Aheberi 10 - Mawu a Mulluku

¹ Malamulo a Mose khehiyo ddeko ddaphaama nnddo ddinawa koma tti muuthuuchive wa ddeko ddaphaama nnddo ddinawa vawi khenawora oweelliha athu o machimwiiwa vooheraatthini mukutho orive muyakha.

² Athu oomullapella Mulluku yeellihiweke kheyaakhallena yowiivaanya m'murimani wi aachimwa sika nave wi kheyaaheraatthiki mukutho orive muyakha.

³ Koma nndda ddinawuupusa machimwiiwa orive muyakha.

⁴ Vawi nikhame na eng'ombe ni na epuri khaniwora ohuwa machimwiiwa.

⁵ Khrisitu awiilleeye va ellapo yavatthi aallota wa Mulluku wi, “Nyu khamunapaalla mukutho ni emphaso, koma mwaakivaha miyaano mwiilli.

⁶ Khamunahakallallana mukutho wooshellelliha, naari mukutho waweelliha machimo.

⁷ “Vano Khrisitu aallota wi, ‘Mullukwaaka, koowa wi keere ddoopaalla ddanyu, wonanko mmo ddalembelliwiiwa mu nibukhu na malamulo.’ ”

⁸ Malamulo enahuddiha wi ddoovelleella wa Mulluku ni mukutho wooshellelliha ddeereyeke ekaamba ya machimo. Koma vano kaambiiwa tini Khrisitu aneereeye wi Mulluku khanahakallallana ddenndda?

⁹ Nndda ddinattaphullella wi Mulluku anaakakhaniha mikutho ddakhalle ni mukutho wa Khrisitu. Ella sika Khrisitu allotelleeye wa Mulluku wi, “Koowa wi keere ddoopaalla ddanyu.”

¹⁰ Sika noheellihiwa kaambiiwa Yesu Khrisitu aamwiiwellella Mulluku vawiiheraatthini mukutho wawaamba ni wookomihera.

¹¹ Allupa mukutho enaphara muttekwiiwa nllapo ni nllapo oheraatthi mukutho mmoddamoddave oyo ohinawora ohuwa machimo.

¹² Koma Khrisitu ahiiheraatthi mukutho mmoddave woweelliha machimo mattheene. Aheraatthilleeye, aakeraatthi o nnattanatta na Mulluku.

¹³ Nave anatiyerella wenko ophiyera aatthattusalle adanaaye wi ekhalle voonyingallavo manyallwaaye.

¹⁴ Ni mukutho mmoddoolla, aaweeriha wi ekhalle aphaama woohimalla athu ayo aweellihalleeye.

¹⁵ Munepa Waweella annavelleella omboni voollotani wi,

¹⁶ “Yavira mallapo yaayo, kineerokeraatthiha echipangano ni alliwaayo, kineerewiiyaatthi malamulwaaka m'maganizoni mwiwa ni waalemba m'murimani mwiwa.

¹⁷ Keeddiiddottho kineerotiwalla machimwiiwa, nguupuwella ddoolakwa ddiwa.”

¹⁸ Machimo yakhululukelliwa mukutho waweelliha machimo khonapaalleya.

Ovillella mu echikhulupililo

¹⁹ Asinnaka ni arokoraka, nikhame na Yesu ninanillipiha murima wi nineerovollowa mu nipuro naweellesesa.

²⁰ Olliye aanihullella ettilla yanaanweene yoohoollella o okumi oweella va ekatani eyo eri mwiillaaye.

²¹ Sika vano nookhalla ni mullupa mukutho muullupalli oyo analamulella enyumba ya Mulluku.

²² Vano hankoni nimwaatamelle Mulluku ni mirima ddawoona ni mirima ddoohikayika mwa echikhulupililo. Hankoni nikhalle ni mirima ddeellihiwe voomiddiwani, yawuupusella murima yoohivaanyihiwa ni ddoochimwa nave ni miilli ddoohapihiwa ni maaddi aweella.

²³ Nillipihelle waakhullella moohikayikella nnddo ninadditiyereehu vawi oyo anilonjezille ddenndda tti oororomelleya.

²⁴ Nivirellelle wuupuwellana, ollipihana wi noonihe echikondi ni weera ddaphaama.

²⁵ Nihisoseke o mitthukumano ddahu ddoollapella wonanko mmo eneerella amoddaayo. Koma hankoni nillipihane mwiilli vawi munnadduwella wi nllapo na Apwiya nohaatamella.

²⁶ Ninachimwa mwaphudda nidduwellaka yawoona, khawiivo mukutho mmodda onaakhelliwe ekaamba ya machimwaahwaayo.

²⁷ Kheyiivo emodda ehanlle koma otiyerella mwawoova echiweruzo ni munllo wawoopiha oyo onaawononge oovaanyihana ni Mulluku.

²⁸ Muthu oohithwara malamulo a Mose aniiphiwa mooheerelliwa echifundo vakhalla amboni eelli apaalle araru.

²⁹ Onaakhalle wawiidde wa oyo anamullotella epewe Mwaana a Mulluku? Oyo aneesa noohikhalla ni mutteko nikhame na echipangano nno naneellihalle? Apaalle anallotella epewe Munepa Waweella oyo ananivaha echisomo ya Mulluku? Ollakiwa wa muthu awi ddiidda onaakhalle wawoopiha wunchichi.

³⁰ Vawi ninnadduwella wi Mulluku aallota wi awaallaka ni waahokollosella. Mawu a Mulluku yaallotattho wi Apwiya eneeroweeruza athwiiwa.

³¹ Sika ophariwa ni Mulluku Ookumi tti wawoopiha.

³² Koma upuwellani ddaweereyelleninndde, enthawi elle mwaakhenlleenyu owala wa Mulluku, mwaavillella voowanani ekhoto moollipana ni ddoohoosa ddittheddene.

³³ Enthawi ddimodda yaanuunyambusani ni oweerellani epewe vamiitthoni va athu. Enthawi ddimodda mwaanakhalla vamodda ni athu ayo yahoosiwa.

³⁴ Vawi mwahaamorella ethakaraka ayo yaari mundende nave mwahaakhullella moohakallalla wi ewaakheni eyuumaanyu kaambiiwa munnadduwella wi mookhalla ni eyuuma yawaata ni yoohimalla.

³⁵ Sika muhinatathilla ollipa wanyu murima vawi muneerothuviwa wuullupalli.

³⁶ Muvillelleke, sika wi mwamalliha weera yoopaalla ya Mulluku muneerewaakhella nnddo alonjezilleeye.

³⁷ Mawu a Mulluku eni, “Enthawi ehanlle vang'ono wi oyo anawa, aphiye khaselliwa iyaayi.

³⁸ Vano athwaaka oolungama eneerokhalla ni okumi ekaamba ya echikhulupililwiiwa. Koma yaahokollweellaka mutulli, nginahakallallana.”

³⁹ Koma hiyaano khanihiyoni athu ayo enahokollweella mutulli ni woonongeya koma niri athu ookhulupilila wi nivulluwe.