Aefeso 6 - Mawu a Mulluku

Anamwani ni makhollo

¹ Anamwaninyu vawi muri mu eyaattano ni Apwiya, muwiiwellellekettho makhollwaanyu. Yeella tti ello yoophwanella weera.

^2-3 Vawi, “waavaheke olemu attiittho ni amaayo wi ddeko ddiweetelleke phaama nave okhalle ni okumi wawaata vatthimva.” Nna sika lamulo nawaamba nookhalla ni lonjezano nawaanjerera.

⁴ Nyu attiitthi, muhaashiheke murima aniinyu. Koma mwaallelleke phaama vawaahuddihani makhallello ni ehuddiho ya Apwiya.

Akaporo ni apwiiwa

⁵ Akaporonyu, muwiiwellelleke apwiinyu a va ellapo yavatthi moovelleella olemu wunchichi. Nave mweereke ddiiddo ni murimaanyu muttheene, wonanko munamurumeyella Khrisitu.

⁶ Muheereke ddiiddo yaawonakanive kaambiiwa munapaalla mwaahakallallihe koma mweereke yoopaalla ya Mulluku ni murimaanyu muttheene wonanko akaporo a Khrisitu.

⁷ Muphareke muttekwaanyu moohakallalla, wonanko munarumeyella Apwiya nave ohiri athu shisha.

⁸ Munnadduwella wi Apwiya eneeromuthuva arive muthu va muttekwaaye waphaama naari kaporo apaalle ahiri kaporo.

⁹ Nave Apwiya nyu, mukhallekena phaama akaporwaanyu nave muhiye owoopopiha. Munnadduwella wi nyuwaano vamodda ni akaporwaanyu mookhalla ni Apwiya amodda oddullu, ayo anamweeruza arive muthu moohiweha ekhove.

Ddoowara ddawiitetezella vakhotoni ddoovahiwa ni Mulluku

¹⁰ Voomallihani, mwiillipiheke mu eyaattano ni Apwiya ni masiviiwa uullupalli.

¹¹ Muware ddoowara ddawiitetezella vakhotoni munavahiweenyu ni Mulluku wi muwore wiiteteza o endale dda Satana.

¹² Vawi khaninawana ni athu koma ninawana ni minepa ddoonanara, oolamulella ni masiva a epiphi ddooddullu.

¹³ Sika vano muware ddoowara ddawiitetezella ddittheddene nnddo muvahiweenyu ni Mulluku! Nllapo noonanara naphiya, muneerowora wiiteteza wa mudani nave mwamalliha owana, mukhallave oollipa.

¹⁴ Sika vano imellani mookhozeka ni yawoona wonanko laamba oomakelliwa moollipa muyuununi mwanyu nave echilungamo wonanko yoowara yawiitetezella ekhakaddaanyu,

¹⁵ nave okhozeka wanyu voollalleyani othenga waphaama wa murendelle wonanko esapato ddanyu.

¹⁶ Enthawi ddittheddene mukhalleke ni echikhulupililo wonanko echishango wi muwore othiimiha mipaamba ddookhara ddoovokhiwa ni Oonanarooyo.

¹⁷ Nave mwaakhelle ovullusa wonanko echipewa yawiitetezella omuruni nave mawu a Mulluku wonanko nsupada munavahiweenyu ni Munepa.

¹⁸ Mweereke ddenndda mu nivekello. Muvekelleke va ddirive ddaweereya, moohoollelliwa ni Munepa. Mukhalleke oowehera nave muvekelleke moohihiyerera, mwaavekellellekettho athu a Mulluku enthawi ettheene.

¹⁹ Nave mukivekellellekettho miyaano wi Mulluku akivahe othenga kaallalleyaka wi killoteke moollipa murima nave wi yookhuweya ya othenga waphaama edduwelliwe.

²⁰ Ekaamba ya othenga yoolla miyaano tti kazembe naari vano kiri mundende. Vekellani wi killoteke moollipa murima dda othenga yoolla wonanko mmo kinaphwanellelleemi.

Ollaanya

²¹ Tikiko mwanamunnihu ookondiwa ni oorumeyella oororomelleya m'muttekoni wa Apwiya, aneerewuulleellani ddittheddene dda miyaano wi mudduwelle eyo kineereemi.

²² Ella sika ekaambiiwa kinamurumiheemi wa nyuwaano wi uulleelleni eyo nineereehu attheene ni wuullipihani murima.

²³ Asinnaka ni arokoraka, murendelle, echikondi ni echikhulupililo ddoovenyera wa Mulluku Attiitthiihu ni Apwiya Yesu Khrisitu ddikhalle ni nyuwaano.

²⁴ Echisomo ekhalle ni attheene ayo enaakonda Apwiihu Yesu Khrisitu ni echikondi yoohisintheya.