2 Timoteo 3 - Mawu a Mulluku

Mallapo oomalliha

¹ Upuwella wi m'mallaponi oomallihella oneerokhalla ddoohoosa.

² Vawi athu enaakhalle awiikonda, ookonda makobiri, ookota, awiinyarulla, oonyaambusa, oohiwiiwellella makhollwiiwa, oohithokoza ni ooheella murima.

³ Enaakhalle oohikonda, oohikhululukella, awoonjerera miyaha dda akhwiiwa, oohivillella, oowalli ni awiitana ni ddaphaama.

⁴ Enaakhallettho oohiroromelleya, oohoova erive ello, awiitukhulla, ookonda minkhella dda vatthimva ohikhalla oomukonda Mulluku.

⁵ Eneereke wooneya wonanko oollapella koma masiviiwa yahaakhoota. Athu yaayo ohaathwareke.

⁶ Amodda a yaayo ennaphiya m'millakoni dda athu vawaallekani atthiyana ookarangeya ayo eri ooddalla ni machimo, oohoollelliwa ni minkhella ddoohiyanahiyana.

⁷ Atthiyanaalla enneeseesa ohuddera erive enthawi koma khenawora odduwella yawoona.

⁸ Nave wonanko mmo Yane ni Yambere yaamuvaanyihelliiwa Mose, athu yaalla ennavaanyiha yawoona. Athu yaalla khenna ezeru nave tti oolephela va echikhulupililo.

⁹ Nave khevirellella vahoollo ni ddennddo kaambiiwa arive muthu aneerewoona ookarangeya wiwa, wonanko mmo ddeereyelliiwa wa Yane ni Yambere.

Malangizo oomallihella

¹⁰ Koma weyaano waathwara phaama ehuddihwaaka, makhallellwaaka, yoolingaaka, echikhulupililwaaka, olleva waka, echikondaaka, ovillella waka,

¹¹ ddoohoosa ddaka ni ddookatamiha ddaka. Onnadduwella wi ddittheddenenndda ddaakeereyella o Antiyokeya,* o Ikonio ni o Listara. Kaavillella ddoohoosa nave Apwiya sika yakaakihalle miyaano.

¹² Nave attheene ayo enapaalla okhalla mu okumi woomullapella Mulluku mwa eyaattano ni Khrisitu Yesu eneerohoosiwa.

¹³ Koma athu oonanara ni oolleka eneerovirellella onanara nave eneerekolleka ni alliwattho eneerekollekiwa.

¹⁴ Koma weyaano virellella ollipihella okhulupilila yawoona eyo wahuddenreewe nave oyisimikinzeewe. Onnaadduwella ahuddihaawo,

¹⁵ nave onnadduwella wi waambeella khalle weyaano ori mwaana, woodduwella mawu aweella ayo enaawore wuuvaha ezeru ddawuuhoollella o echikhulupililo mwa Khrisitu Yesu wi ovullusiwe.

¹⁶ Mawu mattheenaalla tti a Mulluku nave ennapharihiwa mutteko voohuddihani yawoona, voovaanyihani ni otthopoolla yoolakwa owaakattho ohuddiha dda echilungamo,

¹⁷ wi muthu oomurumeyella Mulluku akhalle oophwanellella ni ookhozeka weera mitteko ddittheddene ddaphaama.