Aheberi 3 - Mawu a Mulluku

Yesu tti muullupalli omukhwaranya Mose

¹ Asinnaka ni arokoraka, muri athu a Mulluku nave mwiithaniwe ni olliye! Ganizerani dda Yesu, murummwa ni mullupa mukutho muullupalli a echikhulupililwaahu.

² Olliye aari oororomelleya wa Mulluku oyo amutthoonlle, wonanko Mose aariiyettho oororomelleya va muttekwaaye mu enyumba ettheene ya Mulluku.

³ Muthu anamaka enyumba annariihiwa wunchichi ohiyana ni enyumbeeyo. Emoddamoddave yeeyottho Yesu annaphwanella wi ariihiwe wunchichi omukhwaranya Mose.

⁴ Erive enyumba, enamakiwa ni muthu mmodda koma Mulluku sika amakille ddeko ddittheddene.

⁵ Mose aari oororomelleya va muttekwaaye mu enyumba ettheene ya Mulluku wonanko oorumeyella nave allotille dda ddeko nnddo Mulluku aneereeye allote muhoollo.

⁶ Koma Khrisitu tti oororomelleya wonanko mwaana oolamulella enyumba ya Mulluku. Hiyaano sika enyumba ya Mulluku, nallipa murima ni okhulupilila nnddo ninatiyereehu.

Dda wiithuuwa wa athu a Mulluku

⁷ Sika vano Munepa Waweella anallota wi, “Mwiiwa mawu a Mulluku ollello,

⁸ muhummihe mirima ddanyu, wonanko yeerille makhollwaanyu mvo yamuwukinliiwa Mulluku, wonanko yenriiwa enthawi eyo, muchipululuni mulle yamweesilliiwa olliyooyo.”

⁹ Mulluku aallota wi, “Vaavalle yaakeesa, ekillika miyaano, naari yaari yoonille kenreemi.

¹⁰ Sika wa miyakha 40 kahaananariwella athwaayo killota wi, ‘Mallapo mattheene ennahollowa m'murimani mwiwa, nave ennakhoota othwara malamulwaaka.’

¹¹ Kaananariwa nave kaallupella wi, ‘Khewa evollowa mu nipuro naka nawiithuuwellamo!’ ”

¹² Asinnaka ni arokoraka, chenjerani wi variyari vanyu vihikhalle mmodda a murima woonanara ni woohikhulupilila woomuhiyaniha ni Mulluku Ookumi.

¹³ Koma munaphwanella mullipihaneke murima nllapo ni nllapo vawi ella tti enthawi yaphaama eyo mawu a Mulluku enayiromolliiwa wi, “Ollello.” Sika wi mmodda anyuwaano ahummihe murimaaye ekaamba yoollekiwa ni machimo.

¹⁴ Vawi attheenehi tti akhwaaye a Khrisitu okusella naphara moohitikheya echikhulupilwaahu naariihuna vawaamba valle ophiyera omamallihello.

¹⁵ Sika mawu a Mulluku eni, “Mwiiwa mawu a Mulluku ollello, muhummihe mirima ddanyu, wonanko yeerille makhollwaanyu mvo yamuwukinliiwa Mulluku.”

¹⁶ Ttaani athu ayo yiiwalle mawu a Mulluku koma emuwukila olliye? Attheene ayo yakhumalle o Iguputo ehoollelliwe ni Mose.

¹⁷ Mulluku aananariwalle ni aani wa miyakha 40? Athu ayo yachimwalle, ayo yakhwille muchipululuni mulle.

¹⁸ Mulluku allupenlleeye valle wi, “Khewattho evollowa mu nipuro naka nawiithuuwellamo,” allota ddawani? Allota dda athu yahimwiiwellelle.

¹⁹ Vano nohoona wi kheyaavollowillemo munipuroni mulle kaambiiwa kheyaakhulupililalle.