2 Samuele 5 - Mawu a Mulluku

Davide anazoziwa wi akhalle mwene a o Israele ni o Yuda

¹ Vano malloko mattheene a Aisraele yaatthukumana vamodda wa Davide o Hebroni nave yaamulleella wi, “Ngoonani, hiyaano ni nyuwaano niri a nikhame nimodda.

² Ovenyera khalle naari Saulo aariiye mwenaahu nyuwaano mwaanaahoollella Aisraele okhotoni. Nave Apwiya yaallota ni nyuwaano wi, ‘Oneerokhalla wonanko mbusa a athwaaka Aisraele nave oneerokhalla mwene a Aisraele.’ ”

³ Sika oohoollella attheene a Aisraele yaawa o Hebroni nave Davide aakeraatthihana echipangano wenko vamiitthoni va Apwiya. Nave yaamuzoza Davide wi akhalle mwene a Aisraele.

⁴ Davide aari ni miyakha 30 avolloweeye omwene. Nave aalamulella miyakha 40.

⁵ O Hebroni ahaalamulella Ayuda miyakha mitthanu ni miilli owaaka miyeri mitthanu ni mmodda. Nave o Yerusalemu ahaalamulella Aisraele attheene ni o Yuda miyakha 33.

Davide anaakha muzinda wa Yerusalemu

⁶ Vano Davide ni athwaaye yaaya o Yerusalemu yawana ekhoto ni Ayebusi ayo yaari aneetthi a muzinda wa Yerusalemu. Athwaayo yaamulleella Davide wi, “Khowora ovollowa wuno. Athu oorakalla ni oohoona sika enaawiikarihe”

⁷ Koma Davide ahaakha mpandiiwa wa Ziyoni awuromolla wi muzinda wa Davide.

⁸ Nllapo nenno Davide aallota wa athwaaye wi, “Oyo anapaalla owiipha Ayebusi, anaphwanella avollowe oweelle mungalandeni yamaaddi wi awiiphe athu oorakalla ni oohoona ayo kiitannemina.” Ella sika ekaambiiwa ddinallotiwiiwa wi, “Oohoona ni oorakalla khevollowa mu enyumba ya Apwiya.”

⁹ Nave Davide aanakhalla mumpandanimmo nave waromolliwa wi muzinda wa Davide. Vano aamakattho muzinda waapheella nipuronno ovenyera va mpanda wa Milo ophiyera muwari mwaye.

¹⁰ Vano Davide aavirellella okhalla ni masiva manchichi vawi Apwiya Amasiva Mattheene yaari ni olliye.

¹¹ Nave Hiramu, mwene a o Tiro, ahaarumiha amithenga wa Davide ni miteekho ddamukunguza vamodda ni athu eeruso yoodduwella omaka voopharihellani mutteko malluku ni matabwa wi yamumakelle enyumba yoomwene.

¹² Vano Davide aadduwella wi Apwiya yaamukeraatthiha wi akhalle mwene a Israele navettho wi aawelliha omwenaaye ekaamba ya Aisraele athwiiwa.

Anamwani a Davide ooyariwa o Yerusalemu

¹³ Vano Davide aphiyalle o Yerusalemu ovenyera o Hebroni ahaatthellattho atthiyana amodda owaaka aakhallattho wenko ni awariye ang'onong'ono. Vano ahaayara anamwani anchichi aallopwana ni aatthiyana.

¹⁴ Manddina a anamwani ayo yayarelliwe o Yerusalemu yaari Shamuwa, Shobabu, Natani, Solomoni,

¹⁵ Ibara, Elishuwa, Nefegi, Yafiya,

¹⁶ Elishama, Eliyadi ni Elifeleti.

Davide anaagonjiha Afilisti

¹⁷ Afilisti yiiwalle wi Davide oozoziwa* omwene woolamulella ellapo ya Aisraele ettheene, Afilisti attheene yaaya yamwaashaasha Davide koma iiwalleeye ddenndda aaya akhalla onipuroni nootetezeya wunchichi.

¹⁸ Afilisti yaaphiya ekhalla moovokhana va ntapo na Refaimu.

¹⁹ Vaavo Davide aamukoha Mulluku wi, “Ethiyo kiyeewo kawanena Afilisti? Ethiyo muneerewaavelleella m'mattani mwaka?” Nave Apwiya yaamwaakhulla wi, “Khawe, kineerewaavelleella m'mattani mwawo.”

²⁰ Sika Davide aaya o Baala Perazimu awanana ekhoto nave ahaagonjiha Afilistaayo. Vano aallota wi, “Mulluku ookiphariha mutteko wi kaagonjihe adanaaka wonanko maaddi eechigumula.” Sika ekaambiiwa nipuro nenne ninaromolliwa wi Baala Perazimu.

²¹ Vano Afilisti yaaddihiya milluku ddiwa wenko nave Davide ni athwaaye yahaakusa mafanwaayo.

²² Enthawi emodda Afilisti yaawattho etthattana va ntapo na Refaimu.

²³ Vano Davide aamukohattho Apwiya nave Mulluku aamulleella wi, “Ohinawanana moowehanana koma owaapheelle nave waaphiyere otulli wiwa nave waahelle ekhoto vanipuroni noowehana ni miteekho.

²⁴ Vano wiiwa onyakulla wa etthoka dda miteekhonnddo sika vaavo mukhozeke kaambiiwa Apwiya ahuuhoollellani wi mwiiphe mulloko wa Afilistooyo.”

²⁵ Davide aheera moollikana ni mmo Apwiya yamulamulalliiwa nave ahaagonjiha Afilistaayo ovenyera o Geba ophiya o Gezere.