Aefeso 1 - Mawu a Mulluku

¹ Ovenyera wa miyaano Paulo, murummwa a Khrisitu Yesu mu opaalla wa Mulluku. Kinalembella wa athu a Mulluku o Efeso ookhulupilila ni ayo eri mu eyaattano ni Yesu Khrisitu.

² Echisomo ni murendelle ddoovenyera wa Mulluku Attiitthiihu ni wa Apwiya Yesu Khrisitu ddikhalle ni nyuwaano.

Madaliso a Munepa mwa Khrisitu

³ Hankoni nimuthokoze Mulluku, Attiitthiiwa a Apwiihu Yesu Khrisitu! Vawi mu eyaattanweehu ni Khrisitu oonidalisa voonivahani ovenyera oddullu erive madaliso a Munepa.

⁴ Mulluku ahinaphatuse ellapo yavatthi, aari anitthoonlle khalle oweella mu eyaattanwaahu ni Khrisitu wi nikhalle aweella ni oohichimwa vamiitthoni vaye. Ekaamba ya echikondaaye,

⁵ Mulluku aari aganizalle khalle wi oweella mwa Yesu Khrisitu aneere hiyaano nikhalle anaaye. Ella sika yaari yoopaallaaye yaphaama.

⁶ Mulluku aheera ddenndda wi nititimihe echisomwaaye yoovahiwa wa hiyaano oweella mwa mwanaye ookondiwa.

⁷ Vawi noottaphulliwa ni nikhame na Khrisitu. Machimwaahu aakhululukiwa ekaamba ya waata wa echisomwaaye. Echifundo ya Mulluku tti yuullupalli,

⁸ eyo anivahilleeye mwawaata ddiidda! Mu ezeru ddaye ddittheddene nave wiiwesesa waye,

⁹ Mulluku aheera yoolinga eyo apaalleeye weera nave aanilleella yoolinga yoovittheya eyo aganizalleeye wi amallihe mwa Khrisitu.

¹⁰ Enthawi yakwakhwana Mulluku aneerokwakhwaniha yoolinga yeella, vootthukumanihani ddoophatusiwa ddittheddene vamodda, erive ello va ellapo yavatthi ni oddullu, vatthi va oolamulella muullupalli, Khrisitu.

¹¹ Ddeko ddittheddene ddineereya moollikana ni yoolinga ni opaalla wa Mulluku. Nave mulluku aanitthoolla hiyaano wi nikhalle athwaaye mu eyaattano ya Khrisitu ekaamba ya yoolingaaye moollikana ni eyo aaganizalleeye ovenyera vawaamba.

¹² Sika eerille ddiidda wi hiyaano naari awaamba otiyerella mwa Khrisitu, nitetheella nave nititimihe ottekweene wa Mulluku!

¹³ Nave mwaakhulupilila mwa Khrisitu mwiiwalleenyu othenga wawoona, othenga wa ovullusiwa wanyu. Nave Mulluku ahuuvahani Munepa Waweella alonjezilleeye wi ekhalle echizindikiro yawi nyuwaano tti aaye.

¹⁴ Munepa yoolla tti echikole ya madaliso ayo Mulluku aanilonjezilleeye wi nineerovullusiwa. Ottekweenaaye otitimihiwe!

¹⁵ Sika waambeella mvo kiiwalleemi dda echikhulupilwaanyu mwa Apwiya Yesu ni echikondaanyu wa athu a Mulluku attheene.

¹⁶ Nginahiya omuthokoza Mulluku ekaamba ya nyuwaano. Kinnawuupuwellani m'mavekelloni

¹⁷ ni omuveka Mulluku a Apwiihu Yesu Khrisitu, Attiitthiihu antitimiho wi uuvaheni Munepa oyo onuuvaheni ezeru yoomuupullulla Mulluku wa nyuwaano wi mumudduwelle.

¹⁸ Kinaveka wi miitthwaanyu ehulleye wi moone owala wi mudduwelle yootiyera eyo awiithanelleeyeni nave waata wa madaliso ootitimiheya ayo athwaaye enaawaakhelliiwa,

¹⁹ nave opambana wa wunnuwa wa masivaaye onaphara mutteko mwa hiyaano oomukhulupilila. Masiva yaalla enaphwanaphwana ni masiva muullupallaalle

²⁰ ayo aapharihalleeye mutteko voomuvenyihani Khrisitu wa ookhwa nave amukeraatthiha o nnattanatta oddullu.

²¹ Khrisitu ohaakhwaranya oolamulella attheene, masiva mattheene ni manddina mattheene ooddullu mu enthawi yeella ni yamuhoollo.

²² Mulluku aahiya ddeko ddittheddene m'mattani mwa Khrisitu nave aamweeriha wi akhalle muru a ddeko ddittheddene wi apindulelle mpingo.

²³ Mpingo tti mwiilli wa Khrisitu, wooddalliwa ni olliye oyo anakwakhwaniha ddeko ddittheddene mwa arive muthu.