Agalatiya 3 - Mawu a Mulluku

Malamulo apaalle echikhulupililo

¹ Agalatiya ookarangeya nyu, nyuwaanothi moollowiwa! Mwaalleelliwa phaamaddene dda otthomeyiwa vamutandani wa Yesu Khrisitu!

² Killeelleni ello emodda ella. Ethiyo mwahaakhella Munepa a Mulluku vawiiwellellani malamulo apaalle vookhulupililani othenga waphaama mwiiwalleenyooyo?

³ Mukarangeyille mwawiidde! Mwahaamba ni Munepa a Mulluku. Ethiyo vano munapaalla mumallihe ni omuthu?

⁴ Ethiyo ddeko ddittheddene ddeereyille wa nyuwaano khaddinna mutteko? Khe ddiiddo!

⁵ Mulluku annuuvahani munepaaye ni weera ddoottikhiniha variyari vanyu. Ethiyo nndda ddinneereya kaambiiwa munniiwellella malamulo apaalle kaambiiwa munnakhulupilila othenga waphaama mwiiwalleenyooyo?

⁶ Mawu a Mulluku enallota wi, “Abrahamu aamukhulupilila Mulluku sika Mulluku aamwaakhullella wi tti oolungama.”

⁷ Vano munaphwanella mudduwelle wi edduulludduullu dda Abrahamu tti athu ayo erina echikhulupililo.

⁸ Mawu a Mulluku yaallotella wi Mulluku aneeroweera oolungama athu ayo ehiri Ayuda oweella mu echikhulupililo. Sika Mulluku aamulleella Abrahamu wi, “Oweella mwa weyaano mitundu ddittheddene ddineerodalisiwa.”

⁹ Abrahamu aakhulupilila nave aadalisiwa; sika ookhulupilila attheene ennadalisiwa vamodda ni olliye.

¹⁰ Ayo enakhulupilila wiiwellella malamulo tti ootembeleliwa. Vawi mawu a Mulluku enallota wi, “Muthu ahiniiwellella erive ello yoolembiwa mu nibukhu na malamulo tti ootembeleliwa!”

¹¹ Vano, onnadduwanyeya wi khaavo muthu aneeriwa oolungama ni Mulluku vawiiwellellani malamulo kaambiiwa mawu a Mulluku eni, “Muthu oyo alungamihiwe ni Mulluku oweella mu echikhulupililo aneerokhalla ni okumi.”

¹² Koma wiiwellella malamulo khonapaalleya okhalla ni echikhulupililo. Vawi mawu a Mulluku enallota wi, “Muthu aniiwellella malamulo aneerokhalla ni okumi.”

¹³ Nave vookhallani ootembeleliwa munipuroni mwahu, Khrisitu oonoopolla hiyaano o otembeleliwa wa malamulo. Vawi mawu a Mulluku enallota wi, “Arive muthu anatthomeyiwa vamuteekhoni tti ootembeleliwa ni Mulluku.”

¹⁴ Khrisitu Yesu aheera ddenndda wi madaliso ayo Mulluku aalonjezilleeye wa Abrahamu evahiwe wa athu a mitundu ddittheddene oweella mwa Khrisitu. Vano wi oweella mwa echikhulupililo naakhelle Munepa waalonjeziwe ni Mulluku.

Malamulo ni echipangano

¹⁵ Asinnaka ni arokoraka, kinaaka kiphwanaphwanihe ni nnddo ddineereya nllapo ni nllapo. Athu eelli yapangana va ello emoddeene nave yasimikizellana voolembani echipanganweeyo, khaavo muthu anaatathille echipanganweeyo apaalle woonjereravo ello emoddeene.

¹⁶ Vano Mulluku aheera malonjezwaaye wa Abrahamu ni edduullu ddaye. Mawu a Mulluku voollotani wi, “Edduullu ddaye” khenattaphullella wi, “Athu anchichi” koma enattaphullella wi, “Edduullwaaye” ottaphullella wi, “Muthu mmoddave” nnddina naye Khrisitu.

¹⁷ Eyo kinaakeemi tti yawi Mulluku aheera echipangano ni Abrahamu. Malamulo ayo yavahiwe ddiviralle miyakha 430, kheyeeriha wi echipanganweeyo etathille apaalle woononga lonjezo na Mulluku.

¹⁸ Madaliso a Mulluku yavahiweke ekaamba ya malamulo nave kheyaavahiwettho ekaamba ya lonjezo. Koma Mulluku aamuvaha Abrahamu madaliso yaalla ekaamba ya malonjezanwaaye.

¹⁹ Vano yoolinga ya malamulo tti tini? Yahaanjereriwa wi yoonihe machimo nave yaaphwanella wi ekhallevove ophiyera owa wa edduullu ya Abrahamu, oyo eerelliwe lonjezonno. Malamulo yavelleelliwe wa Mose oweella mwa angelo. Nave Mosooyo aari wonanko namunkhoswe.

²⁰ Koma namunkhoswe khanapaalleya vakhalla muthu mmodda nave Mulluku tti mmodda.

Yoolinga ya malamulo

²¹ Ethiyo malamulo ennavaanyana ni malonjezano a Mulluku? Kheneera ddiiddo! Vawi vakhanlleke lamulo noovaha okumi sika arive muthu aaweerekokhalla oolungama vawiiwellellani lamulonno.

²² Koma mawu a Mulluku enallota wi ellapo yavatthi ettheene eri mu masiva a machimo. Sika vano emphaso yalonjeziwe vookhulupililani mwa Yesu Khrisitu enavahiwa wa ayo enakhulupilila.

²³ Nave enthawi ya echikhulupililo ehinaphiye, naamakiwa ni malamulo wonanko a mundende ophiyera echikhulupililo yuupullulliwe.

²⁴ Nave vano hiyaano naahuddihiwa ni malamulo ophiyera Khrisitu awiilleeye wi neeriwe oolungama ni Mulluku oweella mu echikhulupililo.

²⁵ Vano vawi enthawi ya echikhulupililo yoophiya, khaninahuddihiwattho ni malamulo.

²⁶ Mu eyaattano ni Khrisitu Yesu, attheenenyu tti anamwani a Mulluku oweella mu echikhulupililo.

²⁷ Mwaabatiziwa mwawaattana ni Khrisitu nave vano moowara okumi wa Khrisitu wonanko yoowara yanaanweene.

²⁸ Sika khawiivo ohiyana variyari va Ayuda ni athu ayo ehiri Ayuda, variyari va akaporo ni athu ehiri akaporo, variyari va allopwana ni atthiyana. Attheenenyu tti amoddamoddave mu eyaattano ya Khrisitu Yesu.

²⁹ Mwaarimi muri mwa Khrisitu, sika nyuwaano tti edduullu dda Abrahamu nave muneerewaakhella eyo Mulluku alonjezilleeye.