofooka sika annawora okhalla ni murima wowiiwesesa dda ayo ehineera phudda voochimwani.

³ Nave kaambiiwa nayeene tti oofooka, anaphwanella oheraatthi mukutho ohiri ekaamba ya machimo a athuve komattho machimwaaye.

⁴ Khaavo aniivaha olemu yeekhaaye vawiitthoollani wi akhalle mullupa mukutho muullupalli. Koma Mulluku sika anamutthoolla mullupa mukutho, wonanko mmo amutthoollelleeye Aroni.

⁵ Emoddamoddave yeeyo Khrisitu khaawiivahille olemu yeekhaaye wi akhalle mullupa mukutho muullupalli. Koma Mulluku sika allotille wa olliye wi, “We tti Mwanaka. Ollello kohuuyara weyaano.”

⁶ Vamodda vene aallotattho wi, Apwiya aallupella khesintha maganizwiiwa awi, “We tti mullupa mukutho wa enthawi yoohimalla, omullupa mukuthweene wonanko wa Melkizedeki.”*

⁷ Mu okumaaye va ellapo yavatthimva, Yesu m'mavekelloni mwaye ahinlla mookhuwa nave moomoriha miitthori wa Mulluku, oyo aarina masiva oomuvullusa wuukhwaani. Kaambiiwa ahiivelleella ni wiiyeviha, Mulluku ahiiwa mavekellwaaye.

⁸ Naari aari Mwaana a Mulluku, aahuddera okhalla owiiwellella oweella mu ohoosiwa waye.

⁹ Ohoosiwangu waamweeriha okhalla aphaama nave aakhalla awaamba a yoovullusa yoohimalla wa athu attheene oomwiiwellella olliye,

¹⁰ nave Mulluku aamutthoolla wi akhalle mullupa mukutho muullupalli wonanko Melkizedeki.

Ochenjeziwa dda ohiya echikhulupililo

¹¹ Ddookhallavo ddeko ddinchichi wi nillote dda mwaha yoolla koma tti ddookatamiha ollota wene kaambiiwa nyuwaano khamuniiwesesa mwawaakuva.

¹² Mwaaphwanella muri ahuddihi vawi voollekella mwaambeelleenyu valle navettho munapaalla wi muthu mmodda aambe wuuhuddihani mahuddero awaamba a mawu a Mulluku. Munipuroni nawi mucheke yoocha yoollipa, munapaalleya wi muwiryekeve mukaka.

¹³ Arive muthu oyo anawirya mukakave ari wonanko mwaana mung'ong'ono, khanadduwella ohiyaniha yaphaama ni yoonanara.

¹⁴ Yoocha yoollipa tti ya athu oowaraalla ayo oweella mu ddookumanana ddiwa enawora ohiyaniha yaphaama ni yoonanara.