Aefeso 3 - Mawu a Mulluku

Mutteko wa Paulo va athu ayo ehiri Ayuda

¹ Ekaamba ya yeella, miyaano Paulo a mundende ekaamba ya Khrisitu Yesu, kinuuvekellelleemini wa Mulluku nyuwaano athu ayo ehiri Ayuda.

² Ddawoona mohiiwa wi Mulluku ookivaha mutteko wi kikawe echisomo akivahilleeye ekaamba ya nyuwaano.

³ Mulluku ahuupullulla yoolingaaye yoovittheya. Koolemba dda yeella mookhuveyiha,

⁴ nave mweerenga nnddo kilembelleemi, muneerodduwella dda wiiwesesa waka wa yoovittheya ya Khrisitu.

⁵ Khalle yoovittheya yeella kheyaadduwellihiwe wa athu koma vano Mulluku ohuupullulla wa amurummwa ni anamallotellaaye aweella oweella mwa Munepa.

⁶ Yoovittheyeeyo tti yawi mwa othenga waphaama athu ayo ehiri Ayuda ni Ayuda eneerewaakhellana madaliso a Mulluku, yaayo tti mwiilli mmodda nave ennattakanyiherana mu lonjezo nno Mulluku ennreeye oweella mwa Khrisitu Yesu.

⁷ Kaheeriwa oorumeyella othenga waphaama moollikana ni emphaso ya echisomo ya Mulluku, aakivahilleeye oweella mwa mutteko wa masivaaye mwa miyaano.

⁸ Mi tti mung'onong'ono wunchichi waakhwaranya athu attheene a Mulluku. Naari ddiri ddiiddo, Mulluku aakivaha mutteko yoolla wi killalleye wa athu ayo ehiri Ayuda othenga waphaama wa dda waata wa eyuuma ya Khrisitu,

⁹ nave owoonihella athu attheene mmo yoolinga yoovittheya ya Mulluku eneeriiwa yeereyelle. Mulluku oyo tti oophatusa ddeko ddittheddene aakhuwa yoovittheyaaye enthawi ettheene yakhalle,

¹⁰ wi va enthawi yeella, oweella mu mpingo, oolamulella ni masiva ooddullu edduwelle dda ezeru ddaye ddoohiyanahiyana.

¹¹ Mulluku aheera ddenndda moollikana ni yoolinga yakhallekhalle eerilleeye mwa Khrisitu Yesu Apwiihu.

¹² Mu eyaattano ni Khrisitu ni oyeella mu echikhulupilwaahu mwa olliye, ninnallipa murima oya vamiitthoni va Mulluku moohikayikella.

¹³ Vano kinimuuvekani wi muhikhupanyeke kaahoosiwaka ekaamba ya nyuwaano vawi tti woopinduliha wa nyuwaano.

Echikondi ya Khrisitu

¹⁴ Ekaamba ya yeella kinnaakokhorella Attiitthaaka,

¹⁵ nko onavenyera okumi wawoona wa arive muthu a o ellapo yooddullu ni yavattheella.

¹⁶ Kinamuveka Mulluku wi ovenyera mwa waata wa ntitimiho naye, uuvaheni masiva oweella m'Munepanaaye wi mukhalle oollipa mu echikhulupilwaanyu.

¹⁷ Nave kinaveka wi Khrisitu akhalle m'murimani mwanyu oyeella mu echikhulupililo. Kinavekella wi mutthipelle misisi ni ollipa mu echikondi,

¹⁸ wi nyuwaano vamodda ni athu attheene a Mulluku muwore wiiwesesa oramballalla ni orekama navettho owella ni owallamella wa echikondi ya Khrisitu.

¹⁹ Ddawoona, kinavekella wi mudduwelle echikondi ya Khrisitu naari khonaworeya odduwellesesa wi muddalliwe ni okumi muttheene wa Mulluku.

²⁰ Vano wa oyo anaphara mutteko mwa hiyaano mwa masivaaye, oyo anawora weera wunchichi ohiyana ni ninavekeehu apaalle ninaganizeehu,

²¹ wa olliye okhalle ntitimiho mu mpingo ni mwa Khrisitu Yesu enthawi ddittheddene, ophiyera enthawi ddoohimalla. Amen.