Aheberi 1 - Mawu a Mulluku

Mulluku anallota oweella mwa Mwanaye

¹ Khalle, Mulluku aallota wa makhollwaahu enthawi ddoohiyanahiyana nave moohiyanahiyana oweella mwa anamallotella.

² Koma mu mallapo oomallihellaalla anallota wa hiyaano oweella mwa Mwanaye. Mwa olliyoolla Mulluku aaphatusa ellapo ni ddittheddene ddinakhalla mwemmo. Nave Mulluku aamutthoolla wi omamallihello wene ddeko ddittheddene ddikhalle ddaayeddaaye.

³ Olliye sika owala wawoonihella ntitimiho na Mulluku nave tti oophwanaphwana ni Mulluku mwaneena. Navettho annavirellella osunga ddeko ddittheddene ni mawaaye amasiva. Amallihalle okhululukella machimo mattheene a athu, aakeraatthi oddullu onnattanatta na Mulluku amasiva.

Mwaana a Mulluku ohaakhwaranya angelo

⁴ Mwaana a Mulluku tti oowaakhwaranya angelo nave nnddina nno Mulluku amuvahilleeye tti nowaakwaaranya manddina a angelwaayo.

⁵ Vawi Mulluku khaallotille naari wa mmodda a angelwaaye wi, “We tti Mwanaka, ollello kohuuyara weyaano.” Naari Mulluku khaallotille wa mungelo wi, “Kineerokhalla Attiitthinnya, nave olliye aneerokhalla Mwanaka.”

⁶ Nave mvo Mulluku aariiye vakhuviru omukusa Mwanaye Awaamba ovollowana mu a ellapo yavatthi, aallota wi, “Angelwaaka attheene emullapelleke olliye.”

⁷ Koma dda angelo Mulluku allotille wi, “Kinnaweeriha angelwaaka wonanko ephevo, ni oorumeyellaaka wonanko mallumi amunllo.”

⁸ Dda Mwanaye, Mulluku allotille wi, “Nyu tti Mulluku, omwenaanyu onaakhalle wa enthawi yoohimalla! Munalamulella va athwaanyu mwa echilungamo.

⁹ Munnakonda echilungamo nave munniitana ni ddoonanara. Miyaano Mullukwaanyu kuutthoonlleni ekaamba ya yeella nave kohuuriihani vawuuvahani ehakallallo yuullupalli ohiyana ni eyo kaavahilleemi akhwiinyu.”

¹⁰ Mawu a Mulluku eni, “Nyu Apwiya vawaamba valle mwaaphatusa ellapo yavatthi, ddooddullu tti mitteko dda mattaanyu.

¹¹ Ddenndda ddineeromalla koma nyuwaano muneerokhallavove, ddittheddene ddineerewaahuwa wonanko ddoowara.

¹² Muneeroddivillika wonanko mukanjo wawaahuwa, nave muneerewaakakhaniha wonanko ddoowara ddawaahuwa. Koma nyuwaano khemunasintha miyakha ddanyu kheddinamalla.”

¹³ Mulluku khaallotille wa mmodda a angelwaaye wi, “Khalla o nnattanatta naka ophiyera kaatthattusalle adanaawo voonyingallavo manyallwaawo.”

¹⁴ Vano angelwaayo ttaani? Yaalla sika minepa ddinamurumeyella Mulluku nave Mulluku annaddiruma wi ddaakavihereke ayo enaavullusiwe.