Agalatiya 2 - Mawu a Mulluku

Paulo ni amurummwa amodda

¹ Viviralle miyakha khumi ni misese kaahokollweella o Yerusalemu vamodda ni Baranaba owaakattho Tito.

² Kayiillewo kaambiiwa Mulluku ahuupullulla wa miyaano wi kaaphwanella oyaawo. Mu mutthukumano wa ooholleellave kaatthopoollella othenga waphaama kallalleyilleemi wa athu ayo ehiri Ayuda. Vawi Ngaapanlle wi nnddo kineereemi ni nnddo kenreemi ddooneye wonanko tti ddoohikhalla ni mutteko.

³ Mukhwaaka Tito naari tti Mugriki,* khaawatiheriwe wi aphaddiwe.

⁴ Athu amodda yaapaalla yeeyo koma yaari ookhulupilila awoottha ayo yaavollowille mumpingoni mwahu wi etoteke miyaha mwawiipitthella wi yoone ottaphuwa ori ni hiyaano mwa Khrisitu Yesu. Yaapaalla oneera akaporo a malamulwiiwa.

⁵ Koma khanaawagonjenlle naari vang'ono wi yawoona ya othenga waphaama ekhalleve ni nyuwaano.

⁶ Amodda a yaayo yooneya wi tti ooholleella, khaya yaari awi ddiidda apaalle iyaayi, miyaano nginnana mutteko vawi Mulluku khanamweeruza muthu moollikana ni mooneyellwaaye. Oohoollella yaayo kheyakivekille wi koonjerere erive ello va othenga kallalleyeemi.

⁷ Nave yahoona wi Mulluku aakivaha mutteko woollalleya othenga waphaama wa athu ayo ehiri Ayuda, wonanko mmo aamuvahilleeye Petro mutteko woollalleya othenga waphaama wa Ayuda.

⁸ Vawi ni masiva a Mulluku kaakhalla murummwa wa athu ayo ehiri Ayuda wonanko mmo Petro akhallelleeye murummwa wa Ayuda.

⁹ Yakobo, Petro ni Yohane ayo yooneya wi tti oohoollella, yaadduwella wi Mulluku aakivaha mutteko waphaama yoolla, sika yaaniphara matta miyaano ni Baranaba woonihella wi attheene naari awaattana. Nahiiwanana ni Baranaba wi naphare mutteko variyari va athu ayo ehiri Ayuda nave alliwa variyari va Ayuda.

¹⁰ Eyo yaanivekilliiwa tti yawi niwuupuwelleke athu oohoowa mumpingoni mwiwa, yeeyottho sika kikhanlleemi kipaallaka ollipihella.

Paulo anamuhumullulla Petro o Antiyokeya

¹¹ Nave Petro aphiyalleeye o Antiyokeya,* kaamuvaanya vamiitthoni va athu kaambiiwa eerilleeye kheyaari yaphaama.

¹² Athu amodda ayo yarumihiwe ni Yakobo ehinaphiye wenko, Petro aanacha ni athu ayo ehiri Ayuda. Nave athu yaalla ephiyalle, aahiya ocha ni athu ayo ehiri Ayuda kaambiiwa awoova ayo yapaalla wi yaaphadde alliwaayo.

¹³ Ayuda amodda yahaambattho okhalla wonanko Petro nave naari Baranaba aakuseya murima ni makhallello awootthaayo.

¹⁴ Koonilleemi wi ddaweera ddiwa khaddaatthopoowa moollikana ni yawoona ya othenga waphaama, kaallota wa Petro vamiitthoni va attheenaayo wi, “Vawi weyaano Muyuda mwaneena onakhalla wonanko muthu oyo ahiri Muyuda. Vano onaawatiherella tini athu ayo ehiri Ayuda wi ekhalleke wonanko Ayuda?”

Ayuda ni athu ayo ehiri Ayuda

¹⁵ Ddawoona, hiyaano tti Ayuda ooyariwa ohiri athu oochimwa ayo ehiri Ayuda.

¹⁶ Nave ninnadduwella wi muthu analungamihiwa ni Mulluku oweella mu echikhulupililove mwa Yesu Khrisitu, ohiri vawiiwellellani malamulo. Sika nookhulupilila mwa Khrisitu Yesu wi neeriwe aphaama ni Mulluku oweella mu echikhulupililo mwa Khrisitu nave ohiri vawiiwellellani malamulo. Vawi khaavo muthu aneeriwa oolungama vawiiwellellani malamulo.

¹⁷ Vano hiyaano vaweeseesani weeriwa oolungama ni Mulluku oweella mwa Khrisitu, ninnaphwanyiwa niri oochimwa moophwanaphwana ni athu ayo ehiri Ayuda. Ddenndda ddinattaphullella wi Khrisitu sika ananeeriha wi nichimweke? Khe ddiiddo.

¹⁸ Nave kaambeella omakattho nnddo kakumullalleemi, vano kinnooniha wi miyaano kiri oochimwa.

¹⁹ Vano Miyaano kiri wonanko ookhwa ekaamba ya malamulo. Sika nginakhalla ni okumi wi kirumeyelleke malamulo koma kimurumeyelleke Mulluku. Kootthomeyiwa vamodda ni Khrisitu vamutandani,

²⁰ sika khe miyaanottho kinakhalla mukumi koma tti Khrisitu anakhalla mwa miyaano. Okumi yoolla kiriimina, kinakhalla mu echikhulupililo mwa Mwaana a Mulluku, oyo aakikondille miyaano nave avelleella okumaaye ekaamba ya miyaano.

²¹ Nginakhoota echisomo ya Mulluku. Koma muthu eeriwa oolungama ni Mulluku mwa lamulo, ddinattaphullella wi Khrisitu aakhwenlle nivuddo.