2 Timoteo 4 - Mawu a Mulluku

¹ Vamiitthoni va Mulluku ni va Khrisitu Yesu, oyo anaaweeruze athu attheene ookumi ni ookhwa nave oyo anaawe wi alamulelle wonanko Mwene, kinimuulamula weyaano wi,

² ollalleyeke othenga naari enthawi erivo apaalle ehiivo, waadduwellihe machimwiiwa, waahumullulle, waallipiheke athu murima waahuddiheke mwawiithaalla.

³ Vawi enthawi enimawa yawi athu eneerokhoota ehuddiho yawoona koma enaathwareke ddoopaalla ddiwa nave eneerewiitthukumanihella weekhiiwa ahuddihi anchichi ayo enaalleelleke nnddo enapaalliiwa wiiwa.

⁴ Eneerohiya wiiwellella yawoona nave enawiiwellelleke miyaha ddoohikhalla ni mutteko.

⁵ Nave weyaano awiithaalla mu ddittheddene, ovillelleke ddoohoosa, ophareke mutteko woollalleya othenga waphaama nave okwakhwanihe orumeyella wawo.

⁶ Vawi enthawi ya okhwa waka yohaatamella nave nikhame naka niheraatthiwe wonanko mukutho.

⁷ Koowana ekhoto yaphaama, koomalliha mujaho woothamaka nave koosunga echikhulupililo.

⁸ Vano eyo enakitiyera tti waakhella emphaso ya echilungamo eyo Mulluku akisungenlleeye. Apwiya ayo eri Ooweeruza aphaama sika enaakithuve va nllapo na echiweruzo. Khekivaha miyaanove komattho wa attheene ayo enatiyera mookonda wi Apwiya eneeroowa.

Mawu mamodda

⁹ Weeseese owa wa miyaano mwawaakuva.

¹⁰ Dema aakonda dda ellapo yavatthi nave ookihiya miyaano aya o Tesalonika. Kresike akelle o Galatiya nave Tito akelle o Dalamatiya.

¹¹ Lukave sika ari ni miyaano. Omukuse Mariko awe vamodda ni weyaano kaambiiwa aneerowora okikavihera va muttekoolla.

¹² Tikiko kimurumalle o Efeso.

¹³ Waawaka okikuselle mukanjwaaka kaahiyalleemi wa Karpo o Troasi. Okikusellettho mabukhwaaka makamaka alle oopangiwa ni nttapara.

¹⁴ Alekizandro oohana mikoko aakeerella ddoonanara ddinchichi, Apwiya eneeromullaka moollikana ni mitteko ddaye.

¹⁵ Naweenettho ochenjerena kaambiiwa aavaanyihana ollalleya wahu.

¹⁶ Vawiitetezani va mullatwaaka enthawi yawaamba, khaavo naari mmodda aakikavihenre, attheene yaakihiya meekhaaka. Mulluku aakhululukelle!

¹⁷ Koma Apwiya yaakhalla ni miyaano ekillipiha murima sika kaawora ollalleya othenga ottheene wa athu attheene ayo eri oohikhulupilila. Nave kahaakihiwa muwano mwa mikango.

¹⁸ Nave Apwiya eneerokaakiha o erive yoonanara navettho eneerokivollochiha phaama mu omwene wooddullu. Wa olliye okhalle ntitimiho wa enthawi yoohimalla. Amen.

Ollaanya

¹⁹ Ovelleelle mooni wa Prisika ni Akwila ni a munibanjani na Onesifore.

²⁰ Erasito aahalla o Korinto nave Trofimo kaamuhiyalle avoriiwaka Mileto.

²¹ Weeseese wi owe ehinaphiye eyitta. Yubule, Pude, Lino, Klaudiya ni asinno ni arokoriyo attheene eni mooni.

²² Apwiya ekhalle ni weyaano. Echisomo ya Mulluku ekhalle ni nyuwaano attheene.