2 Samuele 7 - Mawu a Mulluku

Othenga wa Davide woovenyera wa Natani

¹ Mwene Davide akeraattheyille mu enyumbaaye yoomwene, Apwiya yaamwiithuuwiha wa adanaaye attheene oowaapheella ellapwaaye.

² Vano aallota wa namallotella Natani wi, “Mi kinakhalla mu enyumba yoomwene yoomakiwa ni miteekho ddamukunguza koma nibokosi na echipangano na Apwiya ninakhalla m'musasani.”

³ Namallotella Natani aallota wa mwenooyo wi, “Erani erive ello munapaalleenyu m'murimani mwanyu vawi Apwiya eri ni nyuwaano.”

⁴ Koma mahiiyu yaayo mawu a Apwiya yaawa wa Natani wi,

⁵ “Khawe wamulleelle oorumeyellaaka, Davide wi mi Apwiya kinallota wi, ‘Ethiyo oneesa wi onaamake enyumba wi kikhallekemo tti weyaano?

⁶ Miyaano nginakhalleke mu enyumba waambeella nllapo nne kaakhumihalleemi Aisraele mu ellapo ya Iguputo ophiyera ollello. Kookhalla kiyaaka nngu ni nngu nave mookhalla mwaka mwaari m'musasani.

⁷ M'mapuroni mattheene keetilleemi ni Aisraele, ethiyo kaambilleke ollota wa mmodda a oweeruza a Aisraele, ayo kaalamulalleemi wi yaawehereke athwaaka wi kaambiiwa tini ehikimakenlliiwa enyumba ya miteekho ddamukunguza?’

⁸ Sika vano wamulleelle oorumeyellaaka Davide wi mi Apwiya Amasiva Mattheene kinallota wi, ‘Kahuukusa woochiha enkhosa wi okhalle mwene owaalamulella athwaaka, Aisraele.

⁹ Nave kaari ni weyaano orive weko wayeewewo nave kahaagonjiha adanaawo attheene weyaano woonaka. Vano kineerewuuvuwiha wonanko athu oovuwesesa va ellapo yavatthi.

¹⁰ Nave kineerewaatthoollella nipuro athwaaka Aisraele nave kineerewaakeraatthiha wenko wi ekhalle ni nipuro nayiwanayiwa wi ehihoowekettho. Nave athu oohilungama khewa yaahoosattho wonanko khalle

¹¹ ni ovenyera enthawi elle kaatthoollilleemi oweeruza athwaaka Aisraele. Sika kineerowiithuuwiha wa adanaawo attheene. Sika kinimuulonjeza wi mi Apwiya kineerokeraatthiha nibanja nawo.

¹² Mallapwaawo yakwakhwana wi okhwe, kineeromutthoolla mmodda a anaawo wi akhalle mwene nave kineerokeraatthiha omwenaaye.

¹³ Yooyo sika anaakimakelle enyumba nave kineerokeraatthiha mpando wa omwenaaye wa enthawi yoohimalla.

¹⁴ Miyaano kinaakhalle attiitthinnya nave olliye anaakhalle mwanaka. Aachimwaka wiilliwiilli kineerekomullaka wonanko mmo attiitthi enaallakelliiwa aniiwa.

¹⁵ Koma ngivenyiha echikondaaka yoohisintheya wa olliye wonanko kamuvenyihelleemi Saulo oyo kamukhootilleemi wi weyaano okhalle mwene.

¹⁶ Vano kineerokeraatthiha nibanja nawo ni omwenaawo wa enthawi yoohimalla vamiitthoni vaka. Ddawoona, kinallota wi omwenaawo oneerokhalla wa enthawi yoohimalla.’ ”

¹⁷ Natani aallota ni Davide moollikana ni mawaalla nave ni mmo oonilleeye m'masomphenya.

Nivekello noothokoza na Davide

¹⁸ Vano Davide aavollowa mumusasani wowaallapellamo Apwiya. Akeraatthi anavekella allotaka wi, “Nyu Apwiya Mulluku, mi kiri aani nave nibanja naka tti tini wi mooniphiyiha vaava?

¹⁹ Nyu Mulluku, ddittheddenenndda ddaari ddooyeva vamiitthoni vanyu. Nyu Apwiya Mulluku, mwaalonjezattho nibanja naka mi oorumeyellaanyu dda enthawi yuullupalli yamuhoollo nave mookooniha mibado ddamuhoollo, nyu Apwiya Mulluku!

²⁰ “Vano mi Davide ttuullota tini wa nyuwaano vawi mookivaha olemu mi oorumeyellaanyu? Vawi munnadduwella phaama dda mi oorumeyellaanyu, nyu Apwiya Mulluku.

²¹ Nyu Apwiya, ekaamba yookikonda mi oorumeyellaanyu navettho moollikana ni opaalla wa murimaanyu, moheera dduullupalli voodduwanyeyiha wa mi oorumeyellaanyu.

²² Ddawoona, nyuwaano tti muullupalli, Apwiya Mulluku Amasiva Mattheene, moollikana ni nnddo niiwalleehu khaavo ari oophwanaphwana ni nyuwaano nave khaavo Mulluku mmodda koma nyeeneve.

²³ Ethiyo tti athu aavi va ellapo yavatthi enaphwanaphwana ni athwaanyu Aisraele ayo mwaavullusalleenyu wi ekhalle aanyu? Mwahaavullusa ovenyera o Iguputo ni milluku ddaye nave mwaheera ddeko dduullupalli ddawoopiha voowiikarihani mitundu ddimodda vamiitthoni viwa. Mmu sika mwavuwihelleenyu nnddina nanyu.

²⁴ Nave mwaaweera Aisraele, okhalla aanyu aanyu wa enthawi yoohimalla nave nyu Apwiya mwaakhalla Mullukwiiwa.”

²⁵ “Vano nyu Apwiya Mulluku, musungeke lonjezo nanyu mwallotilleenyu wa oorumeyellaanyu navettho dda nibanja naye wi nikeraatthihiwe wa enthawi yoohimalla nave mweere moollikana ni mmo mwallotilleenyu.

²⁶ Sika nnddina nanyu nineerotitimihiwa wa enthawi yoohimalla, ollota wi, ‘Apwiya Amasiva Mattheene tti Mulluku a Aisraele.’ Nave nibanja na oorumeyellaanyu Davide nineerokeraattheya vamiitthoni vanyu wa enthawi yoohimalla.”

²⁷ “Nyu Apwiya Amasiva Mattheene, Mulluku Aisraele, mookiwululella mi oorumeyellaanyu wi muneerokeraatthiha nibanja naka. Sika miyaano oorumeyellaanyu koollipa murima wi kivekelle wa nyuwaano.

²⁸ Vano nyu, Apwiya Mulluku Muullupalli, nyu tti Mulluku nave mawaanyu tti awoona. Mwaalonjeza wi muneerokeerella yaphaama ya ddiidda mi oorumeyellaanyu.

²⁹ Vano kinuuvekani wi moohakallalla mudalise nibanja na mi oorumeyellaanyu wi nikhallekewo wa enthawi yoohimalla vamiitthoni va nyu, Apwiya Mulluku. Vawi eyo muyidalisalleenyu enakhalla yoodaliseya wa enthawi yoohimalla.”