Agalatiya 5 - Mawu a Mulluku

Mukhalleke oottaphulliwa ddiiddo

¹ Khrisitu oonittaphulla hiyaano wi nikhalle oottaphulliwa! Vano imellani moollipa wonanko athu oottaphulliwa nave muhihokollweelle okhalla akaporo wiillittho.

² Ngiiwani! Miyaano Paulo kinuulleellani wi mwaakhullella wi muphaddiwe, ddinattaphullella wi nyuwaano khamunna mutteko ni Khrisitu.

³ Wiillittho, kinamuchenjeza arive muthu anapaalla ophaddiwa wi anaphwanella wiiwellella malamulo mattheene.

⁴ Nyu muniilungamiha vawiiwellellani malamulo mohiihiyaniha weekhiinyu ni Khrisitu. Muri otte wa echisomo ya Mulluku.

⁵ Nave hiyaano, otiyera wahu tti wawi Mulluku anilungamihe wa olliye nave ella sika ninatiyereehu mwamasiva a Munepa a Mulluku oyo onaphara mutteko oyeella mu echikhulupilwaahu.

⁶ Vawi nakhalla mu eyaattano ni Khrisitu Yesu, ophaddiwa naari ohiphaddiwa khonna mutteko; yoopaalleya tti echikhulupililo eyo enaphara mutteko oyeella mu echikondi.

⁷ Mwaaneera phaama! Ttaani uuwattenlleni wiiwellella yawoona? Uullekilleni mwawiidde?

⁸ Yeella kheyaaweeriwe ni Mulluku oyo anawiithanani.

⁹ Athu ennallota wi, “Yisiti ooyeva annamufufumiha buledi muttheene.”

¹⁰ Nave miyaano kinnuukhulupililani mwa Apwiya wi khamukhalla ni maganizo ohiyana ni aaka navettho wi muthu oyo anawaapheellihani muru, khaya ttaani, aneerollakiwa ni Mulluku.

¹¹ Nave miyaano, asinnaka ni arokoraka, kavirellella ollalleya wi ophaddiwa tti woopaalleya, kinahoosiwa kaambiiwa tini? Ddaariki ddawoona, sika ollalleya waka wa dda mutanda wa Khrisitu khawaaweerihe ddookatamiha.

¹² Weerokhalla phaama wi athu ayo enawaapheellihani muru yiihulle weekhiiwa!

¹³ Nave nyuwaano, asinnaka ni arokoraka, muhaakhullelle wi ottaphulliwa wonngu okhalle ekari yawi mulamuliweke ni ddoopaalla dda mwiillaanyu. Nave mukhalle oorumeyellana mmodda ni mukhwaaye mu echikondi.

¹⁴ Vawi malamulo mattheene enakwakhwanihelliwa va lamulo nimodda nawi, “Omukondeke mukhwaawo wonanko mmo oniikondelleewe weekha.”

¹⁵ Nave mwaakhallaka wonanko enama ddamuhakani, mwaallumanaka ni ochana, muchenjere wi muhoonongane attheene.

Munepa ni mwiilli

¹⁶ Eyo kinalloteemi tti yawi muhiye wi Munepa Aweella ahoollelleke okumaanyu. Mweeddiiddo khamukwakhwanihaka minkhella dda omuthu.

¹⁷ Vawi ddoopaalla dda omuthwaahu tti ddoovaanyana ni ddoopaalla dda Munepa nave ddoopaalla dda Munepa tti ddoovaanyana ni ddoopaalla dda omuthwaahu. Ddeko piilli ddenndda tti ddawiitana, sika khamuwora weera eyo munapaalleenyu weera.

¹⁸ Munepa uuhoollellani, khamuri awiiwellella malamulo.

¹⁹ Mitteko dda omuthu tti ddawooneya. Ddinooneya mu oraruwa, onanara nave okhallella minkhella ddoonanara;

²⁰ mu ollapella mafano ni okhwiri. Athu enniitana nave ennawana; ennakhallellana ehache, osha murima ni wiikonda. Ennakawaneya millokomilloko;

²¹ ennakhalla eehache, oolezela, ennakhalla vamachellelloni ni olezela ni weera ddeko ddimodda ddawi ddiidda. Kinimuuchenjezani vano wonanko kenreemi vawaamba wi ayo eneera ddeko ddenndda kheyaakhella omwene wa Mulluku.

²² Nave echipaso ya Munepa tti echikondi, ohakallalla, murendelle, ovillella, ethakaraka, oreera murima, okhulupilila,

²³ omaalleya ni wiihiiha. Kheyiivo malamulo enavaanya ddeko wonanko ddenndda.

²⁴ Nave ayo eri a Khrisitu Yesu aatthomeya vamutandani omuthwiiwa ni ddoopaalla ddiwa ni minkhella ddiwa.

²⁵ Munepa oonivaha hiyaano okumi, anaphwanellattho ahoollelleke okumaahu.

²⁶ Nihikhalle ookota apaalle ollikana mmodda ni mukhwaaye, vihikhalle ehache va mmodda ni mukhwaaye.