Aheberi 12 - Mawu a Mulluku

Dda omuttakiha Yesu

¹ Vawi virive veko voonaapheella vookhalla amboni a echikhulupililo anchichi ddiidda, hankoni nivenyihevo erive ello yooniselliha, makamaka machimo ayo eniwanddeellelle nave nithamake ni murima muttheene mpikisano nambilleehoolla.

² Miitthwaahu ekhalle va Yesu oyo akeraatthihalle echikhulupilwaahu, oyo ananihoollella ni weeriha echikhulupililwaahu wi ekhalle yaphaama. Aavillella owullihiwa muru vookhomiwani vamutandani, ekaamba yoodduwella wi muhoollo aneerohakallalla. Vawi vano annakhalla o nnattanatta wa mpando woomwene wa Mulluku.

³ Muupuwelleke dda Yesu oyo avilleenlle orive ohoosiwa ekaamba ya athu amodda oochimwa ayo yamuwukilalle wi muhifooke ni otathilla murima.

⁴ Khaavo a nyuwaano allipanne ni machimo ophiyera okhwa.

⁵ Ethiyo mootiwalla mawu oollipiha murima a Mulluku uuhuddihalleeyeni nyuwaano wonanko anaaye wi, “Mwanaka ohinavevullaka ollaka wa Apwiya apaalle otathilla murima yaawuuhumullullaka?

⁶ Vallethi Apwiya ennamullaka arive muthu enamukondiiwa. Ennamuwashulla arive muthu oyo enamwaakhullelliiwa wi tti ayiwa.”

⁷ Sika muvillelleke mwaallakiwaka vawi Mulluku annuukusani wonanko anaaye mu ddaweera ddaye ddittheddene. Ethiyo ookhallavo mwaana oyo ahinallakiwa ni attiitthinnya?

⁸ Koma Mulluku aahuullakakani nyuwaano wonanko mmo aneerelleeye ni anaaye attheene, dduwellani wi nyuwaano khamuhiyo anaayenaaye.

⁹ Attiitthiihu a ellapo yavattheella ennanillaka nave ninnaavaha olemu. Ethiyo yookatamiha ttiivi omugonjella Mulluku, Attiitthiihu m'munepani wi nikhalle ni okumi?

¹⁰ Attiitthiihu a ellapo yavattheella yaananillaka wa enthawi yooyeva yoona wi tti woopaalleya wa alliwaayo. Koma Mulluku annanillaka wi ddinikavihere hiyaano wi nikhalle aweella wonanko olliye.

¹¹ Muthu aallakiwaka, wa olliyooyo anoona wonanko ddoomoriha ethakaraka nave ddoohihakallalliha. Koma athu yallelliwe mwawi ddiidda vatulli viwa ennaakhella ezipaso dda okhalla mwamurendelle ni moolungama.

¹² Sika okollani mattaanyu oofooka ni makutthaanyu oovelleveddeya.

¹³ Etakani m'misewuni ddaphaama, sika athu ookhwa meto ehivirellelle okhwa meto koma echirihiwe.

Malangizo ni machenjezo

¹⁴ Mweeseese okhalla mwamurendelle ni athu attheene. Mukhallekettho aweella murima vawi khaavo naari mmodda anaawoone Apwiya aahikhalla aweella murima.

¹⁵ Chenjerani wi arive muthu ahihokollweelle mutulli ni otathilla echisomo ya Mulluku. Chenjerani wi arive muthu ahikhalle wonanko echipaso yoowaawa ni awaambiha ddoohoosa wa athu akhwaaye.

¹⁶ Chenjerani wi arive muthu ahikhalle ooraruwa apaalle ahikhalle oonyaambusa dda Munepa wonanko Esau olle akullihalle ottekweenaaye ni yoocha ya enthawi emodda.

¹⁷ Valle munnadduwella wi vatulli viwa aapaalla waakhella madaliso a attiitthinnya koma aawatteelliwa vawi kheyiivo aaweereeye wi asinthe eerilleeye khalle naari avekille moowinlla.

¹⁸ Nyuwaano khamuri wonanko Aisraele ayo yaphiyalle va ello eyo yawoonriiwa ottannya, mwaango wa Sinai, olle wakhara munllo nave waari wa epiphi yinchichi ni wa ephevo yuullupalli.

¹⁹ Mvo vaari wiipiwa wa nipallapata ni wiiweya wa mawu. Koma yaaveka wi ehiiwe naari vang'ono,

²⁰ vawi yaakhoota wiiwellella mawu awi, “Arive muthu naari enama ya muchipululuni yattannya mwaangooyo yiiphiwe voovokhiwani malluku.”

²¹ Ddeereyille vamwaangoni valle ddaari ddawoopiha, sika wi Mose aatthukumella ekaamba ya woova.

²² Koma nyuwaano moophiya o mwaango wa Ziyoni nave o Yerusalemu ooddullu, o muzinda wa Mulluku Ookumi, nko ori angelo anchichi enahakallalla.

²³ Moophiya o ehakallallello nko otthukumanne anamwani awaamba a Mulluku ayo manddiniiwa yalembiwe oddullu. Moophiya wa Mulluku aweeruza athu attheene nave wa minepa dda athu oolungama, ayo Mulluku aweerilleeye okhalla aphaama wunchichi.

²⁴ Moophiya wa Yesu namunkhoswe a echipangano yanaanweene nave moophiya o nikhame noomiddiwa nno ninalonjeza ddeko ddaphaama ohiyana ni na Abele neerelliiwa.

²⁵ Chenjerani vano wi muhikhoote omwiiwellella oyo anallota ni nyuwaano. Athu ayo yakhootille omwiiwellellaalle oyo aachenjezilleeye vatthi vaava kheyaavulluwalle. Hiyaano ninaavulluwe mwawiidde nakhoota omwiiwellella oyo anallota ovenyera oddullu.

²⁶ Mulluku allotilleeye vawaamba mawaaye yaatikha ellapo yavatthi ettheene koma vano aalonjeza wi aneerotikha wiilli ellapo yavatthi ni yooddullwiine.

²⁷ Mawu awi, “wiilli” enattaphullella wi ddeko nnddo Mulluku aphatusalleeye, nnddo ddinatikheya, ddineerovenyihiwavo koma ddeko ddoohitikheya ddineerokhallavo wa enthawi yoohimalla.

²⁸ Vawi nohaakhella omwene woohitikheya nimuthokozeke Mulluku nave nimullapelleke moophwanellella, moolemu ni mwawoova.

²⁹ Vawi Mullukwaahu ari wonanko munllo wawoononga.