2 Samuele 23 - Mawu a Mulluku

Mawu ookomihera a Davide

¹ Mawu ookomihera a Davide tti awi, nna sika nchipo na Davide, mwaana a Yese, mawu a muthu oyo Apwiya yamweerilliiwa wi akhalle muullupalli oyo Mulluku a Yakobo amuzozilleeye wi akhalle mwene, muthu ooddivelliwa wiipa machipo aphaama a Israele.

² “Munepa wa Apwiya onallota mwa miyaano, mawaaye eri vayanoni vaka.

³ Mulluku a Aisraele oollota, nlluku na a Aisraele nookilleella wi, muthu oyo anaalamulella athu mwa echilungamo, waalamulella moomuriiha Mulluku,

⁴ anaaphiyera wonanko owala woohinase, anakhallattho wonanko murimu oyo anamelliha munyepu muthayani.

⁵ Vano Mulluku aneerodalisa edduullu ddaka kaambiiwa olliye aheera echipangano yoohimalla ni miyaano. Echipangano yootthopoowa phaama ni yoohimalla. Nndda sika kinakhallelleemi munkhella nave sika ddinaakivulluse, Mulluku sika anaaweere ddenndda.

⁶ Athu oonanara attheene ari wonanko miiwa ddoophwanella otathilliwa vawi kheddinaphariwa ni matta.

⁷ Koma ennaddikakatha ni nsupada enaddihella munllo.”

Akhoto oovuwa a Davide

⁸ Manddina a akhoto amasiva a Davide yaari Yoshebu Bashebeti Mutakemoni, muullupalli a akhoto araru oovuwesesa. Nave nllapo nimodda aawiipha athu 800 ni nivaka naye enthawi emodda.

⁹ Nave mmoddattho mwa athu ararwaalle aari Eleazara mwaana a Dodo, edduullu ya Ahohi. Olliye aari ni Davide o Pasidamimu mvo Afilisti yatthukumanilliiwa wi ewanena ekhoto. Aisraele yaari ethawille.

¹⁰ Koma olliyooyo aahalla, awiipha Afilisti ophiyera nnatta naye naatopa koma woohitathilla nsupada. Nllapo nenno Apwiya yampambaniha. Vatulli viwa Aisraele yaahokollowa yaakha dda athu awiiphiwaayo.

¹¹ Oomuthwarellella yooyo aari Shama, mwaana a Age Muharari. Enthawi emodda Afilisti yaatthukumana o Lehi nko waari emata yanamurovo. Aisraele yahaathawa Afilistaalle.

¹² Koma olliyooyo ahiimella muwariwari mwa emata aayiteteza nave aawiipha Afilistaayo. Sika Apwiya yahaavullusa ni waapambaniha wuullupalli.

¹³ Enthawi yoohata, araru mwa oohoollella akhoto 30 yaaya o nlluku nko wakhalla Davide o nikhungu na Adulamu. Vakhuviru ni wenko akhoto a Afilisti yaatthipellawo misasa ddakhoto o ntapo na Refaimu.

¹⁴ Enthawi yeeyo Davide aari munikhunguni mulle nave mulloko wakhoto wa Afilisti waari o Betelehemu.

¹⁵ Vano Davide aallota wi, “Aarikivo oyo anaarike maaddi wiihimeni eyo eri va mullako wa Betelehemu, aaweerokivaha wi kiwirye!”

¹⁶ Vano athu araru amasivaalle yaakhwaranya misasa dda Afilisti nave yaarika maaddi veehimeni ya Betelehemu eyo yaari vakhuviru ni va mullako valle. Nave yaakusa maaddaayo ewaana wa Davide. Koma Davide khaawiryalle maaddaayo, aawiithella muthaani wonanko yoovelleella wa Apwiya.

¹⁷ Vano aallota wi, “Kinimallupella vamiitthoni va Mulluku wi ngeera ddenndda. Onaakhalle wonanko owirya nikhame na athu ayo ehiyalle okumiiwa vooswaani.” Sika aakhoota waawirya. Nndda sika yeerille akhoto araru amasivaalle.

¹⁸ Vano Abishai, mwanamunne a Yowabu, mwaana a Zeruya, sika aari owaahoollella athu 30. Vano aawiipha athu 300 ni nivaka naye nave aavuwa wonanko athu ararwaalle.

¹⁹ Aavuwa wunchichi mwa athu 30 nave aakhalla oohoollella koma khaavuwalle wonanko ararwaalle.

²⁰ Nave Benaya, mwaana a Yehoyada, a o Kabizeele aari muthu oollipa murima nave aphara mitteko dduullupalli. Olliye aawiipha akhoto eelli oovuwa a o Mowabu nave ahiipha mukango mu nlliti enthawi yooriirya.

²¹ Aamwiiphattho Muiguputo, mullopwana ooreera. Muiguputooyo aakhalla ni nivaka naye m'mattani koma Benaya aaphiya wa olliye akusalle ekopo nave aamwaakha Muiguputoolle nivakanne amwiiphana.

²² Ddenndda ddaamweeriha Benaya, mwaana a Yehoyada, ovuwa variyari va athu araru amasivaalle.

²³ Olliye aavuwa wunchichi mwa athu 30 koma khaavuwalle wonanko ararwaalle. Vano Davide aamutthoolla wi akhalle muullupalli oolamulella akhotwaaye oomuteteza.

²⁴ Amodda a athu 30 yaari Asahele, mwanamunne a Yowabu, Elihanani, mwaana a Dodo a o Betelehemu,

²⁵ Shama a o Harodi, Elika a o Harodi,

²⁶ Helezi Mupeleti, Ira, mwaana a Ikeshi a o Tekowa,

²⁷ Abiyezere a o Anatoti, Mebunayi Muhusha

²⁸ Zalimoni Muahohi, Maharai a o Netofa,

²⁹ Helebi, mwaana a Baana, a o Netofa, Itai, mwaana a Ribai a o Gibea, Mubenjamini.

³⁰ Vaakhallattho Benaya a o Piratoni, Hidai a o muhinje wa o Gaashi,

³¹ Abiyaliboni Mwaraba, Azimaveti a o Bahurimu,

³² Eliyaba a o Shaaliboni, anamwani a Yasheni, Yonatani,

³³ Shama Muharari, Ahiyamu, mwaana a Sharara Muharari,

³⁴ Elifeleti, mwaana a Ahasibai a o Maaka, Eliyamu mwaana a Ahitofele a o Gilo,

³⁵ Heziro a o Karimele, Paarai Mwaraba

³⁶ Igala, mwaana a Natani a o Zoba, Bani Mugadi,

³⁷ Zeleki Mwamoni, Naharai a o Beeroti, ootukhulla ezida dda Yowabu, mwaana a Zeruya,

³⁸ Ira Muitiri, Garebu Muitiri ni

³⁹ Uriya Muhiti. Attheene vamodda yaari athu 37.