Aheberi 2 - Mawu a Mulluku

Dda yoovullusa yuullupalli

¹ Ella sika ekaambiiwa ninaphwanellaahu wi nipwatheke wunchichi yawoona niiwalleehu woova wi ninaahollowe.

² Mawu yalleelliwe makhollwaahu ni angelo yahoonihiwa wi yaari awoona kaambiiwa athu ayo yahithwanre apaalle wiiwellella yaallakiwa moollikana ni mitteko ddiwa.

³ Vano, ninaavulluwe mwawiidde navevulla yoovullusa yuullupalleella? Apwiya mwaneena sika yaambille ollalleya yoovullusa yeella nave ayo yawiiwalle yaanilleella wi tti ddawoona.

⁴ Enthawi yeeyo Mulluku aheera omboni vaweerani ezizindikiro, masiva ni ddoottikhiniha ddoohiyanahiyana navettho vawaavahani emphaso dda Munepa Waweella moollikana ni opaalla waye.

Dda oohoollella a yoovullusa

⁵ Mulluku khaavahille angelo olamulello va ellapo enaweeyo, dda eyo ninalloteehu.

⁶ Koma vamodda vene mawu a Mulluku eni, “Nyu Mulluku, muthu ttaani wi mumuupuwelleke? Muthu ttaani wi mumpwatheke?

⁷ Va enthawi yooyeva mwaanivevulla wi nikhwaranyiwe ni angelo, koma mwaanivaha oriiheya ni olemu woomwene,

⁸ nave mwaanivaha olamulello va ddeko ddittheddene.” Mawu a Mulluku yaallotaka wi aanivaha “olamulello va ddeko ddittheddene,” enattaphullella wi ddeko ddittheddene ohihiyavo naari emodda. Naari vano khaninawoona athu elamulellaka va ddeko ddittheddenennddo.

⁹ Koma ninnamoona Yesooyo va enthawi yooyeva avevulliwe, akhwaranyiwe ni angelo wi mwa echisomo ya Mulluku aakhwa munipuroni mwa athu attheene. Nave ekaamba ya okhwa oonilleeye, aavahiwa oriiheya ni olemu woomwene.

¹⁰ Ddeko ddittheddene ddaphatusiwe ni Mulluku nave ekaamba ya olliyooyo. Vano waari waphaama wi Mulluku omweeriha Yesu wi akhalle aphaama oweella mu ddoohoosa wi Yesooyo aakuselle anamwani anchichi o ntitimiho naye nave wi akhalle oohoollella a yoovullusa.

¹¹ Annaweelliha athu o machimwiiwa nave olliye vamodda ni ooweellihiwaayo, Attiitthiiwa tti mmodda. Ella sika ekaambiiwa Yesu ahinawulliweeye muru waaromolla wi tti asinne ni arokoriye.

¹² Olliye aallota wa Mulluku wi, “Kineerewaalleella alliwaayo dda nyuwaano, kineerewuutitimihani va mutthukumanwiiwa.”

¹³ Aallotattho wi, “Kineeromuroromella Mulluku.” Nave allotattho wi, “Ngoonani, kiri mva vamodda ni anamwani kavahiweemi ni Mulluku.”

¹⁴ Vawi anamwanaayo tti athu a mwiilli ni nikhame, Yesu mwaneenaaye aawa akhalla wonanko alliwa akawanana omuthwiiwa. Aheera ddenndda wi mwa okhwa waye amoononge Satana oyo arina masiva oowiiha okhwa,

¹⁵ Mwawi ddiidda Yesu ahaattaphulla ayo yaari akaporo mu okumiiwa muttheene ekaamba yawoova okhwanko.

¹⁶ Vawi tti ddoodduwanyeya phaama wi khaawiille wi aakavihere angelo koma edduullu dda Abrahamu.

¹⁷ Nndda ddinattaphullella wi aphwanenlle akhalle wonanko mmodda a hiyaano mu ddittheddene wi akhalle mullupa mukuthwaahu muullupalli a echifundo ni oororomelleya voomurumeyellani Mulluku wi machimwaahu ekhululukiwe.

¹⁸ Kaambiiwa olliye mwaneena aheesiwa ni ohoosiwa vano ttuuwora waakavihera ayo eneesiwa.