2 Samuele 9 - Mawu a Mulluku

Davide anamweerella echifundo Mefibosheti, mwaana a Yonatani

¹ Nllapo nimodda Davide aakoha wi, “Ethiyo ookhallawo oyo ahanlle ovenyera mu nibanja na Saulo? Kinapaalla wi kimweerelle echifundo ekaamba ya Yonatani.”

² Vaakhalla oorumeyella mmodda a mu nibanja na Saulo, nnddina naye Ziba. Olliyoolla ahiithaniwa wi aye wa Davide. Vano mwenooyo aamukoha wi, “Ethiyo weyaano tti Ziba?” Olliye ahaakhulla wi, “Tti meene, oorumeyellaanyu.”

³ Vano mwenooyo aamukoha wi, “Ethiyo ookhallavo oyo ahanlle ovenyera mu nibanja na Saulo? Kinapaalla wi kimweerelle echifundo moollikana ni mmo kalonjezelleemi wa Mulluku.” Ziba ahaakhulla wi, “Ookhallawo mwaana aamullopwana a Yonatani. Olliyoolla tti ookhwa meto.”

⁴ Mwenooyo aamukoha wi, “Ari wuuwi?” Ziba ahaakhulla wi, “Ari o enyumba ya Makiri, mwaana a Amiyele, o Lodebera.”

⁵ Sika Davide ahaaruma athu wi yamukuse nave yaaya yamukusa o enyumba ya Makiri, mwaana a Amiyele, o Lodebera.

⁶ Mefibosheti, mwaana a Yonatani, mwaana a Saulo, aphiyalleeye wa Davide, aawarama vamiitthoni va Davide avelleella olemu. Vano Davide aallota wi, “Mefibosheti!” Olliyooyo ahaakhulla wi, “Koowa mi oorumeyellaanyu.”

⁷ Davide aamulleella wi, “Ohoove. Kinapaalla wi kiweerelle echifundo ekaamba ya Yonatani, attiittho. Kineerewuuhokollosella ellapo ettheene ya apwiiyo Saulo. Onaacheke ni miyaano mallapo mattheene.”

⁸ Mefibosheti aawarama allota wi, “Ethiyo mi oorumeyellaanyu kiri aani wi mukipwathe mi mwanapwa ookhwa?”

⁹ Vano aamwiithana Ziba oorumeyella a Saulo, aamulleella wi, “Ddeko ddittheddene nnddo ddaari dda Saulo ni ddittheddene dda vanibanjani ddaye kooddivaha wa eddullu ya Saulo, apwiiyo.

¹⁰ Vano weyaano ni anaawo ni oorumeyellaawo mumullimelleke olliyoolla nave muweekena ddoohata ddoomata wi nibanja na apwiiyo mukhalle yoocha. Koma Mefibosheti anaacheke ni miyaano mallapo mattheene.” Ziba aari ni anamwani aallopwana khumi ni atthanu nave oorumeyellaaye yaari 20.

¹¹ Vano aamulleella wi, “Mi oorumeyellaanyu, kineereweera ddittheddene moothwarana ni nnddo nyu apwiyaaka mulamulalleenyu.” Sika Mefibosheti aanacha ni Davide wonanko mmodda a anamwani a mwene.

¹² Mefibosheti aakhalla ni mwaana mung'onong'ono, nnddina naye Mika. Nave athu attheene yakhalla mu enyumba ya Ziba, yaakhalla oomurumeyella Mefibosheti.

¹³ Sika Mefiboshetooyo akhalla o Yerusalemu vawi aanacha mu enyumba ya mwene mallapo mattheene. Koma aari oorakalla manyallo meelliine.