Aefeso 5 - Mawu a Mulluku

Okhalla mu owala

¹ Vawi nyuwaano tti anamwani ookondiwa a Mulluku, munaphwanella okhalla wonanko olliye.

² Sika okumaanyu olamulliweke ni echikondi, wonanko mmo Khrisitu ananikondelleeye nave aaheraatthi okumaaye ekaamba ya hiyaano wonanko ya nthuko naphaama yooheraatthiwa ni mukutho woomuhakallalliha Mulluku.

³ Vawi nyuwaano tti athu a Mulluku, khe waphaama wi oraruwa apaalle yooripiha apaalle nrima ddillotiweke variyari vanyu.

⁴ Navettho khe waphaama wi mulloteke ddoollava, dda etthiru apaalle woopa miyaha dda oraruwa koma munaphwanella mumuthokozeke Mulluku.

⁵ Vawi mudduwelle wi khaavo muthu ooraruwa, aweera yooripiha apaalle anrima (vawi nrima niri wonanko ollapella mafano) anaakhellena omwene wa Khrisitu ni wa Mulluku.

⁶ Ahikhallevo muthu anaawukarangeyiheni ni mawu oolleka kaambiiwa ddeko ddenndda ddinnawiiha owalli wa Mulluku va ayo ehinamwiiwellella.

⁷ Sika muhiiwananekena athu yaayo.

⁸ Khalle mwaari mwiipiphini koma vawi mootthattusiwa athu a Apwiya, muri mu owala. Sika munaphwanella mukhalleke wonanko athu a mu owala,

⁹ vawi owala sika oneeriha ddaphaama, echilungamo ni yawoona.

¹⁰ Mweeseeseke odduwella ddinaahakallalliha Apwiya.

¹¹ Muhiiwananekena ddeko ddoohikhalla ni mutteko ddeko dda mwiipiphini koma muweena vaweella.

¹² (Tti ddoowulliha muru ollota ddeko ddineereya mwiipiphini.)

¹³ Nave ddeko ddittheddene ddinuupullulleya phaama ddakuselliwa vaweella.

¹⁴ Vawi erive ello enuupullulliwa phaama ennakhalla mu owala. Ella sika ekaambiiwa onallotiwa wi, “Venya, mullupa ookona, nave venya wa ookhwa, nave Khrisitu aneerewuumolleella.”

¹⁵ Sika muchenjereke ni makhallellwaanyu. Muhikhalleke wonanko athu oohidduwella koma mukhalleke wonanko athu eezeru

¹⁶ Muphariheke mutteko enthawaanyu vaweerani ddaphaama kaambiiwa alla tti mallapo oonanara.

¹⁷ Sika muhikhalle ookarangeya koma mweeseese wiiwesesa nnddo Apwiya enapaalliiwa wi mweere.

¹⁸ Muhilezeleke ni vinyo kaambiiwa olezela onneeriha ddeko ddoonanara koma muhoollelliwe ni Munepa Waweella.

¹⁹ Mwatthukumana vamodda mwiipeke masalimo, machipo a Mulluku ni machipo a munepa. Ni murimaanyu muttheene muwiipelleke ni waatitimiha Apwiya.

²⁰ Mumuthokozeke Mulluku Attiitthiihu enthawi ddittheddene ni ekaamba ya ddittheddene mu nnddina na Apwiihu Yesu Khrisitu.

Atthiyana ni allopwana mu nibanja

²¹ Mwiiwellellaneke mmodda ni mukhwaaye ekaamba ya omoova wanyu Khrisitu.

²² Atthiyananyu, mwaavaheke olemu amamuninyu wonanko mmo munawiiwellelleenyu Apwiya.

²³ Vawi mullopwana tti muru wa mwaariye wonanko mmo Khrisitu ariiye muru wa mpingo, mwiillaaye oyo awuvullunseeye.

²⁴ Sika vano atthiyana ewiiwellelleke amamuniwa mu ddeko ddittheddene wonanko mmo mpingo onamwiiwellelliiwa Khrisitu.

²⁵ Allopwananyu, mwaakondeke awarinyu wonanko mmo Khrisitu aakondelleeye mpingo nave aavelleella okumaaye ekaamba ya mpingooyo.

²⁶ Enre ddenndda wi eellihe mpingooyo voohuwani ni maaddi vamoddattho ni mawu

²⁷ wi iivahe yeekhaaye mpingo wookhalla ni ntitimiho, waweella ni woohikhalla ni yoonanara, woohikhalla ni nipamba apaalle mahoonya apaalle erive ello yoohikhalla phaama.

²⁸ Allopwana enaphwanella yaakondeke amwaariwa wonanko mmo enakondelliiwa miilli ddiwa. Mullopwana oyo anamukonda mwaariye, aniikonda yeekhaaye.

²⁹ Athu kheniitana ni miilli ddiwa koma ennachiha miillinnddo ni owehera, wonanko mmo Khrisitu aneerelleeye mpingo,

³⁰ vawi hiyaano tti eziwalo dda mwiillaaye.

³¹ Mawu a Mulluku enallota wi, “Ekaamba ya yeella mullopwana aneerekewaahiya Attiitthinnya ni amennya aya atthella nave eellaayo eneerokhalla mwiilli mmodda.”

³² Mawu a Mulluku yaalla enuupullulla yoovittheya yuullupalli nave enallota dda Khrisitu ni mpingo.

³³ Nave enallotattho dda nyuwaano wi arive mullopwana anaphwanella amukondeke mwaariye wonanko mmo aniikondelleeye yeekhaaye navettho arive mutthiyana anaphwanella amuvaheke olemu mamune.