Agalatiya 1 - Mawu a Mulluku

¹ Ovenyera wa miyaano Paulo, murummwa oyo wiithaniwa waye wahivenyenre wa athu apaalle oweella wa athu koma wa Yesu Khrisitu ni Mulluku Attiitthiihu ayo yaamuvenyihalle Yesu wa ookhwa.

² Miyaano vamodda ni asinnaka ni arokoraka attheene ayo eri vaava ninnuvahani mooni. Kinuulembellani kalatoolla nyu athu a mipingo dda o Galatiya.

³ Echisomo ni murendelle dda Mulluku Attiitthiihu ni Apwiya Yesu Khrisitu ddikhalle ni nyuwaano.

⁴ Khrisitu ahiivelleella ekaamba ya machimwaahu voomwiiwellellani Mulluku, Attiitthiihu wi anoopolle ovenyera o ellapo yoonanareella.

⁵ Ntitimiho nikhalle wa Mulluku enthawi yoohimalla! Amen.

Khawiivo othenga waphaama omodda

⁶ Kinnuuttikhinani nyuwaano! Munamuhiya mwawaakuva ddiidda oyo aawiithanneni oweella mu echisomo ya Khrisitu nave munathwara othenga omodda.

⁷ Ddawoona tti ddawi khawiivo othenga waphaama omodda. Nave kinallota ddenndda kaambiiwa aakhallavo athu amodda enawaapheellihani muru nave enapaalla orukunusa othenga waphaama wa Khrisitu.

⁸ Koma naari hiyaano apaalle mungelo oovenyera oddullu nallalleya wa nyuwaano othenga waphaama woohiyana ni olle nallalleyilleehu wa nyuwaano, atembeleliwe!

⁹ Naallota yeella khalle nave vano kinallotattho wi arive muthu allalleya wa nyuwaano othenga woohiyana ni olle mwaakhenlleenyu, atembeleliwe!

¹⁰ Ethiyo voollotani ddenndda, kinapaalla wi athu ekaakhullelle? Khe ddiiddo! Eyo kinapaalleemi tti waakhullella wa Mulluku! Ethiyo kinapaalla waahakallalliha athu? Kakhanlleke awaahakallalliha athu ngaakhalle oorumeyella a Khrisitu.

Mmo Paulo aakhallelleeye murummwa

¹¹ Hankoni kuulleelleni, asinnaka ni arokoraka, othenga waphaama kinallalleyeemi khonavenyera wa athu.

¹² Ngaawakhenlle ovenyera wa arive muthu nave khaavo naari aakihuddihalle. Koma Yesu Khrisitu yeekhaaye sika uupullullalle wa miyaano.

¹³ Moolleelliwa mmo kakhallelleemi voollapellani mu Eyuda, mmo kahoosilleemi mpingo wa Mulluku moohimoriwa ethakaraka nave kaheeseesa woononga mpingooyo.

¹⁴ Voollapellani mu Eyuda, kahaakhwaranya Ayuda akhwaaka anchichi oophwanaphwanana miyakha nave kaari ookonda wunchichi ehuddiho dda makhollwaahu.

¹⁵ Koma Mulluku mu echisomwaaye aakitthoolla naari kaari kihinayariwe nave aakiithana wi kimurumeyelle. Nave enthawi eyo Mulluku apanlleeye,

¹⁶ aamuupullulla mwanaye wa miyaano wi kaallalleyelle athu ayo ehiri Ayuda othenga waphaama wa olliye. Nave ngaayiille wa arive muthu wi akilleelle ezeru.

¹⁷ Naarittho ngaayiille o Yerusalemu wi kawoone ayo yaari amurummwa miyaano kihinakhalle. Koma enthawi yeeyo kaaya o Arabiya nave ovenyera wenko kaahokollweella o Damasiko.

¹⁸ Ddiviralle miyakha miraru kaaya o Yerusalemu wi nakambirane ni Petro nave kaakhalla ni olliyooyo milungu miilli.

¹⁹ Khaavo murummwa kamoonilleemi omupatula Yakobo, mwanamunniwa a Apwiya

²⁰ Kinalembeeminndda tti ddawoona. Mulluku annadduwella wi nginoottha!

²¹ Vatulli viwa kaaya o ezigawo dda Siriya ni Silisiya.

²² Va enthawi yeeyo athu a m'mipingoni dda mu Yudeya yaari ehinakumane ni miyaano vamiitthoni ni vamiitthoni.

²³ Yiiwalle yeeyove yallotiwa ni amodda wi, “Muthu anihoosoolle vano animallalleya echikhulupililo elle apaalleeye woononga!”

²⁴ Nave yaamutitimiha Mulluku ekaamba ya miyaano.