Afilipi 4 - Mawu a Mulluku

Malangizo

¹ Sika vano, asinnaka ni arokoraka nyuwaano tti ookondiwaaka nave kohuukhallellani munkhella. Munnakihakallalliha nave kinnuukotellani. Asinnaka ni arokoraka imellani moohitikheya mu eyaattano ni Apwiya.

² Yuwodiya ni Sinteke, kinimuuvekani wi mwiiwananeke wonanko athu okhulupilila.

³ Nave weyaanottho, mukhwaaka oororomelleya, kinapaalla wi waakavihereke atthiyanaalla; vawi aallipihella ophara mutteko woovuwiha othenga waphaama ni miyaano, vamodda ni Kilementi ni allupa mutteko akhwaaka attheene, ayo manddiniiwa eri mu nibukhu na akumi.

⁴ Hakallallani mu eyaattano ni Apwiya enthawi ddittheddene! Kinallotattho yeella wi, hakallallakani!

⁵ Mooniheke omaalleya wanyu wa arive muthu. Apwiya eneeroowa naanweene vaava.

⁶ Muhikhupanyeke erive ello koma mumulleelleke Mulluku erive ello munapaalleenyu moovekella. Enthawi ddittheddene muvekeke ni murima woothokoza.

⁷ Vano murendelle wa Mulluku, wookhwaranya mmo athu eniiweseselliiwa, oneereweeriha mirima ddanyu ni maganizwaanyu ohikhupanya ekaamba ya Khrisitu Yesu.

⁸ Asinnaka ni arokoraka, voomallihella muhiyeke murimaanyu va erive ello eri yaphaama ni yoolemu. Sika ddeko ddawoona, ddoovahiwana olemu, ddaweella, ddooreera ni ddookondiwa.

⁹ Mweereke nnddo mwahuddenreenyu ni waakhella ovenyera mu mawaaka ni m'makhallellwaaka. Nave Mulluku oyo ananivaha murendelle akhalle ni nyuwaano.

Othokoza ekaamba ya emphaso

¹⁰ Apwiya yaakihakallalliha wunchichi kaambiiwa viviralle enthawi yoorekama mohaambattho okuupuwella. Nginaaka wi mwaahiya okuupuwella koma khamwaarina ekari yawi moonihe yeella.

¹¹ Nave nginallota yeella kaambiiwa kinnapaalla ello vawi Koohuddera okwakhwanihiwa ni eyo kiriimina.

¹² Kinnadduwella okhalla oohoowa navettho okhalla ni ddawaata. Koohuddera yoovittheya yeella wi virive veko, enthawi ettheene kikhalleke ookwakhwanihiwa naari kivonille apaalle kivolliwe ettalla naari kirina ddawaata apaalle ddooyeva.

¹³ Kinneera ddeko ddittheddene oyeella mu masiva ayo Khrisitu akivahilleeye.

¹⁴ Komave mwaheera phaama okikavihera va ddookatamiha ddaka.

¹⁵ Nyuwaano Afilipi munnadduwella phaama ddene wi kavenyilleemi o Masedoniya ni waamba ollalleya othenga waphaama, nyuwaanove sika mwaari mpingo mmoddave oyo wakikavihenre miyaano mu ddoopaalla ddaka.

¹⁶ Mwaakirumihella okhwaranya omodda nikavihero kapaalleemi o Tesalonika.

¹⁷ Khehiyo wi kinapaalla waakhella emphasove koma kinapaalla wi koone mwaakhellaka madaliso ekaamba ya ovaha wanyu.

¹⁸ Kookhalla ni erive ello navettho ddawaata. Kookhalla ni ddittheddene kinapaalleemi vawi Epafrodito aawaana wa miyaano emphaso ddanyu ddittheddene. Ddiri wonanko yoovelleelliwa ya nthuko naphaama, yawaakhullelliwa ni yoomuddivella Mulluku.

¹⁹ Oyeella mwa Khrisitu Yesu Mullukwaaka aneerewuuvahani ddoopaalla ddanyu ddittheddene ovenyera mu eyuumaaye yawaata.

²⁰ Ntitimiho nikhalle wa Mulluku Attiitthiihu enthawi ddoohimalla! Amen.

Ollaanya

²¹ Kinavelleella mooni wa arive muthu a Mulluku oyo ari mu eyaattano ni Khrisitu Yesu. Asinnaka ni arokoraka ayo eri ni miyaano wuno ennuuvahani mooni.

²² Athu a Mulluku attheene wuno ennuuvahani mooni, makamaka ayo enakhalla mu enyumba ya Kaisara.*

²³ Echisomo ya Apwiya Yesu Khrisitu ekhalle ni nyuwaano attheene.