2 Samuele 3 - Mawu a Mulluku

¹ Vano ekhoto variyari va athu a Saulo ni athu a Davide yaavirellellave wa enthawi yoorekama. Masiva a Davide yaanavirellella waata koma masiva athu a Saulo yaanavirellella oyeva.

Anamwani a Davide ooyarelliwa o Hebroni

² Davide ahaayara anamwani aallopwana o Hebroni. Mwanaye awaamba aari Aminoni oovenyera mwa mwaariye Ahinowamu a o Yezireele.

³ Aneepiilli aari Kiliyabu oovenyera mwa mwaariye Abigaile olle aari mwaara a muha Nabala a o Karimele. Aneeraru aari Abishalomu oovenyera mwa mwaariye Maaka, mwaana a Talimai, mwene a o Geshuri.

⁴ Aneesese aari Adoniya ovenyera mwa mwaariye Hagiti. Mwanaye aneetthanu aari Shefatiya oovenyera mwa mwaariye Abitala,

⁵ Nave mwanaye aneetthanu ni mmodda aari Itireamu oovenyera mwa mwaariye Egila. Yaalla sika anamwani a Davide ayo yayariwe o Hebroni.

Abinere aniiwanana ni Davide

⁶ Athu a Saulo ni athu a Davide yawaniiwa, Abinere aaddinnya yeekhaaye masiva variyari va athu a Saulo.

⁷ Abinere aakona ni mwaariye mung'onong'ono a Saulo, nnddina naye Rizipa, mwaana a Aya. Vano Ishibosheti aamukoha Abinere wi, “Kaambiiwa tini okonilleewe ni mwaariwa mung'onong'ono a attiitthaaka?”

⁸ Abinere aasha murima wunchichi ni mawu a Ishibosheti nave aallota wi, “Ethiyo mi onakeesa muru wa mwanapwa a Yuda? Waambeella khalle kookhalla oororomelleya wa Saulo attiittho, abalaaye ni akhwaaye. Navettho kohuuteteza wa Davide. Sika ollellova weyaano onaakiipa mullatu wi kookona ni mutthiyana!

⁹ Ekaamba ya yeella Mulluku akillake apaalle akiiphe kaahimweerella Davide nnddo Apwiya yamullupellelliiwa.

¹⁰ Kineerotthaamiha omwene m'mattani mwa Saulo ni edduullu ddaye nave kineerowukeraatthiha wa Davide wi aalamulelle Aisraele ni Ayuda attheene ovenyera o Dani, omwera, ophiya o Beeresheba, ompoto.”

¹¹ Vano Ishibosheti khaarina yoollota nave khaamwaakhullalle naari vang'ono vawi aanamoova Abinere wunchichi.

¹² Vano Abinere ahaaruma amithenga wa Davide wi yamukohe wi, “Ethiyo ellapweella tti ya aani? Nipangane, miyaano kineerewuukaviherani wi ellapo ya Israele ekhalle yaanyu.”

¹³ Davide ahaakhulla wi, “Vano nineeropangana. Koma kinapaalla kuuveke ello emodda. Khokoona waahiwaana Mikala, mwaana aamutthiyana a Saulo.”

¹⁴ Vano Davide ahaarumiha amithenga wa Ishibosheti, mwaana aamullopwana a Saulo wi, “Okinnye mwaaraka Mikala, oyo kamutomenleemi ni etthoka dda mattapara a Afilisti 100.”

¹⁵ Enthawi yeeyo Ishibosheti ahaaruma athu wi yamukuse Mikalooyo wa mamune mmodda anaanweene, Palatiele, mwaana a Laishi.

¹⁶ Koma mamunayooyo aamuthwara mwaariyooyo. Mamunooyo aamuthwara inllaka musewu muttheene ophiya o Bahurimu. Abinere aamulleella wi, “Hokollowa, oroweke.” Nave olliye aahokollowa anarowa.

¹⁷ Enthawi yeella Abinere aakambirana ni oohoollella a Aisraele aalleella wi, “Waambeella khalle mookhalla mumupaallaka Davide wi akhalle mwene awuulamulani.

¹⁸ Vano enthawi yaweera ddennddo tti yeella. Valle Apwiya yaamulonjeza Davide wi, ‘Kineerewaavullusa athwaaka Aisraele m'mattani mwa Afilisti oweella mwa oorumeyellaaka ni m'mattani mwa adaniiwa attheene.’ ”

¹⁹ Vano Abinere aallotattho wa athu a nlloko na Benjamini. Aamulleellattho Davide o Hebroni ddaphaama ddittheddene nnddo Abenjamini ni Aisraele attheene yiiwananniiwa wi yeere.

²⁰ Vatulli viwa Abinere aawa wa Davide o Hebroni ni athu 20. Davidooyo aamukhonzera machellello Abinere ni athu aariiyenaayo

²¹ Vano Abinere aamulleella Davide wi, “Kaakhullelleni wi kaatthukumanihe Aisraele attheene wi ewe wuno wa nyuwaano, apwiyaaka, epangane ni nyuwaano wi mulamulelleke orive weko nko murimaanyu onapaalliiwa.” Sika Davide aallaanyana ni Abinere anarowa mwamurendelle.

Wiiphiwa wa Abinere

²² Enthawi yeeyo akhoto a Davide yaaphiya ni Yowabu ovenyera nko yawaniiwa ekhoto ekusalle ddawaakha okhotoni ddinchichi. Koma Abinere khaari ni Davide o Hebroni vawi aari amwaakhullenlle wi aroweke nave aari arowille mwamurendelle.

²³ Yowabu ni athu attheene yawiilliiwa, athu amodda yaamulleella Yowabu wi, “Abinere mwaana a Nere aawa wa amwene nave amwenaayo yaamwaakhullella wi aroweke, sika oorowa mwamurendelle.”

²⁴ Yowabu iiwalleeye ddennddo aaya wa amwene aakoha wi, “Nyu mwenreenywiilla tti tini? Abinere oophiyaphiyeene wuno moomwaakhullella wi aroweke? Ddiiddava oorowa?

²⁵ Nyu amwene khamunamudduwella Abinere, mwaana a Nere? Olliyooyo aweellathi wuumarani muyeepe owiitthoni. Apaalla wi adduwelle okhuma ni ovollowa wanyu nave wi adduwelle nnddo muneereenyu.”

²⁶ Yowabu avenyillewo wa amwene wulle, ahaaruma amithenga wi emuthware Abinere. Alliwaayo yaamphwanya veehimeni ya Sira, emuhokollosa, Davide ahidduwellaka ello.

²⁷ Vano Abinere ahokollweelleeye o Hebroni, Yowabu aamukusella vakhwipi waatamella va mullako wa etawoneeyo, anakhalla wonanko anaaka akambiranena ddeko ddawi athu amodda ehiiwe. Vano Yowabu aamuhoma Abinere vamirimani, akhwella vaavo. Yowabu enre ddenndda kaambiiwa Abinere aamwiipha Asahele mwanamunne a Yowabu.

²⁸ Vatulli viwa Davide iiwalle aallota wi, “Mi ni athu attheene a mu omwenaaka khanichimwale vamiitthoni va Apwiya va okhwa wa Abinere, mwaana a Nere.

²⁹ Mullatu yoolla okhalle wa Yowabu ni nibanja nittheene na attiitthinnya. Nave Mulluku amullake Yowabu ni nibanja naye nittheene nave attheene evoriiwe ni erata ya echisonono apaalle ereta ya makate apaalle orakalla apaalle yiiphiwe okhotoni apaallettho erame yoocha.”

³⁰ Sika Yowabu ni mwanamunne Abishai yaamwiipha Abinere kaambiiwa Abinerooyo aari amwiiphalle mwanamunniwa Asahele vakhotoni ya o Gibiyoni.

³¹ Vano Davide aamulleella Yowabu ni athu attheene aariiyena wi, “Ahullani ddoowara ddanyu nave muware eziguduli wi mumwinllelleke Abinere.” Nave Davide aanaathwara vatulli ootukhulla mutembwaayo.

³² Yaamuvittha Abinere o Hebroni. Sika amwene yahoopa ekutho mookhuwa va mahame a Abinere. Athu attheene yahinllattho wunchichi.

³³ Vawoopani ekutho vamalironi a Abinere Davide eehina, “Abinere ttuukhwa mwawi ddiidda, wonanko mmo enakhwella athu ookarangeya?

³⁴ Mattaawo yaari oohimaka, manyallwaawo kheyaahuruwelliwe. Koma okhwille wonanko muthu shisha oyo iiphiwe ni athu oonanara.” Athu attheene yaamwinllella Abinere

³⁵ Vano athu yaawa emuveka mwene Davide wi eche yoocha ohinaripe. Koma Davide aallupella wi, “Mulluku akillake wunchichi, kacha yoocha apaalle erive ello nndduwa nihinavollowe.”

³⁶ Athu attheene yahiiwellella nave ddahaaddivella. Ddittheddene eera mwenooyo ddaanaaddivella athu attheene.

³⁷ Sika athu attheene yakhalla ni mwenooyo ni Aisraele attheene yaadduwella wi khewaahiyo opaalla wa mwenooyo wi Abinere, mwaana a Nere iiphiwe.

³⁸ Vano Davide ahaakoha akhotwaaye wi, “Ethiyo khamunadduwella wi ollello mu ellapo ya Aisraelaalla mookhwa oohoollella muullupalli?

³⁹ Vano ollello kookhumuwa wunchichi naari kiri mwene oozoziwa.* Athu yaalla, anamwani a Zeruya, aakiramiha yaweera. Apwiya emuhokolloselle muthu aweera ddoonanara moollikana ni onanara waye.”