2 Samuele 21 - Mawu a Mulluku

Wiiphiwa wa edduullu dda Saulo

¹ Enthawi ya omwene wa Davide waakhalla ettalla wa miyakha miraru ddoothwarana. Nave Davide aaveka ezeru wa Apwiya nave Apwiya yaamulleella wi, “Saulo ni nibanja naye aakhalla ni mullatu woowiipha Agibiyoni.”

² Sika mwenooyo aawiithana Agibiyonaayo. Agibiyonaayo kheyaari Aisraele koma Aamori oohalla. Naari Aisraele yallupenlle wi khewiipha Agibiyonaayo koma Saulo aapaallave waatthollosa Agibiyonaayo ekaamba yawaakonda Aisraele ni Ayudaayo.

³ Vano Davide ahaakoha Agibiyonaayo wi, “Ethiyo munapaalla kiweerelleni tini? Kipepese mwawiidde wi mudalise yoohallana ya Apwiya?”

⁴ Agibiyonaayo yaamulleella Davide wi, “Vookhalla mullatu variyari va hiyaano ni Saulo apaalle nibanja naye, khohiyo wawi ttuuwullivella ni golide apaalle siliva navettho khohiyo wawi apaalle ninapaalla omwiipha mmodda mu Israele iyaayi.” Vano Davide ahaakoha wi, “Vano munapaalla kiweerelleni tini?”

⁵ Alliwaayo yaallota wa mwene wi, “Muthoolle aanitthollosa nave yoopaallaaye yaari yawi nihikhallettho m'malireni a ellapo ettheene ya Israele.

⁶ Muninnye edduullu ddaye dditthanu ni piilli wi hiyaano naddiiphe vamiitthoni va Apwiya o Gibea, etawoni ya Saulo, ootthoolliwa a Apwiya.” Mwenooyo ahaakhulla wi, “Kineerowinnyani.”

⁷ Koma mwenooyo aamuvittha Mefibosheti, mwaana a Yonatani, mwaana a Saulo ekaamba ya ollupella wulle Davide eerilleeye ni Yonatani mwaana a Saulo vamiitthoni va Apwiya.

⁸ Sika mwenooyo aamukusa Arimoni owaaka Mefibosheti mmodda, anamwani a Rizipa, mwaana aamutthiyana a Aya oyo amuyarelleeye Saulo. Ahaakusattho anamwani atthanu ayo Mikala, mwaana aamutthiyana a Saulo amuyarenlleeye Adiriyeli, mwaana a Barizilai Mumehola,

⁹ aavelleella wa Agibiyoni. Vano attheenaayo yaawiipha vamwaangoni vamiitthoni va Apwiya nave atthanu ni eellaayo yakhwenlle nimodda. Alliwaayo yiiphiwe mallapo awaambeella a enthawi yoohata, enthawi yawaamba ohata mmiddo wa tirigu.

¹⁰ Vano Rizipa, mwaana aamutthiyana a Aya, aakusa echiguduli aanddellella vanllukuni mvo vaari mitembo ddaathwaayo, waambeella enthawi yoohateeyo ophiyera enthawi yawi murimu ahaamba orupa. Mutthiyanooyo khaapaalla wi vamitembonimvo otthaana viphiye epallame apaalle mahiiyu viphiye enama ddamuhakani.

¹¹ Davide iiwalle nnddo Rizipa, mwaana a Aya, mwaariye mung'onong'ono a Saulo eerilleeye,

¹² aaya akusa makhuva a Saulo ni makhuva a Yonatani, mwaana a Saulo. Yaawaakha athu a o Yabeshi Giliyadi ayo yiiyalle makhuvaayo o nthato na o Betesheani nko Afilisti yaatthomeyilliiwawo nllapo nno yamwiiphalliiwa Saulo o Gilibowa.

¹³ Davide aakusa makhuva a Saulooyo ni makhuva a Yonatani, mwanaye aavenyihawo wenko. Vano ahaatthukumanihattho makhuva a athu alle yiiphelliwe vamwaangoni valle.

¹⁴ Vano ahaavittha makhuva a Saulo ni makhuva a Yonatani mwanayoolle mu ellapo ya Benjamini o Zela mu mahame a Kishi, attiitthinnya a Saulo moollikana ni ddittheddene nnddo alamulalleeye. Vatulli viwa Mulluku ahiiwa mavekello oovekellella ellapweeyo.

Aisraele enawana ni athu amasiva a Afilisti

¹⁵ Enthawi emodda Afilisti yaawanattho ni Aisraele. Davide aayaawo ni akhotwaaye, yawana ni Afilistaayo nave olliyooyo aatopa wunchichi.

¹⁶ Vano Isibi Benobi, mmodda mwa edduullu dda athu amasiva ooromolliwa Arefaimu, oyo nivaka naye nallemella makilogaramu mararu ni hafu. Nsupada naye nisha niri mu laamba a muyuununi mwaye, aaganiza ddawi amwiiphe Davide.

¹⁷ Koma Abishai, mwaana a Zeruya, aawa wi amukavihere Davide, allipana ni mfilistooyo ophiyera aamwiipha. Vano akhoto a Davide yaalonjeza moollupella wa Davidooyo wi, “Vano nyuwaano khamuwa muya okhotoni ni hiyaano woova wi munaawiiphiwe. Nyuwaanothi tti muthu oororomelleya mu Israelemmu.”

¹⁸ Vatulli wiwa vaakhalla ekhoto ni Afilisti o Gobu. Wenko Sibekai Muhusha, aamwiipha Safu oyo aari mmodda a edduullu dda athu awoopiha ooromolliwa Arefaimu.

¹⁹ Nave vaakhallattho ekhoto ni Afilisti o Gobu. Vano Elihanani, mwaana a Yairi a o Betelehemu aamwiipha Goliati Mugiti, oyo ekopo ya nivaka naye yaari yawiitivalla wonanko mukoko wawoopella ekuwo.

²⁰ Nave waakhallattho ekhoto o Gati, nko waari muthu oorekama ookhalla ni eyaalla dditthanu ni emodda o orive nnatta ni eyaalla dditthanu ni emodda o orive nnyallo, ddittheddene ddaarivo eyaalla 24. Olliye aarittho mmodda a edduullu dda Arefaimu.

²¹ Olliye aanyaambusalle Aisraele, Yonatani mwaana a Shimea, mwanamunne a Davide, aamwiipha.

²² Nndda ddaari edduullu dda Arefaimu a o Gati koma yahiiphiwa ni Davide ni akhotwaaye.