2 Yohane 1 - Mawu a Mulluku

¹ Ovenyera wa miyaano muttekweene. Kinamulembella mutthiyana ootthoolliwa ni Mulluku ni wa anaaye ayo kinaakondeemi mwawoona. Ohiri miyaanove komattho attheene enadduwella yawoona ennuukonda weyaano.

² Kaambiiwa yawoona yookhalla mwa hiyaano nave enaakhalle mwa hiyaano wa mallapo oohimalla.

³ Echisomo, echifundo ni murendelle dda Mulluku, Attiitthiihu ni Yesu Khrisitu, Mwaana a Attiitthiihu, ddikhalle ni hiyaano mu yawoona ni mu echikondi.

⁴ Kaahakallalla ni murimaaka muttheene wi kahaaphwanya amodda mwa aniinyu ekhallaka mu yawoona, wonanko mmo Attiitthiihu yaanilamulelliiwa.

⁵ Nave vano kinimuuveka mutthiyana ookondiwa wi nikondaneke. Nginuulembella lamulo nanaanweene koma tti lamulo naakhenlleehu ovenyera vawaamba.

⁶ Echikondi kinaakeemi tti wawi ninaphwanella nikhalleke awiiwellella malamulo a Mulluku. Lamulo nno mwiiwalleenyu ovenyera vawaamba, tti nawi attheene mukhalleke ookondana.

⁷ Ahuddihi awoottha anchichi ahooneya mu ellapo yavatthi ettheene, ayo ehinaakhullella wi Yesu Khrisitu aawa wonanko muthu. Muthu awi ddiiddo tti awoottha navettho tti mudani a Khrisitu.

⁸ Vano muchenjere wi muhitathille eyo napharelleehu mutteko sika wi muneerothuviwa wamututha.

⁹ Oyo ahinasunga ehuddiho ya Khrisitu koma anoonjereravo, khanna Mulluku. Oyo anasunga ehuddiho yeella ookhalla ni Attiitthinnya ni Mwaaneene.

¹⁰ Sika vano, mmodda awa wa nyuwaano ahiwaana ehuddiho yeella, muhimwaakhelle mpa mwanyu apaalle omvaha mooni.

¹¹ Vawi oyo aanaavaha mooni annaattana ni mitteko ddiwa ddoonanara.

¹² Kookhalla ni ddeko ddinchichi ddawi kuulleelleni koma nginapaalla oddilemba mu kalata yoolla. Koma kinatiyera owa wa nyuwaano wi nikambirane vamiitthoni ni vamiitthoni wi nihakallalle wunchichi.

¹³ Anamwani a murokorinyu ootthoolliwa ni Mulluku enuuvahani mooni.