Aheberi 4 - Mawu a Mulluku

¹ Vano lonjezano na Mulluku allotilleeye khallenne na ovollowa munipuroni naye nawiithuuwellamo, nookhallawove. Hankoni nichenjere wi ahikhallevo naari mmodda anooneya wi khavollowillemo mwawiithuuwella.

² Vawi othenga waphaama waallalleyiwa wa hiyaano wonanko wallalleyiwelliiwa wa alliwaayo koma othenga wallalleyiwooyo kheyaaphurallena ello kaambiiwa kheyaawaakhenlle ni echikhulupililo.

³ Vano hiyaano nikhulupililalleva, ninnaakhella wiithuuwa wonanko mmo allotilleeye wi, “Kishille murima kaallupella wi, ‘Khewa evollowa mu nipuro naka nawiithuuwellamo!’ ” Allotille ddenndda naari amallihalleeye muttekwaaye va enthawi amallihalleeye ophatusa ellapo yavatthi.

⁴ Vawi vamodda vene mu mawu a Mulluku ddoollotiwa dda nllapo naneetthanu ni piilli wi, “Mulluku ahiithuuwa va nllapo naneetthanu ni piilli amallihalle mitteko ddaye ddittheddene.”

⁵ Koma vamodda viwa vene voollotiwattho wi, “Khewa evollowattho mu nipuro na wiithuuwellamo.”

⁶ Athu ayo yiiwalle othenga waphaamoolla vawaamba valle kheyaavollowille mu wiithuuwanko kaambiiwa kheyaawiiwellelle. Vano yookhallavo amodda ayo yaakhullelliwe wi evollowemo.

⁷ Nndda ddohoonihiwa mvo Mulluku akeraatthihalleeye nllapo nimodda, nno ninaromolliwa wi, “Ollello.” Viviralle miyakha ddinchichi aallota oweella mwa Davide wonanko allotelleeye khalle wi, “Mwiiwa mawu a Mulluku ollello, muhummihe mirima ddanyu.”

⁸ Yoswa aweerihalleke athwaayo wi yiithuuwe wonanko mmo Mulluku allotelleeye khalle, Mullukooyo khaallotettho vatulli viwa dda nllapo nimodda nawiithuuwa.

⁹ Vano ekaamba ya yeella, lonjezo nawiithuuwa wonanko nllapo na Sabata na Mulluku wa athwaaye nookhallavove.

¹⁰ Vawi wa ayo enaavollowe mu wiithuuwa nko Mulluku alonjezilleeye khalle eneerewiithuuwa emallihalle ophara mitteko ddiwa, othwarihella wi Mulluku ahiithuuwattho ohiya mitteko ddaye.

¹¹ Vano hankoni moollipihella nivollowe mu wiithuuwanngu wi variyari vahu vihikhalle mmodda oolephela ovollowa ekaamba yoohiiwellella wonanko yenriiwa khalle.

¹² Mawu a Mulluku tti ookumi ni amasiva, awiisha ohiyana ni nsupada noowiisha nngu ni nngu. Ennaphadda mutthemwene ophiyera munakumanella murima ni munepa naarittho munallundellellana makuttha ni makhura a m'makhuvani. Enneeruza nnddo athu enapaalliiwa ni oganiza m'murimani mwiwa.

¹³ Kheyiivo ello enavittheya vamiitthoni va Mulluku, ddeko ddittheddene ddinnakhalla vawooneya nave ddinnakhunuulliwa vamiitthoni vaye. Nave attheenehi ninaphwanella wi nimutthopoollelle mitteko ddahu.

Yesu mullupa mukutho muullupalli

¹⁴ Nookhalla ni mullupa mukutho muullupalli oyo ayiille oddullu akhalla vamiitthoni va Mulluku, Yesu, Mwaana a Mulluku. Sika hankoni niphare moollipiha dda echikhulupililwaahu.

¹⁵ Mullupa mukutho muullupallaahooyo anniiwesesa ofooka wahu vawi olliyettho aheesiwa wonanko hiyaano koma khaachimwalle.

¹⁶ Sika hankoni moohikayikella naatamelle o mpando woomwene wa Mulluku nko ori echisomo wi naakhelle echifundo, echisomo ni nikavihero mu enthawi yoophwanellella.