Aefeso 4 - Mawu a Mulluku

Okhalla mwiilli mmodda

¹ Vano kinimuuvekani nyuwaano, miyaano a mundende kaambiiwa kinaarumeyella Apwiya wi mweeteke moophwanellella wiithaniwa nko Mulluku aawiithannenyuni.

² Enthawi ddittheddene mukhalleke oomaalleya, awiiyeviha ni oovillella. Mooniheke echikondaanyu voollevana.

³ Mweeseeseke osunga omoddoolla oyo onavahiwa ni Munepa oyeella mwamurendelle oyo waattaniha vamodda.

⁴ Vookhalla mwiilli mmodda ni Munepa mmodda, wonankottho mmo mwavaheriweenyu otiyera omodda mvo Mulluku aawiithanilleeyeni.

⁵ Vookhalla Apwiya amodda, echikhulupililo emodda, obatiziwa omodda,

⁶ vookhalla Mulluku mmodda ni Attiitthiiwa a athu attheene, oyo tti Apwiya a athu attheene, anaphara mutteko oweella mwa attheene nave ari mwa attheene.

⁷ Arive muthu a hiyaano ahaakhella emphaso yaayeyaaye moollikana ni mmo Khrisitu avelleelleeye.

⁸ Moollikana ni mawu a Mulluku awi, “Awenlleeye oddullu, ahaaphara athu anchichi monga amundende, ahaavaha athu emphaso.”

⁹ Vano mawu awi, “aawella” enattaphullella tini? Enattaphullella wi vawaamba aakittha ohito woowallamella wa ellapo.

¹⁰ Sika oyo aakitthalle tti mmoddave yooyottho aawenlle vaddullu okhwaranya eddullu wi addalle erimu ettheene.

¹¹ Tti oyo aavahille emphaso. Ahaatthoolla amodda wi ekhalle amurummwa, amodda ekhalle anamallotella, amodda ekhalle oollalleya, amodda ekhalle abusa ni ahuddihi.

¹² Enre ddenndda wi athu a Mulluku ekhozekelle mutteko woomurumeyella Khrisitu wi ellipihe mwiilli wa Khrisitooyo,

¹³ ophiyera attheene nineerewaattanihiwa vamodda mu echikhulupilwaahu ni mu omudduwella wahu Mwaana a Mulluku. Vano nineerokhalla athu oowaraalla ni ophiyera va wunnuwa ottheene wa Khrisitu.

¹⁴ Neera ddiiddo khanikhallattho wonanko anamwani ookusiwa ni mafunde ni oovavihiwa ni ephevo yooyeella nngu ni nngu ya ddoohuddiha dda athu awoottha, ayo enaahollosa amodda vawallekani.

¹⁵ Voollotani yawoona mwa munepa wa echikondi, ninaphwanella wunnuwa mu ddeko ddittheddene mwa Khrisitu, oyo ari muru.

¹⁶ Ovenyera mwa muroolla, mwiilli muttheene onnamakellelliwa nimodda nave onallipihiwa ni mookumanella eziwalo. Sika erive echiwalo yaphara mutteko moophwanellella, mwiilli muttheene onunnuwa ni wiillipiha oweella mu echikondi.

Okumi wanaanweene mwa Khrisitu

¹⁷ Vano mu nnddina na Apwiya, kinimuuchenjezani wi muhivirellelle okhalla wonanko athu oohimullapella Mulluku, ookhalla ni maganizo ohikhalla ni mutteko.

¹⁸ Ezeru ddiwa ddooripihiwa nave kheyaakhellana okumi oyo Mulluku anavaheeye vawi alliwaayo tti oohidduwella navettho tti awummiha murima.

¹⁹ Khenawulliwattho muru yahiivelleella weekhiiwa o ddoonanara wi yeereke machimo oohiyanahiyana moohiivaanya.

²⁰ Khe yeeyo mwahuddenreenyu dda Khrisitu!

²¹ Mwahiiwa dda olliye nave nyuwaano vookhallani oomuthwaraaye mwaahuddihiwa dda yawoona eyo eri mwa Yesu.

²² Sika muhiye makhallellwaanyu akhalle ayo yaweerihalleni wi mukhalleke mwawi ddiiddo, makhallellwaanyu akhalle ayo yuntihiwe ni minkhella ddoolleka.

²³ Mirima ddanyu ni maganizwaanyu ddinaphwanella wi dditthattusiwe ddanaanweene.

²⁴ Nave munaphwanella muware makhallello anaanweene, ayo enaphatusiwa moophwanaphwana ni Mulluku nave makhallellwaalla enuupullulleya oyeella vawoonihellani okumi wa echilungamo ni waweella.

²⁵ Vano muhiye woottha! Arive muthu a nyuwaano anaphwanella alloteke ddawoona ni mukhwaaye kaambiiwa hiyaano vamodda niri eziwalo dda mwiilli wa Khrisitu.

²⁶ Mwasha murima, osha murima wanyunko ohuuchimwiheni nave nndduwa nihivollowe muri oosha murima.

²⁷ Muhimuvahe Satana ekari yawi uuchimwiheni.

²⁸ Ayo yaari allupaawiiya enaphwanella ehiye wiiyanko nave yaambe ophara mutteko wi yiiphwanyelleke eyuuma mwaphaama wi eworeke waavaha athu oohoowa.

²⁹ Muwano mwanyu muhikhumeke mawu oonanara koma mawu aphaamave wi mwaallipiheke athu amodda oopaalleya ollipihiwa. Sika wi mawaanyu ekhalleke aphaama wa athu awiiwa mawaayo.

³⁰ Nave muhikhupanyiheke Munepa Waweella vawi Munepooyo tti echizindikiro yawi nyuwaano tti aaye a Mulluku, osimikiza wi nllapo nineerokwakhwana nawi Mulluku aneerewuuttaphullani.

³¹ Hiyani ollutuwa, osimwa, osha murima, ohumullullana, ollotellana epewe apaalle wiitana orive ottheene.

³² Nave mweerellaneke echifundo ni oreerellana murima navettho mukhululukellaneke wonanko mmo Mulluku uukhululukelleeyeni oweella mwa Khrisitu.