Aefeso 2 - Mawu a Mulluku

Okhalla ni okumi wanaanweene

¹ Khalle nyuwaano mwaari ookhwa m'munepani ekaamba ya ohiiwellella wanyu ni machimwaanyu.

² Va enthawi yeeyo mwaanathwara ettilla ddoonanara dda va ellapweella. Nave mwaanamwiiwellella oolamulella a minepa ddittheddene ddoonanara ddamuddullu, munepa oyo onalamulella athu oohimwiiwellella Mulluku.

³ Hiyaano attheene naari wonanko yaayo nave naaniiwellella minkhella dda omuthwaahu, weera ddoopaalla ddittheddene dda miilli ddahu ni maganizwaahu. Kaambiiwa hiyaano niri wonanko arive muthu, naaphwanella ohoosiwa ni osha murima wa Mulluku.

⁴ Koma echifundo ya Mulluku tti yawaata nave echikondaaye va hiyaano tti yuullupalli,

⁵ vawi naariihu ookhwa m'munepani voohiiwellellani aanivenyiha vamodda ni Khrisitu. Echisomo ya Mulluku sika yuuvullusalleni.

⁶ Mu eyaattanwaahu ni Khrisitu Yesu Mulluku aanivenyiha navettho anivaha nipuro oddullu vamodda ni Yesooyo.

⁷ Enre ddenndda wi oonihe opambana wawunnuwa wa echisomwaaye enthawi ettheene ya muhoollo mu echikondi ananooniheeye mwa Khrisitu Yesu.

⁸ Vawi mwaavullusiwa ekaamba ya echisomo oweella mu echikhulupililo. Khehiyo ekaamba ya ollipihella wanyu koma tti emphaso ya Mulluku.

⁹ Muthu khanavullusiwa ekaamba ya mitteko ddaye woova wi anaakoteke.

¹⁰ Vawi Mulluku aaneera mwawi ddiidda nave mu eyaattano ni Khrisitu Yesu aaniphatusa wi neereke ddaphaama mu okumaahu, nnddo aakhozilleeye moovallallella.

Omodda mwa Khrisitu

¹¹ Nyu athu ayo ehiri Ayuda, ooromolliwa ni Ayuda wi, “Oohiphaddiwa”, Ayuda ayo eniiromolla weekhiiwa wi, “Oophaddiwa”, upuwellani mmo mwakhallelleenyu khalle.

¹² Va enthawi yeeyo khamwaarina Khrisitu. Mwaari alleto nave khamwaari mmodda a athu ootthoolliwa a Mulluku. Nyuwaano khamwaapwesereriwemo mu echipangano eyo yaalonjeziwe ni Mulluku wa athwaaye. Nave mwaakhalla mu ellapo yavattheella muhinna otiyera navettho muhinna Mulluku.

¹³ Koma vano, mu eyaattano ni Khrisitu Yesu, nyuwaano ayo mwaari voorekamella ni nikhame na Khrisitu mookuselliwa vakhuviru.

¹⁴ Vawi Khrisitu sika murendellaahu ahaapweserera Ayuda ni athu ayo ehiri Ayuda wi ekhalle athu amodda. Voovelleellani mwiillaaye aakumulla esiri eyo yawiitanihalle alliwaayo.

¹⁵ Aheeriha malamulo mattheene a Mose wi ehikhalle ni mutteko ni wi aphatuse mulloko mmodda wanaanweene ovenyera m'millokoni miillinndde mu eyaattano ni olliyooyo wi vikhalle murendelle.

¹⁶ Okhwa wa Khrisitu vamutandani waamalliha wiitana wiwa. Mutanda wahaattaniha milloko miillinndde okhalla wonanko mwiilli mmodda ni waahokollosella attheene wa Mulluku.

¹⁷ Sika Khrisitu aawa allalleya othenga waphaama wa murendelle wa attheene, wa nyuwaano athu ayo ehiri Ayuda oorekamellana ni Mulluku nave wa Ayuda yaatamanne ni olliyooyo.

¹⁸ Vawi oweella mwa Khrisitu hiyaano attheene, Ayuda ni athu ayo ehiri Ayuda ninnawora owa wa Attiitthiihu mu Munepa Waweella mmoddamoddave.

¹⁹ Sika vano nyuwaano athu ayo ehiri Ayuda khamuhiyottho alleto apaalle athu oovenyera waamodda wene. Nyuwaano tti amodda ni athu a Mulluku navettho nyuwaano tti a nibanja na Mulluku.

²⁰ Nyuwaano moomakiwattho va matthipello a amurummwa ni a anamallotella, ayo Khrisitu Yesu ariiye nlluku noopalleeya wunchichi.

²¹ Olliye sika anatukhulla enyumba ettheene vamodda nave anneeriha wi yinnuwe ekhalle enyumba ya yaweella yoovelleelliwa wa Apwiya.

²² Mu eyaattano ni Khrisitu nanyeenettho munimamakiwa vamodda ni amodda attheenaayo wi mukhalle nipuro nookhallamo Mulluku oweella mwa munepaaye.