Afilipi 3 - Mawu a Mulluku

Echilungamo yawoona

¹ Asinnaka ni arokoraka, voovirellellani hakallallani mu eyaattanwaanyu mwa Apwiya. Nginoonavo yookatamiha wuulembellanittho wiilli nnddo kalembilleemi khalle wi dduuddivelleni.

² Muchenjerekena ayo eneera ddeko ddoonanara wonanko anapwa, ayo enallipihella wiiremarema mwiilli

³ tti hiyaano, ohiri alliwaayo koma hiyaano sika niphaddiwe mwawoona vawi ninamullapella Mulluku mwa munepaaye nave ninnahakallalla ekaamba ya Khrisitu Yesu ohiri ekaamba yookhulupilila ddaweereya dda mwiilli.

⁴ Ddawoona, miyaano kaakhulupilila ddeko ddenndda. Vakhalla mmodda ari ni ekaamba yookhulupilila ddenndda, miyaano kookhallattho ni ekaamba ddookhwaranya ohiyana ni vaavo.

⁵ Miyaano kayariweemi kaaphaddiwa va nllapo naneetthanu ni raru. Mi tti Muisraele a nlloko na Benjamini, Muheberi ooyariwa mwa Aheberi. Moollikana ni malamulo a Ayuda, miyaano kaari Mufarisi.*

⁶ Nave kaakhalla awaakuva wunchichi voohoosani mpingo. Moollikana ni echilungamo yoophwanyeya vawiiwellellani malamulo, miyaano ngaachimwalle.

⁷ Nave ddeko ddittheddene nnddo kaddeeseemi ddoopinduliha, vano kinaddeesa ddoohipinduliha ekaamba ya Khrisitu.

⁸ Ddawoona, kinaddeesa ddittheddene ddoohipinduliha kaambiiwa omudduwella Khrisitu Yesu Apwiyaaka tti woopaalleya wunchichi okhwaranya ddittheddene. Kootathilla ddeko ddittheddene ekaamba ya olliye nave kinaddeesa ddittheddene ddooddallani wi kimupindule Khrisitu

⁹ nave wi kaattanihiwe ni olliye. Nginnattho echilungamo yaakayaaka yoovenyera mwa wiiwellallani malamulo. Koma vano kookhalla ni echilungamo yoovenyera wa Mulluku oweella mwa echikhulupililo mwa Khrisitu.

¹⁰ Kinapaalleemi tti yawi kimudduwelle Khrisitu nave masiva a ovenya waye wa ookhwa navettho kikhallena mu ddoohoosa ddaye nave kikhalle wonanko olliye mu okhwa waye,

¹¹ vootiyerani wi nameenettho kineerovenyihiwa wa ookhwa.

Othamaka ni yoolinga

¹² Nginaaka wi kohaakhella yeella khalle apaalle miyaano kookhalla khalle aphaama. Koma kinimallipihellave othamaka wi kiddiphwanye vawi ella sika yaari yoolinga ya Khrisitu Yesu vookikopani wi kikhalle aaye.

¹³ Ddawoona, asinnaka ni arokoraka, ngineesa kohaakhella khalle. Koma ello emodda kineereemi tti otiwalla ddakhalle koma oollipihella wi kaphwanye ddamuhoollo.

¹⁴ Sika kinathamaka ni yoolinga wi kathuviwe okumi wooddullu oyo Mulluku akiithanelleeye oweella mwa Khrisitu Yesu.

¹⁵ Hiyaano attheene oowaraalla m'munepani ninaphwanella okhalla ni maganizo amoddamoddave yaalla. Nave amoddanyu mwaarimi murina maganizo oohiyana, Mulluku aneerowuupullullellani yawoona.

¹⁶ Naari ddeerevedde, hankoni nivirerelle moollikana ni ehuddiho ninathwareehu ophiyera ollello.

¹⁷ Asinnaka ni arokoraka kittakihekeni miyaano. Nave woonekeni ayo enathwara echisanzo yawoona eyo nuuvahilleeyeni.

¹⁸ Kahuulleellani yeella khalle enthawi ddinchichi, vano kinnuulluulla yeella moowinlla. Athu anchichi enakhalla wonanko adani a okhwa wa Khrisitu vamutandani.

¹⁹ Yaalla eneeromallihella mu gehena kaambiiwa tti anrima nave mullukwiiwa tti erukullu ddiwa. Enakotella nnddo yaphwanenlliiwa wi ewulliwekena muru nave enaganiza dda ddeko dda va ellapo yavatthive.

²⁰ Koma hiyaano owanihu tti oddullu nave nnamutiyera oovullusaahu, Apwiya Yesu Khrisitu wi awe ovenyera wenko.

²¹ Olliye aneerotthattusa miilli ddahu ddoofookanndda nave aneeroddiphwanaphwaniha ni mwiillaaye wa ntitimiho, voopharihani masiva ayo anaworeeyena olamulella ddeko ddittheddene.