2 Samuele 24 - Mawu a Mulluku

Davide anaweerenga athu

¹ Enthawi emodda Apwiya yahaananariwellattho Aisraele, sika yaamweeriha Davide wi aahoose alliwa. Yaamulleella wi, “Khawe waweerenge Aisraele ni Ayuda attheene.”

² Sika Davide aamulleella Yowabu ni oolamulella ekhoto ayo aariiyena vamodda wi, “Khaweni omallokoni mattheene a Aisraele mwaweerenge Aisraele ovenyera o Beeresheba ophiya o Dani wi kidduwelle echiwerengerwiiwa.”

³ Koma Yowabu aamulleella wi, “Apwiya Mullukwaanyu ewaatihe athwiiwa makhumi khumi okhwaranya eriiwammu. Nave yaakhullelle wi nyu apwiyaaka moone ddennddo. Koma kaambiiwa tini, nyu apwiyaaka, munapaalleenyu ello yeella?”

⁴ Koma mwene aamuwatihera Yowabu ni oohoollella akhotwaalle. Sika Yowabu ni oohoollella akhotwaayo yaavenyawo enaya wooweerenga Aisraele

⁵ Yaallapuwa muhinje wa Yordani yamaka misasa moowaapheella muzinda wa Aroere, muzinda oyo waari variyari va ntapo na o Gadi ni o Yazere.

⁶ Vano yaaphiya o Giliyadi ni o Kadeshi ellapo ya Ahiti yaphiya o Dani ovenyera wenko yaheeta moowaapheella o Sidoni.

⁷ Vano yaaphiya ompandani wa Tiro ni o mizindani ddittheddene dda Ahivi ni Akanani. Ddimanlle nndda, yaavenyewo wenko yaphiya o Beeresheba, omwera wa ellapo ya Yuda.

⁸ Vano ekhwaranyille ellapo ettheeneeyo, yaaphiya o Yerusalemu vimanlle miyeri mitthanu ni misese ni mallapo 20.

⁹ Vano Yowabu aavelleella echiwerengero ya athu attheene wa Davide. Mu Israele mutthemwene mwaari athu 800,000 oowora owana ekhoto nave mu Yuda mwaari athu 500,000.

¹⁰ Vatulli viwa Davide ahiivaanyiha m'murimani mwaye, oweerenga athu wulle omanlle. Vano aavekella wa Apwiya wi, “Koochimwa wunchichi vaweerani yeella. Koma vano, nyu Apwiya, kinuuvekani wi mukikhululukelle nichimo na mi oorumeyellaanyu. Vawi koheera ddookarangeya wunchichi.”

¹¹ Vano Davide ohinase avenyille Apwiya yaallota ni namallotella Gadi, oollohella a Davide wi,

¹² “Khawe wamulleelle Davide wi, mi Apwiya kinallota wi, ‘Kinuuvaha ddeko ddiraru wi otthoollevo emodda yawi kiweerelle.’ ”

¹³ Sika Gadi aawa wa Davide amulleella wi, “Mutthoolle munapaalleenyu, ethiyo vikhalle miyakha miraru dda ettalla mu ellapwaanyu apaalle nyuwaano mwaathaweke adanaanyu wa miyeri miraru apaalle mallapo mararu a mullilli mu ellapwaanyu? Vano ganizerani yawaakhulla wi kamulleelle oyo akirumalle kaahokollowaka.”

¹⁴ Davide aallota wa Gadi wi, “Mi kinimakhupanya wunchichi, ahiyeni Apwiya ekillake weekhiiwa vawi echifundwiiwa tti yuullupalli koma ohiri killakiwe ni athu.”

¹⁵ Sika Apwiya yaarumiha mullilli wa Israele, waambeella ohinase ophiyera enthawi eyo apaallille mwaneena. Ovenyera o Dani ophiya o Beeresheba yaakhwa athu 70,000.

¹⁶ Vano mungelo attaphurusalleeye mattaaye wi oononge muzinda wa Yerusalemu, Apwiya yaakhurumusa murima va ollakanko emulleella mungelwaaye oyo awoononga athoolle wi, “Wookwakhwana, hokollosa nnatta nawo.” Nave mungelo a Apwiya aari iimenlle va nipuro noomuuputhellavo tirigu na Arauna Muyebusi.

¹⁷ Davide aamoona mungeloolle nave aallota ni Apwiya wi, “Mi sika kichimwalle nave koheera ddoonanara. Koma enkhosanndda ddilakwille tini? Vano nnatta nanyu nikillake mi ni nibanja na attiitthaaka.”

¹⁸ Nllapo nenno Gadi aaphiya wa Davide amulleella wi, “Muye mwaamakelle Apwiya nikuwa vanipuroni noomuuputhellavo tirigu na Arauna Muyebusoolle.”

¹⁹ Sika Davide aayaawo vawiiwellellani mawu a Gadi moollikana ni mmo Apwiya yamulamulalliiwa.

²⁰ Vano Arauna aatukhulla miittho nave aamoona mwene awaaka ni oorumeyellaaye wa olliye. Enthawi yeeyo Araunooyo aaya amuvaha olemu Davide moopopheya ekhove.

²¹ Sika aamukoha mwenooyo wi, “Mwene, munawa wa mi oorumeyellaanyu mwawiidde?” Davide aallota wi, “Kinapaalla wi kikulle nipuro noomuuputhellavo tirigunna wi kaamakellevo Apwiya nikuwa wi mullilloolla ovenye wa athu.”

²² Arauna aamulleella Davide wi, “Apwiyaaka, mukuse wi mwavelleelle mukutho ddeko nnddo ddinuuddivellani. Ngoonani kinapaalla kivelleelle eng'ombe wi ddikhalle mukutho wooshellelliha ni miteekho ddoomuuputhellana tirigu wi ddikhalle ekhuni.”

²³ Koovelleella ddittheddenenndda. Nave Arauna aavirellella ollota wi, “Apwiya Mullukwaanyu yaakhelle mukuthwaanyu.”

²⁴ Koma mwene Davide aamulleella Aruana wi, “Kookoma, kineerokulla va mutengwiiwa muttheene. Ngivelleella mukutho wooshellelliha wa Apwiya Mullukwaaka ddeko nnddo kihikullalleemi.” Sika Davide aakulla nipuro noomuuputhellavo tirigunna ni eng'ombe ddene va mutengo wa makobiri asiliva 50.

²⁵ Nave Davide ahaamakella Apwiya nikuwa avelleella mikutho ddooshellelliha ni ddeeyaattano. Sika Apwiya yahiiwa oveka waye woovekella ellapo nave mullillooyo waamalla mu ellapo ettheene ya Israele.