Agalatiya 6 - Mawu a Mulluku

Mukaviheraneke wiireya ddookatamiha dda mmodda ni mukhwaaye

¹ Asinnaka ni arokoraka, mmodda aphwanyiwa achimwaka, nyuwaano mwaakhenlle Munepa Waweella munaphwanella mumuhumullulle mwawiithaalla. Koma mwiiwehereke weekhiinyu wi nanyeenettho muheesiwe.

² Mukaviheraneke oreya ddookatamiha dda mmodda ni mukhwaaye nave mu ettilla yeella muneerewooniha wi munnamwiiwellella Khrisitu.

³ Vawi mmodda aaganizaka wi olliye tti oopaalleya koma ahiri oopaalleya, aniilleka yeekhaaye.

⁴ Arive muthu anaphwanella eeseke makhallellwaaye. Yakhalla aphaama sika akotelleke mitteko aphanreeye yeekha, voohiphwanaphwanihani ni mitteko aphanre mmodda.

⁵ Vawi arive muthu ookhalla ni katundwaaye wi iireye.

⁶ Ayo enahuddihiwa othenga wa Khrisitu enaphwanella ekawanena ddeko ddaphaama eriiwana ni ahuddihiiwa.

⁷ Muhiilleke weekhiinyu, khaavo muthu anamoottotthe Mulluku. Athu eneerohata ddennddove yamiddalliiwa.

⁸ Vawi ayo enamidda m'matani mwa minkhella dda omuthwiiwa, eneerotthukumaniha ddoohata dda okhwa; yamidda m'matani mwa munepa ovenyera wa munepa yooyo eneerotthukumaniha yoohata ya okumi woohimalla.

⁹ Sika nihitope vaweerani ddaphaama vawi enthawi eneerokwakhwana eyo nineereehu nitthukumanihe ddoohata.

¹⁰ Sika vano nakhalla ni enthawi ninaphwanella neereke ddaphaama wa arive muthu nave makamaka ayo eri a mu nibanja nahu na echikhulupililo.

Ochenjeza woomalliha ni ollaanya

¹¹ Ngoonani malemba muullupalli ayo kinalembeemi wa nyuwaano vano ni nnatta naka na meekhaaka!

¹² Athu ayo enuuwatiherani wi muphaddiwe tti yaayo enapaalla oddoonihella ni okotella eziwalo wi ehihoosiwe ekaamba ya mutanda wa Khrisitu.

¹³ Naari ayo enaphaddiwa kheniiwellella malamulo; enapaalla wi nyuwaano muphaddiwe wi ekoteke wi nyuwaano mwahaakhullella wi muphaddiwe.

¹⁴ Nave miyaano kinakotella dda mutandave wa Apwiihu Yesu Khrisitu; vawi ekaamba ya mutandaaye, ellapo yavatthi wa miyaano tti yookhwa nave miyaano tti ookhwa o ellapo yavatthi.

¹⁵ Ophaddiwa naari ohiphaddiwa khonna mutteko koma okhalla oophatusiiwa anaanweene sika ori ni mutteko.

¹⁶ Nave ayo eniiwellella lamulo nenna, murendelle ni echifundo ddikhalle ni yaayo ni athu a Mulluku attheene!

¹⁷ Voomallihani, arive muthu ahikikatamihettho kaambiiwa mapamba kiriimina vamwiillini vaka enooniha wi miyaano tti kaporo a Yesu Khrisitu.

¹⁸ Echisomo ya Apwiihu Yesu Khrisitu ekhalle ni nyuwaano attheene, asinnaka ni arokoraka. Amen.