Aheberi 11 - Mawu a Mulluku

Dda makhollo a echikhulupililo

¹ Okhalla ni echikhulupililo onattaphullella wi ohikayikella ddeko ninatiyerelleehu ni osimikiza wi ddeko nnddo nihinaddooneehu ddookhallawo.

² Tti echikhulupililo yeella yaweerihalle makhollwaahu wi Mulluku ahakallallekena.

³ Ekaamba yawi nookhalla ni echikhulupililo, ninniwesesa wi ddeko ddittheddene dda va ellapo yavattheella ddaphatusiwe ni mawu a Mulluku, sika wi ddeko ninooneehu ddaphatusiwe ovenyera o ddeko ddoohooneya.

⁴ Ekaamba ya echikhulupililo, Abele aaheraatthi mukutho waphaama wa Mulluku ohiyana ni wa Kaini, sika ahaakhullelliwa wi tti oolungama. Mulluku mwaneenaaye aahakallalla ni mukuthwaaye. Naari akhwille, echikhulupililwaaye tti omboni wa hiyaano.

⁵ Ekaamba ya echikhulupililo, Enoki aakusiwa ni Mulluku oya oddullu ari mukumi vawi khaavo oonille mutembwaaye. Mawu a Mulluku tti mboni wi ahinakusiwe oya oddullu aheera ddoomuhakallalliha Mulluku.

⁶ Khaavo anaamuhakallallihe Mulluku ahinna echikhulupililo vawi oyo anapaalla omwaatamella Mulluku akhallena echikhulupililo yawi Mullukooyo ookhallawo. Nave aneerewaathuva athu enamwaashaasha.

⁷ Ekaamba ya echikhulupililo, Mulluku aamuchenjeza Nowa dda ddeko ddamuhoollo nnddo ddaari ddihinooneye. Ahiiwellella nave aamaka ekallawa wi aavullusellemo athu attheene a mu nibanja naye. Sika ahaavaanyiha athu a ellapo yavatthi wi tti oochimwa nave ahaakhella echilungamo yoovenyera o echikhulupililo.

⁸ Ekaamba ya echikhulupililo, Abrahamu aamwiiwellella Mulluku amwiithanilleeye wi aye o ellapo eyo amulonjezilleeye wi enaakhalle yaayeyaaye. Naari ahidduwenllewo nko anayeeye, ayaawove.

⁹ Ekaamba ya echikhulupililo, Abrahamu akhalla m'musasani wonanko mulleto mu ellapo eyo Mulluku amulonjezilleeye. Akhalla m'misasani. Isaki mwanaye ni Yakobo edduullwaaye, alliwattho yakhalla m'misasani vawi alliwattho yahaakhellana lonjezonna.

¹⁰ Abrahamu eera ddiidda atiyeraka ovollowa mu muzinda wookhalla ni matthipello oohimalla oyo waganizeriwe ni omakiwa ni Mulluku.

¹¹ Ekaamba ya echikhulupililo, Sara aakhalla ni mwaana aamullopwana naari aari awuulluvalla ni oohiyara kaambiiwa Abrahamu aamukhulupilila Mulluku oyo amulonjezille.

¹² Abrahamu uulluvanlle, ari vakhuviru okhwa, aakhalla nikhollo na edduullu ddinchichi. Vawi edduullunnddo ddohaata wonanko etheneeri apaalle wonanko mihava dda mukhwipi mwa enyanja.

¹³ Athu attheene yakhulupililallaalla yaakhwa ehinaakhelle ddeko nnddo Mulluku aalonjezilleeye. Koma yaaddoonella voorekama ni ohakallallana. Yahaakhullella wi yaari alleto a ellapo yavattheella.

¹⁴ Ayo enallota wi tti alleto a ellapo yavattheella, ennooniha wi enatiyerella waakhella ellapo yayiwayayiwa.

¹⁵ Kheyaaka ellapo yoowaniwa yayihiyalliiwa, ddaariki ddiiddo yaaweerohokollweella nko yavenyereewawo.

¹⁶ Koma yatiyera ellapo yaphaama oddullu ohiyana ni ellapo yoowaniwa. Ella sika ekaambiiwa Mulluku ahinawulliweeyena muru yaamuromollaka wi Mullukwiiwa. Nave ahaamakella muzinda woohimalla.

¹⁷ Ekaamba ya echikhulupililo, Abrahamu ahaakhullella omuheraatthi mukutho mwanaye, Isaki, Mulluku amweesilleeye naari Mulluku amulonjezille mwaana aamullopwanoolla.

¹⁸ Dda mwaanoolla Mulluku aallota wi, “Oweella mwa Isaki oneerokhalla ni edduullu.”

¹⁹ Sika Abrahamu aakhulupilila wi Mulluku ttuuwora omuvenyiha Isaki wa ookhwa. Vano aamwaakhellattho wonanko oovenyihiwa wa ookhwa.

²⁰ Ekaamba ya echikhulupililo, Isaki ahaavekella anaaye, Yakobo ni Esau, madaliso a muhoollo.

²¹ Ekaamba ya echikhulupililo, Yakobo ari vakhuviru okhwa, aamudalisa arive mwaana a Yosefe. Eera ddenndda ahameelle mutootwaaye, amullapellaka Mulluku.

²² Ekaamba ya echikhulupililo, Yosefe ari vakhuviru okhwa, aallota dda okhuma wa Aisraele mu Iguputo. Vano ahaalleella wi ekuse makhuvaaye yaakhumaka.

²³ Ekaamba ya echikhulupililo, ayariwe Mose, makhollwaaye yaamuvittha miyeri miraru, emoonille wi ari oreera. Kheyaawooville ohiiwellella malamulo a Farao a o Iguputo.

²⁴ Ekaamba ya echikhulupililo, Mose unnuwalle aakhoota weeriwa mwaana a mwaana aamutthiyana a Farao.

²⁵ Olliye aatthoolla ohoosiwa vamodda ni athu a Mulluku ohiyana ni okhalla ni ddoohakallalliha ddoochimwa wa enthawi yooyeva.

²⁶ Aadduwella wi ohoowa ekaamba ya Mesiya* waari woopaalleya wunchichi ohiyana ni eyuuma ettheene ya mu Iguputo vawi atiyerella othuviwa.

²⁷ Ekaamba ya echikhulupililo, Mose aakhumawo o Iguputo moohoova oowalli wa Farao vawi aanavillella wonanko muthu oomoona Mulluku oohooneyoolla.

²⁸ Ekaamba ya echikhulupililo, Mose akeraatthihalle Ehakallallo ya Paska, aalamula wi emidde nikhame na enama machiwiiwa wi angelo ayo enaawiipheke anamwani awaamba ehiwiiphe anamwani awaamba Aisraele.

²⁹ Ekaamba ya echikhulupililo, Aisraele yaallapuwa vatthi vawumma mu enyanja yoofiira. Koma a Aiguputo voopaallani waattakiha Aisraelaalle, yaavuhellelliwa ni maaddi.

³⁰ Ekaamba ya echikhulupililo, esiri dda muzinda wa Yeriko ddaakumuwa, Aisraele yeetille moowaapheella muzindooyo mallapo matthanu ni meelli.

³¹ Ekaamba ya echikhulupililo, Rahabu, hule khaawiiphiwe vamodda ni athu oohiiwellellaalle vawi aawaakhella phaama owaniwa Aisraele ayo yawiille wi ezonde muzindooyo.

³² Ethiyo killote tini vano? Enthawi yooyeva yawi killote dda athu amodda anchichi monga Gideoni, Balaki, Samisoni, Yefita, Davide, Samuele owaakattho anamallotella.

³³ Ekaamba ya echikhulupililo, athu awi ddiidda yaagonjiha moomwene, yaheera echilungamo, yahaakhella eyo Mulluku alonjezilleeye nave yaawalla eyano dda mikango.

³⁴ Amodda yaathiimiha munllo woowalli, amodda yaavulluwa wowiiphiwa ni masupada, yaari oofooka koma yaavahiwa masiva, yaari oollipa okhotoni nave yaawiikariha akhoto eelleto.

³⁵ Atthiyana amodda yaahokolloselliiwa ookondiwiiwa evenyihiwe wa ookhwa. Amodda yahoosiwa ophiyera yahiiphiwa ekhootille ottaphulliwa vawi yatiyerella waakhella okumi woohimalla.

³⁶ Amodda yaattheyiwa ni owashulliwa, yaamakiwa ni onyolo nave ehiyiwa mundende.

³⁷ Amodda yahiiphiwa voovokhiwani malluku, amodda yaaphaddiwa variyari, amodda yahiiphiwa ni masupada. Amodda kheyaarina ddoowara ddaphaama koma yawara mattapara a enkhosa ni a epuri. Yaari oohoowa, oorama murendelle nave oohambulliwa.

³⁸ Athu yaalla yaari aphaama nave kheyaaphwanenlle okhalla ellapo yavattheella, yaamoona weeteeta muchipululuni ni m'miyaangoni yiipitthaka m'makhunguni ni m'mallitini.

³⁹ Athu attheene a echikhulupililwaalla yaheera ddoomuhakallalliha Mulluku koma yaakhwa ehinaakhelle eyo yalonjeziwiiwa ni Mulluku.

⁴⁰ Sika Mulluku aari aganizalle khalle ddoonikhozera ello yoopaalleya wunchichi vawi khaapanlle wi yaakhelle yoolonjeziweeyo hiyaano nihiivo.