2 Samuele 4 - Mawu a Mulluku

Wiiphiwa wa Ishibosheti

¹ Vano Ishibosheti mwaana a Saulo, iiwalleeye wi Abinere ohiiphiwa o Hebroni, aakhumuwa nave Aisraele attheene yahoova wunchichi.

² Vano Ishibosheti mwaana a Saulo aakhalla ni allopwana eelli ayo yahoollella milloko miilli ddakhoto. Mmodda nnddina naye aari Baana, mmodda aari Rakebu, anamwani a Rimoni a nlloko na Benjamini a o Beeroti (vawi Beeroti yaari echigawo emodda ya nlloko na Benjamini.

³ Aneetthi a o Beeroti yaathawella o Gitaimu nave enakhalla wenko ophiyera ollello).

⁴ Vano Yonatani, mwaana a Saulo, aakhalla ni mwanaye ookhwa meto nnddina naye Mefibosheti. Epilli ya okhwa wa Saulo ni Yonatani yiiweyiiwa o Yezireele, mwaanoolla aari ari ni miyakha mitthanu. Muthu oyo amullella mwaanooyo iiwalle dda okhwanko aamukusa athawana. Voothawani mwawaakuva, mwaanoolle aamuvulluwa, amorella vatthi, aphoreya. Orakalla waye wavenyenre vaavo.

⁵ Vano Rekabu ni Baana, anamwani a Rimoni o Beeroti, yaatimulla otthaana, nndduwa niri vamuru, yaphiya wa Ishibosheti. Enthawi yeeyo Ishibosheti aari iithuuwaka.

⁶ Mutthiyana oyo awehera va mullako wa enyumba amuuputhaka tirigu aaphariwa ni ekhove nave aakona. Sika Rekabu ni Baana yaphiyenre ovollowa mpammo.

⁷ Koma voovollowani, yamuphwanye Ishibosheti akonaka vabedini vaye. Alliwaayo yaamuhoma emwiipha nave emuphadda muru. Yaatukhulla murooyo yeetana mahiiyu mattheene oyeella ettilla ya o Araba.

⁸ Vano muru wa Ishiboshetoolle yaayaana wa Davide o Hebroni. Yaamulleella wi, “Olla khohiyo muru wa Ishibosheti, mwaana a Saulo, mudanaanyu apaalla owiiphanoolle. Ollello Apwiya aamuhokollosella Saulo ni edduullu ddaye ekaamba ya nyuwaano, apwiya.”

⁹ Koma Davide aamwaakhulla Rekabu ni mwanamunne Baana, anamwani a Rimoni a o Beeroshiti wi, “Kinimallupella vamiitthoni va Apwiya Ookumi ayo yooponlle okumaaka m'mattani mwa adanaaka attheene.

¹⁰ Muthu mmodda akilleelleeye wi Saulo ookhwa, aganiza wi anakilleella othenga waphaama. Kaamuphara nave kaamwiipha o Zikilagi. Yeeyo sika yoothuviwaaye ekaamba ya othengaayooyo.

¹¹ Onaakhalle wa wiidde wa athu oonanara ayo emwiiphalle muthu oohichimwa akonaatthille mpa mwaye. Kineerewuullakani va okhwa wa muthu yoolla ophiyera kuuvenyihalleni va ellapo yavatthi.”

¹² Sika Davide ahaalamulella akhotwaaye nave yaawiipha athwaalle, yaaphadda matta ni manyallo yaatthomeya vakhwipi va nthiya na Hebroni. Koma yaakusa muru wa Ishibosheti yawuvittha mu mahame a Abinere o Hebroni.