Afilipi 2 - Mawu a Mulluku

Wiiyeviha ni ottekweene wa Khrisitu

¹ Mu eyaattano ni Khrisitu munnallipihiwa murima nave echikondaaye ennavenyiha okhupanya wanyu. Mohaattanihiwa ni Munepa Waweella nave mooreera murima munnamorellana ethakaraka mmodda ni mukhwaaye.

² Kinimuuvekani wi, mukihakallallihe wunchichi vookhallani awiiwanana wonanko muthu mmodda vooganizani ni vookondani.

³ Muheereke erive ello mwawiikonda apaalle mwawiitukhulla koma mwawiiyeviha vawoonani athu amodda okhalla oopaalleya ohiyana ni nyuwaano.

⁴ Muhiweheke ddoopaalla ddaanyuve komattho ddoopaalla dda athu amodda.

⁵ Oganiza wanyu okhalleke wonanko wa Khrisitu Yesu.

⁶ Aari wonanko Mulluku, koma khaawanddeellelle wi akhalle moophwanaphwana ni Mulluku.

⁷ Koma moopaalla yeekhaaye aahiya ddittheddene aariiyena, akhalla wonanko kaporo. Aakhalla wonanko muthu nave ahooneya wonanko muthu.

⁸ Ahiiyeviha nave ahiiwellella ophiyera okhwa, okhwa waye vamutandani.

⁹ Ekaamba ya yeella Mulluku aamutitimiha wunchichi amuvaha nnddina nno ninakhwaranya nirive nnddina.

¹⁰ Sika vano, vootitimihani nnddina na Yesu ddoophatuwa ddittheddene ddooddullu, dda vatthimva ni dda vatthi va ellapo yavatthi ddineeromukokhorella.

¹¹ Nave ddittheddene ddineerewaakhullella wi, “Yesu Khrisitu tti Apwiya,” o ntitimiho na Mulluku Attiitthiihu.

Owala wonanko enyali mu ellapo yavatthi

¹² Sika vano, akhwaaka ookondiwa vawi mwaakiiwellella enthawi ettheene kaariimi ni nyuwaano, tti woopaalleya wunchichi wi mukiiwellelleke vano kiriimi woorekama ni nyuwaano. Virellellani ophara mutteko mwawoova ni mootthukumella wi mwakuthulle ovullusiwa wanyu,

¹³ kaambiiwa Mulluku anaphara mutteko mwa nyuwaano wi mupaalle nave muwore omwiiwellella.

¹⁴ Mweereke ddittheddene moohiwinya apaalle ovaanya,

¹⁵ wi mukhalle oohichimwa ni aweella wonanko anamwani a Mulluku aphaama ayo enakhalla mu ellapo ya athu oonanara ni oolleka. Munaphwanella muwaleke variyari va yaayo wonanko etheneeri ddoowala.

¹⁶ Nave wanddeellellani othenga woovaha okumi. Mwaaweeraka ddiiddo kineerokhalla ni ekaamba yawuukotellani va Nllapo na owa wa Khrisitu kaambiiwa ddineerewooniha wi muttekwaaka ni ollipihella waka ottheene woophura ello.

¹⁷ Echikhulupilwaanyu ni orumeyella wanyu tti wonanko yooheraatthiwa va mukutho. Vano naari kakhwa, nikhame naka nineerohelliwa vaddullu va mukuthwaanyu, koohakallalla vamodda ni nyuwaano attheene.

¹⁸ Emoddamoddave yeeyo nyuwaano munaphwanella muhakallallettho vamodda ni miyaano.

Timoteo ni Epafrodito

¹⁹ Apwiya yapaalla, kinatiyerella omurumiha Timoteo wa nyuwaano veneva wi killipihiwe murima ni epillaanyu.

²⁰ Tti yooyove anuupwathani mwawoona nyuwaano wonanko miyaano.

²¹ Amoddaayo attheene enallipihella ddeko ddawaaddivella weekhiiwa ohiri ddeko dda Yesu Khrisitu.

²² Koma nyuwaano munnadduwella mmo oonihalleeye oreera waye, mmo olliye ni miyaano, nipharelleehu mutteko nimodda wonanko mwaana aamullopwana ni Attiitthinnya ekaamba ya othenga waphaama.

²³ Sika kinatiyera omurumiha wa nyuwaano enthawi eyo kineereemi kidduwelle nnddo ddinaakeereyelle

²⁴ Nave kinnasimikiza mwa Apwiya wi miyaano meekhaaka kineeroowa wa nyuwaano veneva.

²⁵ Kooganiza wi tti woopaalleya wuuhokollosellani mwanamunnaka, Epafrodito, oyo aphanre mutteko ni owanana ekhoto vamodda ni miyaano nave oyo arumihiwe ni nyuwaano wi akikavihere.

²⁶ Ohuukhallellani munkhella wi awooneni nyuwaano attheene nave animakhupanya kaambiiwa mwahiiwa wi aamavoriiwa.

²⁷ Ddawoona aamavoriiwa nave aari vakhuviru okhwa. Koma Mulluku aamweerella echifundo nave ohiri va olliyeve koma ni va miyaanottho vawi aheeriha wi kihikhallena ethakaraka ddinchichi.

²⁸ Vano miyaano kinnapaallesesa wi kimurumihe wa nyuwaano wi muhakallalle wiilli mwamoona olliye nave ethakarakaaka eneeromalla.

²⁹ Mwaakhelleni yooyo, vano, moohakallalla wonanko mwanamunnihu mu eyaattano ni Apwiya. Mwaavaheke olemu athu attheene ookhalla wonanko olliye,

³⁰ kaambiiwa ahiivelleella moollipa murima nave ohalla vakhuviru okhwa ekaamba ya mutteko wa Khrisitu wi akikavihere munipuroni mwanyu.