Aheberi 13 - Mawu a Mulluku

Dda omuhakallalliha Mulluku

¹ Virellellani okondana wonanko muthu ni murokoriye

² Muupuwelleke owaakhella phaama alleto owaninyu. Vaweerani nndda amodda yaawaakhella angelo moohidduwella.

³ Muwuupuwelleke ayo eri mundende wonanko nyuwaano murittho wenko. Muwuupuwelleke ayo enahoosiwa wonanko nyuwaanottho munahoosiwella nimodda.

⁴ Muhiwuvevulleke okwati, khallakani oororomellana kaambiiwa Mulluku aneeromweeruza oyo ari ooraruwa apaalle oohiroromelleya muukwatini.

⁵ Murimaanyu ohinakondaka makobiri, mukwanihiweke ni nnddo muriinyuna. Vawi Mulluku aallota wi, “Nguuhiyani apaalle wuuthawani.”

⁶ Hankoni nillipe murima ni ollota wi, “Apwiya yakhalla o embalaaka, ngoova. Muthu ttuukeerella tini?”

⁷ Muwuupuwelleke oohoollellaanyu ayo yuuhuddihalleni dda othenga wa Mulluku. Muupuwelleke wi yakhalla mwawiidde. Mweeseeseke ottakihera echikhulupililo eyo yaariiwana.

⁸ Yesu Khrisitu tti yooyo oddillo, ollello ni mallapo mattheene.

⁹ Muhinaakhullella wi ehuddiho ddeelleto dduuholloseni. Yoophwanella onillipiha murima tti echisomo ya Mulluku, woohikhalla malamulo oollota dda yoocha. Athu amodda yathwara malamulwaalla kheyaaphurallena ello.

¹⁰ Hiyaano nookhalla ni nikuwa koma allupa mukutho oorumeyella m'musasani kheyaakhullelliwa ocha ddooheraatthiwa mukutho vanikuwaninno.

¹¹ Mullupa mukutho muullupalli aanavollowa nipuro naweellesesa ni nikhame na enama wi nikhalle mukutho wookhululukella machimo. Koma enameeyo yayoosella otte wa enyumbeeyo.

¹² Ekaamba ya yeella Yesu nayeenettho aakhwella otte wa muzinda wi aweellihe athu ni nikhame naye.

¹³ Hankoni vano niye wa olliye otte wi navevulliwekena nimodda.

¹⁴ Valle vatthimva khaninna muzinda woohimalla koma ninnatiyera muzinda woohimalla oyo onawooyo.

¹⁵ Sika ekaamba ya yeella mukuthwaahu okhalle omuthokoza Mulluku oohimalla oweella mwa Yesu. Nallota wi, “Mulluku tti Apwiya” nooheraatthi mukutho.

¹⁶ Muhinatiwalla weera dda echifundo ni okawana nnddo muriinyuna vawi mikutho ddenndda ddinnamuhakallalliha Mulluku.

¹⁷ Muwiiwellelleke oohoollellaanyu ni waagonjera vawi alliwa ennawehera mirima ddanyu enthawi ettheene vawi eneerotthopoolla mitteko ddiwa vamiitthoni va Mulluku. Mwawiiwellella eneerekophara muttekwiiwa moohakallalla. Mwaaheera ddiiddo, eneerokhumuwa nave kheyuukaviherani nyuwaano.

¹⁸ Munivekellelleke hiyaano naari nihikayikaka wi nookhalla ni ello yoonivaanya m'murimani mwahu vawi ninneeseesa weera ddittheddene mwa phaama.

¹⁹ Koma kinimuuvekani wi muvekelle wi Mulluku anihokolloselle wa nyuwaano veneva.

Ovekella

²⁰ Mulluku oovaha murendelle, ahaavenyiha Apwiihu Yesu wa ookhwa. Vano Yesu tti mbusa muullupalli a enkhosa, oyo eerille echipangano yanaanweene yoohimalla oweella mu nikhame naye.

²¹ Mulluku uuvaheni ddaphaama ddittheddene wi mweereke nnddo olliye anaddipalleeye. Nave oweella mwa Yesu annaneeriha erive ello eyo enamuhakallalliha olliye. Ntitimiho nikhalle wa Khrisitu wa enthawi yoohimalla. Amen.

Mawu ookomihera

²² Kinimuuvekani, asinnaka ni arokoraka wi muwaakhelle phaama mawu oollipiha murimaalla vawi kuulembelleni moophadda.

²³ Kinapaalla mudduwelle wi Timoteo, mwanamunnihu, oottaphulliwa mundende. Aphiya veneva kineerowaana owaninyunko kaawoonakani.

²⁴ Mukivelleellelle mooni wa awuuhollellani attheene ni wa athu attheene a Mulluku. Asinninyu ni arokorinyu o Italiya eni mooni.

²⁵ Echifundo ya Mulluku ekhalle ni nyuwaano attheene.