2 Timoteo 1 - Mawu a Mulluku

¹ Ovenyera wa miyaano Paulo, murummwa a Khrisitu Yesu mu opaalla wa Mulluku, oyo akirumalle wi killalleye lonjezo na okumi nno niriihuna mu eyaattano ni Khrisitu Yesu.

² Kinuulembella weyaano Timoteo mwanaka ookondiwa. Echisomo, echifundo ni murendelle ddoovenyera wa Mulluku Attiitthiihu ni Khrisitu Yesu Apwiihu ddikhalle ni weyaano.

Othokoza ni ollipiha murima

³ Kinnamuthokoza Mulluku oyo kinamurumeyelleemi ni yawuupusella murima yaweella wonanko mmo yeerella makhollwaaka. Kinnamuthokoza kaawuupuwellaka weyaano enthawi ddittheddene m'mavekelloni mwaka otthaana ni mahiiyu.

⁴ Kaawuupuwellaka miitthori ddawo, kinnapaallesesa owoona weyaano wi kihakallalle wunchichi.

⁵ Kinnuupuwella echikhulupililo yoohilleka eyo eri mwa weyaano, eyottho yaambille ophwanyeya mwa amunno Loisi ni amaayo Yunisi. Kinimasimikiza wi naweenettho wookhalla ni echikhulupililo yeella.

⁶ Ekaamba ya yeella kinimawuupusa wi okharihe wonanko munllo emphaso eyo waavahiwewe ni Mulluku kiyaattheemi matta va weyaano.

⁷ Vawi Mulluku khaanivahille munepa wawoova koma munepa wa masiva, echikondi ni wiihiiha.

⁸ Ohiwulliweke muru ovelleella omboni dda Apwiihu naari dda miyaano kiriimi mundende ekaamba ya Khrisitu koma okawane ni miyaano ddoohoosa ekaamba ya othenga waphaama mu masiva a Mulluku.

⁹ Olliye aanivullusa nave aaniithana wi nikhalle athwaaye, ohiri ekaamba ya mitteko ddahu koma ekaamba ya yoolingaaye ni echisomwaaye. Aanivaha echisomo mwa Khrisitu Yesu enthawi ehinaambe.

¹⁰ Nave vano ddenndda ddohuupullulliwa wa hiyaano mwa wooneya wa oovullusaahu, Khrisitu Yesu. Aahiiha okhwa nave ohooniha vaweella okumi woohimalla oweella mwa othenga waphaama.

¹¹ Mulluku ookitthoolla miyaano okhalla murummwa, muhuddihi ni oollalleya othenga waphaama.

¹² Ekaamba ya yeella kohoona ddoohoosanndda. Nave nginawulliwa muru kaambiiwa kinnamudduwella oyo kinamukhulupilileemi nave kinnasimikiza wi annawora osunga phaama eyo aakinnyenreeye ophiyera nllapo noomallihella.

¹³ Thwara echisanzo ya mawu awoona ayo wiiwalleewe wa miyaano, mwa echikhulupililo ni echikondi eyo eri mwa Khrisitu Yesu.

¹⁴ Osunge phaama ddawoona nnddo yawinnyereewe mwa Munepa Waweella oyo onakhalla mwa hiyaano.

¹⁵ Onnadduwella wi attheene a mu echigawo ya Asiya* yaakikhoota miyaano, mwa yaayo mmodda aari Figelo ni mmodda aari Heremogene.

¹⁶ Apwiya yeerelle echifundo nibanja na Onesifore kaambiiwa aakihakallalliha wiilliwiilli. Nave khaawulliwe muru naari kaariimi mundende.

¹⁷ Nave aphiyalle wene o Roma aakaashaasha ni ntthitti, akiphwanya.

¹⁸ Apwiya emweerelle echifundo va nllapo noomallihanno. Nave onnadduwella phaama mmo aakikaviherelleeye o Efeso.