Afilipi 1 - Mawu a Mulluku

¹ Ovenyera wa hiyaano Paulo ni Timoteo, oorumeyella a Khrisitu Yesu. Ninaalembella athu attheene a Mulluku a o Filipi ayo eri mu eyaattano ni Khrisitu Yesu, vamodda ni oohoollella ni owaakaviheriiwa mumpingoni.

² Echisomo ni murendelle ddoovenyera wa Mulluku Attiitthiihu ni Apwiya Yesu Khrisitu ddikhalle ni nyuwaano.

Nivekello na Paulo wa athu oomweerenga kalata yoolla

³ Kinnamuthokoza Mullukwaaka enthawi ddittheddene kaawuuganizerakani.

⁴ Nave enthawi ddittheddene kaawuuvekellakani, kinavekella moohakallalla,

⁵ ekaamba ya mmo mukikaviherelleenyu ovuwiha othenga waphaama ovenyera nllapo mwaambilleenyu okhulupilila ophiyera ollello.

⁶ Nave kinimasimikiza wi Mulluku, oyo aambille mutteko waphaama yoolla mwa nyuwaano, aneerovirellella ophara ophiyera akuthullalle va Nllapo na owa wa Khrisitu Yesu.

⁷ Kinnawuupuwellani enthawi ddittheddene! Nave vano nginalakwiha oganiza mwawi ddiidda dda nyuwaano attheene kaambiiwa nyuwaano munnakeerengella. Vawi nyuwaano mookikaviherana mutteko yoolla Mulluku akivahilleeye mu echisomwaaye, kiriimi mundende ni enthawi kaariimi oottaphulliwa wi koonihe ddawoona dda othenga waphaama ni owuteteza ni owuukeraatthiha moollipa.

⁸ Mulluku sika ari mbonaaka wi kinallota ddawoona kaallotaka wi munkhellaaka va nyuwaano tti woovenyera mu echikondi ya Khrisitu Yesu.

⁹ Kinavekella wi echikondaanyu evirellelle wunnuwa mwa ezeru ni wiiwesesa,

¹⁰ wi muwore otthoolla eyo eri yaphaama. Sika khamukhalla ni machimo ni yawiipiwana mullatu va Nllapo na owa wa Khrisitu.

¹¹ Nave makhallellwaanyu ekhalleke oolungama oweella mwa Yesu Khrisitu wi Mulluku atitimihiwe.

Okhalla ni okumi tti omurumeyella Khrisitu

¹² Asinnaka ni arokoraka, kinapaalla mudduwelle wi ddeko ddeereye wa miyaano ddookavihera ovuwiha othenga waphaama.

¹³ Vawi, oowehera a Eroma ni athu amodda attheene wuno ennadduwella wi miyaano kiri mundende kaambiiwa kinamurumeyella Khrisitu.

¹⁴ Nave okhalla waka mundende wooweeriha asinnaka ni arokoraka anchichi ollipa murima wunchichi mu eyaattano ni Apwiya, sika enthawi ni enthawi ennallalleya othenga waphaama moohoova.

¹⁵ Aakhallavo amodda enamullalleya Khrisitu kaambiiwa tti eehache ni ookangana koma amodda enallalleya ni yoolinga yaphaama,

¹⁶ nave enneera ddiidda ovenyera mu echikondi kaambiiwa ennadduwella wi Mulluku aakitthoolla oteteza othenga waphaama.

¹⁷ Amoddaalle khenamullalleya Khrisitu mwawoona koma ekaamba ya wiikonda. Enaganiza wi kineerohoosiwa kiriimi mundende.

¹⁸ Khaddinna mutteko ddennddo! Kinnahakallalla wi Khrisitu annallalleyiwa mu ettilla ddoohiyanahiyana naari mwawoona apaalle mwawoottha. Nave kineerovirellella ohakallalla,

¹⁹ kaambiiwa kinnadduwella wi kineerottaphulliwa ekaamba ya mavekellwaanyu ni nikavihero noovenyera wa Munepa wa Yesu Khrisitu.

²⁰ Ni murimaaka muttheene kinnatiyera nave kinnapaalla wi miyaano kihilephele muttekwaaka muttheene. Koma enthawi ettheene, makamaka vano kikhalle oollipa murima wi kimutitimihe Khrisitu ni mwiillaaka muttheene naari kikhwille apaalle kiri mukumi.

²¹ Wa miyaano okhalla ni okumi tti omurumeyella Khrisitu. Nave wa miyaano okhwa tti opindula.

²² Nave kavirellella okhalla ni okumi kineerowora ophara mutteko woopaalleya wunchichi nave nginadduwella eyo kinaatthoolleemi.

²³ Kinnasimwella yaweera. Kinnapaalla wunchichi okhwa wi kakhalle ni Khrisitu oyo ari ello yaphaama wunchichi.

²⁴ Nave tti woopaalleya wi kikhalleve mukumi ekaamba ya nyuwaano.

²⁵ Kinimasimikizella yeella nave kinnadduwella wi kineerokhallawove. Kineerovirellella okhallave ni nyuwaano attheene, waanjerera opambana wanyu ni ehakallallwaanyu mu echikhulupililo,

²⁶ wi kakhallattho ni nyuwaano wiilli, muneeromukotella Khrisitu Yesu ekaamba ya ottaphulliwa waka.

²⁷ Vano yoopaalleya tti yawi mukhalleke moollikana ni othenga wa Khrisitu. Sika naari kiwe apaalle kihiwe wi kiwooneni kineerewiiwa wi mohiimella moohitikheya moowiiwanana moophara mutteko moollipa nimodda ekaamba ya echikhulupililo mu othenga waphaama.

²⁸ Muhiwooveke adanaanyu mu erive ello vawi yeella eneerewaasimikizella wi eneerewoonongiwa nave nyuwaano muneerovulluwa kaambiiwa Mulluku sika anuuvulluseni.

²⁹ Vawi moovahiwa ekari ohiri vookhulupililanive mwa olliye komattho ohoowa ekaamba ya olliye.

³⁰ Vano nanyeene munawana ekhoto emoddamoddave yeeyo mwakoonilleenyu kiwanaka khalle navettho tti yeeyo muniiweenyu wi kinimavirellellave owana.