2 Timoteo 2 - Mawu a Mulluku

Akhoto awiiwellella a Khrisitu Yesu

¹ Nave we mwanaka okhalle oollipa mu echisomo ya Khrisitu Yesu.

² Vano nnddo wiiwalleewe wa miyaano vamiitthoni va amboni anchichi, waalleellettho ddennddo athu oororomelleya ayo enaawore waahuddihattho amodda.

³ Okawane ni miyaano ddoohoosa wonanko akhoto aphaama a Khrisitu Yesu.

⁴ Akhoto oyo ari va muttekoni anapaalla omuhakallalliha akhoto muullupalli, sika khanapwatha mitteko ddoowaani.

⁵ Muthu oothamaka va mujaho khanaakhelle emphaso ahithwanre malamulo a vamujahonimvo.

⁶ Mwaneena a emata anaphara mutteko moollipiha sika anaphwanella waamba waakhella ddoohata.

⁷ Ganizera phaama nndda kinuulleelleemi kaambiiwa Apwiya eneerewuuvaha wiiwesesa mu ddittheddene.

⁸ Muupuwelle Yesu Khrisitu, oyo avenyille wa ookhwa oyottho ari edduullu ya Davide wonanko mmo ddinahuddiheriwiiwa mu othenga waphaama kinallalleyeemi.

⁹ Kaambiiwa yoollalleya othenga waphaama kinnahoosiwa navettho omakiwa wonanko muthu oonanara. Koma mawu a Mulluku khenamakiwa,

¹⁰ sika kinnavillella ddittheddene ekaamba ya athu ootthoolliwa a Mulluku wi naalliwattho yaphwanye ovullusiwa onaweella mwa Khrisitu Yesu vamodda ni waakhella ntitimiho naye noohimalla.

¹¹ Mawu alla tti oororomelleya awi, “Nakhwa mwa olliye, nineerokhalla ni okumi mwa olliye.

¹² Navillella, nineerolamula vamodda ni olliye. Namukhoota olliyooyo, nayeenettho aneeronikhoota.

¹³ Nakhalla oohiroromelleya, olliye annakhallave oororomelleya, kaambiiwa khanawora wiikhoota yeekhaaye.”

Mullupa mutteko awaakhullelliwa ni Mulluku

¹⁴ Owuupuse ddeko ddenndda ni waalamula vamiitthoni va Mulluku wi ehivaanyihaneke dda mawu ayo ehineera ddaphaama koma enakhulla woononga awiiwaayo.

¹⁵ Ollipihelle okhalla awaakhullelleya vamiitthoni va Mulluku, wonanko mullupa mutteko oohiwulliwa muru ni muttekwaaye, oyo anahuddiha othenga wawoona wa Mulluku.

¹⁶ Ohiiwellelleke miyaha ddoohikhalla ni mutteko ni ddoohikhalla ni omulluku. Miyaha ddenndda ddinnaarekamelliha athu ni Mulluku.

¹⁷ Nave ehuddiho ddennddo ddinaphwanaphwana ni nikhwata noottatthareya. Athu eelli ayo ehuddihalle ddenndda tti Himeneo ni Fileto.

¹⁸ Alliwaalla aahiya ettilla yawoona nave ennarukunusa echikhulupililo ya amodda voollotani wi ovenya wahu wa ookhwa woheereya khalle.

¹⁹ Koma matthipello oollipa ayo yatthipelliwe ni Mulluku khewora otikhiwa. Nave va matthipellellwaayo voolembiwa mawu awi, “Apwiya ennaadduwella ayo eri ayiwa” navettho “Arive muthu anaromolla nnddina na Apwiya ahiye ddoonanara.”

²⁰ Mu enyumba yuullupalli khamunakhalla ddookusella dda golideve ni silivave komattho munnakhalla dda muteekho ni dda ethaya. Ddimodda ddinapharihiwa mutteko woopaalleya, ddimodda mutteko washisha.

²¹ Mmodda addeelliha yeekhaaye voohiyani ddeko ddoonanara ddittheddene eneerokhalla wonanko yookusella yoolemu, yaweellihiwa ni yoopharihiwa mutteko ni mwaneena a enyumbeeyo, yookhozekella mitteko ddaphaama ddittheddene.

²² Nave thawa minkhella dda osombwe, othware echilungamo, echikhulupililo, echikondi ni murendelle vamodda ni yaayo enawiithana Apwiya ni mirima ddaweella wi yaakavihere.

²³ Okhooteke ddoovaanyana ddookarangeya ni ddoohikhalla ni ezeru, valle onnadduwella wi ddinnaambiha okangana.

²⁴ Nave oorumeyella a Apwiya ahikhalleke ookangana ni athu koma akhalleke ooreera murima wa athu attheene, oodduwella ohuddiha, oovillella,

²⁵ owaalangiza oovaanyihanana mwawiithaalla vawi apaalle Mulluku ttuuwaavaha ekari yawi erukunuwe murima wi edduwelle yawoona,

²⁶ nave okhalla ni ezeru wi evulluwe mu musampha wa Satana oyo aaphanre wi yeereke ddoopaalla ddaye.