2 Samuele 8 - Mawu a Mulluku

Opambana wa Davide vakhotoni

¹ Vatulli viwa Davide ahaahella ekhoto Afilisti nave ahaagonjiha. Sika aawaakha Afilistaayo muzinda wa Metege Ama.

² Davide ahaagonjihattho Amowabu. Ahaalamula wi ekonaatthi vatthi m'mizereni miraru orive mulloko. Nave orive mulloko aanawiipha athu ayo yaari m'mizereni miilli ddawaamba anaahiya athu a muzere waneeraru. Sika Amowabu attheene yaakhalla akaporo a Davide nave yahaamba okhoma musonkho wa olliye.

³ Davide aamugonjihattho Hadadezere, mwaana a Rehobu, mwene a o Zoba, Davidooyo ayeeye omutundani wa muhinje wa Yufurate wi akeraatthihewo omwenaaye.

⁴ Nave Davide aamwaakha magareta 1,000, athu oowella va akavalo 1,700 ni akhoto aweeta vatthi 20,000. Eerille ddiiddo, Davide aaphadda misempha ddam'metoni dda akavalo koma ahaahiya akavalo ookwakhwanella magareta 100.

⁵ Vano Asiriya a o Damasiko yawiilliiwa wi emukavihere Hadadezere, mwene a o Zoba, Davide aawiiphavo athu 22,000.

⁶ Vatulli viwa Davide aatthipella misasa ddakhoto o Damasiko mu ellapo ya Siriya. Nave Asiriya yaakhalla oorumeyella a Davide nave yahaamba okhoma musonkho wa olliye. Sika Apwiya yaanampambaniha orive weko ayeeyewo.

⁷ Nave Davide aayaana o Yerusalemu ezishango ddagolide nnddo ddatukhulliwa ni oorumeyella a Hadadezere.

⁸ Mwene Davide aawaana mikoko ddamukuwa ddinchichi ovenyera o Beta ni o Berotayi, mizinda ddalamulelliwa ni Hadadezere.

⁹ Mwene Toi, mwene a o Hamati, iiwalleeye wi Davide ahaagonjiha akhoto attheene a Hadadezere,

¹⁰ aamuruma mwanaye Yoramu wa mwene Davide wi amullochelle. Apaallattho amullochelle ni omuthokoza ekaamba yawi aawana ekhoto ni Hadadezere nave aamugonjiha vawi Hadadezerooyo wiilliwiilli awanesa ekhoto ni Toi. Vano Yoramooyo aawa ni emphaso ddoopangiwa ni siliva, golide ni mukuwa.

¹¹ Ddeko ddennddo Davide aaddivelleella wa Apwiya vamodda ni siliva ni golide addaakhilleeye wa athu ayo aagonjihalleeye.

¹² Athwaayo yaari Aedomu, Amowabu, Aamoni, Afilisti ni Aamaleke. Ddimodda ddaari nnddo aakhilleeye wa Hadadezere, mwaana a Rehobu, a o Zoba.

¹³ Epilli ya Davide yaavuwa virive veko ahokolloweeye woowiipha Aedomu 18,000 o ntapo na Mwiinyu.

¹⁴ Vano aatthipella misasa ddakhoto virive veko mu ellapo ya Edomu. Mu Edomu mutthemwene mwaakhalla misasa ddakhoto, sika Aedomu attheene yaakhalla oomurumeyella Davide. Vano Apwiya yaanampambaniha Davide orive weko ayeeyewo.

¹⁵ Vano Davide aalamulella ellapo ettheene ya Israele nave aaneetiha ddittheddene mweechilungamo ni moohiweha ekhove.

¹⁶ Vano Yowabu mwaana a Zeruya, aari owaahoollella akhoto nave Yehoshafati, mwaana a Ahiludi aari namalembella.

¹⁷ Zadoki, mwaana a Ahitubi, ni Ahimeleki, mwaana a Abiyatara, yaari allupa mukutho nave Seraya aari namalembella.

¹⁸ Benaya mwaana a Yehoyada, aari enduna yowaawehera Akereti ni Apeleti. Anamwani a Davide yaari allupa mukuthwaaye.