2 Samuele 6 - Mawu a Mulluku

Nibokosi na echipangano ninakuselliwa o Yerusalemu

¹ Davide ahaatthukumanihattho akhoto 30,000, ayo aatthoonlleeye mu Israele.

² Aatimulla ni akhoto attheene ayo aariiyena ovenyera o Baala a o Yuda wi yakuse nibokosi na echipangano na Apwiya. Nibokosinno nadduwanyeya moollikana ni nnddina nawi Apwiya Amasiva Mattheene ayo yakhalla va akerubi* wonanko va mpando woomwene.

³ Athwaayo yaatukhulla nibokosi na echipanganonno va nigareta nanaanweene ovenyera o enyumba ya Abinadabu eyo yaari vamwaangoni. Vano Uza ni Ahiyo, anamwani a Abinadabu sika yookollella nigareta nanaanweenenno.

⁴ Nave nigaretanno naatukhulla nibokosinno ovenyerana o enyumba ya Abinadabu vamwaangoni valle. Ahiyo sika akhalla vahoollo va nibokosinno.

⁵ Vano Davide ni Aisraele attheene yaari ehakallallaka ni murimiiwa muttheene vamiitthoni va Apwiya, enawiipella machipo ni azeze, magitala, ekoma, misangwa ni eziwaya dda malipenga.

⁶ Vano ephiyalle onipuroni woomuuputhellawo tirigu o Nakoni, Uza aatukhulla nnatta naye wi aphare nibokosinne vawi eng'ombe ddamagareta ddaakwakwatuwa.

⁷ Enthawi yeeyo Apwiya yaamushella murima Uza nave yaamwiipha kaambiiwa khaaganizalle phaama voopharani nibokosinne. Sika akhwenlle vaavo vamiitthoni va Apwiya.

⁸ Vano Davide aasha murima ekaamba yawi Apwiya yaamwiipha Uza. Sika nipuro nenno ninaromolliwa wi Pereziuza ophiyera ollello.

⁹ Vano nllapo nenno Davide aawoova Apwiya nave aakoha wi, “Ethiyo nibokosi na echipangano na Apwiya ninaaphiye mwawiidde owanihu?”

¹⁰ Sika Davide khaayiillena nibokosinne owaniwa, o muzinda wa Davide koma anihiyalle o enyumba ya Obedi Edomu Mugiti.

¹¹ Sika nibokosi na echipanganonno naakhalla wa Obedi Edomu Mugiti wa miyeri miraru mpa mwaye. Nave Apwiya yaamudalisa Obedi Edomu ni nibanja naye nittheene.

Nibokosi na echipangano ninakuselliwa o Yerusalemu

¹² Vano Davide ahiiwa wi Apwiya aamudalisa Obedi Edomu ni nibanja naye nittheene ni ddeko ddaye ddittheddene aariiyena ekaamba ya nibokosi na echipanganonno. Sika aayaawo akusawo nibokosi na echipangano ovenyera o enyumba ya Obedi Edomu, ayaana o muzinda woowaniwa, Yerusalemu, ahakallallaka.

¹³ Athu yatukhullalle nibokosi na echipanganonno yeeta vang'ono Davide aanawiimesa avelleella mukutho wa nankhoro a eng'ombe ni wa musaanaang'ombe ooneneva.

¹⁴ Davide awanre efodi yabafuta, aaniina mowaatitimiha Apwiya ni masivaaye mattheene.

¹⁵ Sika olliye ni Aisraele attheene yaawa ni nibokosi na echipangano na Apwiya ekhuwaka nave yiipaka mapallapata.

¹⁶ Vano nibokosi na echipanganonne niphiyalle mu muzinda wa Davide, Mikala, mwaana aamutthiyana a Saulo aatthurumella vaniwindoni nave aamoona mwene Davide iinaka navettho ahakallallaka. Vaavo mutthiyanooyo ahaamba omuvevusa m'murimani mwaye.

¹⁷ Vano athu yaawaana nibokosi na Apwiya nave yaanihiya va nipuro niwa muwari mwa musasa atthipenlle Davide. Vano yaavelleella mikutho ddooshellelliha ni dda eyaattano wa Mulluku.

¹⁸ Amallihalle ovelleella mukutho wooshellelliha ni wa murendelloolle, Ahaadalisa athu mu nnddina na Apwiya Amasiva Mattheene.

¹⁹ Vano ahaakawella Aisraele attheene, allopwana ni atthiyana arive muthu mwitthi wa buledi, enthuli ya enama navettho keke ampesa. Vano athu attheene yaavenyawo arive muthu anaya owaniwa.

²⁰ Davide ahokollweelleeye owaniwa wi adaliseke nibanja naye, Mikala, mwaara a Davide, mwaana aamutthiyana a Saulo aamuchingamella allota wi, “Mhu! Nyu mwene a Aisraele mohiivevulla nyookha ollello! Ophiya voorullani vamiitthoni va allupa mutteko aatthiyana a allupa muttekwaanyu wonanko mullupaanepa, oohiwulliwa muru naari vang'ono!”

²¹ Davide aamwaakhulla Mikala wi, “Koheera ddenndda mowaatitimiha Apwiya ayo yakitthoollille miyaano waakhwaranya attiittho ni nibanja niwa nittheene. Nave aakeera wi kikhalle mwene a Aisraele, athu a Apwiya. Sika kineerekohakallalla ni waariiha Apwiya.

²² Kineerewiivevulla okhwaranya vaava. Nave kinaakhalle oovevuwa m'mwiitthoni mwawo koma m'mwiitthoni mwa allupa mutteko aatthiyana onawaakewaayo kinaakhalle ooriiheya.”

²³ Vano Mikala, mwaana a Saulo aaphiyera okhwa ahinna mwaana.