3 Yohane 1 - Mawu a Mulluku

¹ Ovenyera wa miyaano muttekweene. Kinamulembella Gayo ookondiwaaka, oyo kinamukondeemi mwawoona.

² Mukhwaaka ookondiwa, kinnavekella wi erive ello eweetelleke phaama navettho wi mwiillaawo okhalleke woollipa wonanko mmo okhallelle munepaawo.

³ Miyaano kaahakallalla ni murimaaka muttheene ookhulupilila akhwaaka yaphiyalliiwa evelleella omboni dda ororomelleya wawo voothwarani yawoona.

⁴ Khayiivo enakihakallalliha ohiyana ni wiiwa wi anaaka ennathwara yawoona.

Oriihiwa wa Gayo

⁵ Mukhwaaka ookondiwa, onnaroromelleya vawaakaviherani ookhulupilila akhwaawo naari amodda mwa alliwaayo eri alleto.

⁶ Yaavelleella omboni dda echikondaawo o mpingo. Ddineerokhalla phaama waakavihera mu ettilla yoomuhakallalliha Mulluku wi evirellelle olendwiiwa.

⁷ Vawi yaatimulla olendwiiwa ekaamba ya nnddina na Khrisitu ehaakhullenlle nikavihero ovenyera wa athu oohikhulupilila.

⁸ Sika, hiyaano ookhulupilila ninaphwanella waakavihera athu yaalla wi niphareke mutteko nimodda voovuwihani yawoona.

Diotrefe ni Demetrio

⁹ Kaawulembella mpingo kalata koma Diotrefe oyo anapaalla okhalla oohoollelliiwa, khaniiwellella kinalloteemi.

¹⁰ Sika miyaano kawa kineeromuupusa mitteko aneereeye. Olliye annakillotella ddoonanara. Nave ddenndda khaddinamukwakhwanella, olliyettho khanawaakhella ookhulupilila akhwiihu yawa. Navettho annaahiiha ayo enapaalla owaakhella ookhulupilila akhwiihwaayo ni waachosa mumpingoni.

¹¹ Mukhwaaka ookondiwa, ohittakihere eyo eri yoonanara koma ottakihere eyo eri yaphaama. Oyo aneera ddaphaama tti oovenyera wa Mulluku koma oyo aneera yoonanara khaamoonille Mulluku.

¹² Arive muthu annavelleella omboni waphaama wa Demetrio naari yawooneeyo tti mboni. Naheenettho ninnavelleella ombonaahu nave munnadduwella wi ninalloteehu tti ddawoona.

Omalliha

¹³ Kookhalla ni ddeko ddinchichi ddawi kuulleelle koma nginapaalla olemba mu kalata yoolla.

¹⁴ Kinnatiyera owoona veneva nave vano nineerokambirana vamiitthoni ni vamiitthoni.

¹⁵ Murendelle okhalle ni weyaano. Akhwaawo attheene eni mooni. Ovelleelle mooni wa akhwiihu attheene arive muthu vayeekhaaye.