2 Samuele 20 - Mawu a Mulluku

Sheba anamuwukila Davide

¹ Vano waakhalla muthu oohitthopoowa, nnddina naye Sheba, mwaana a Bikiri a nlloko na Benjamini. Olliye nllapo nimodda ahoopa nipallapata allota wi, “Hi khaninna echigawo mu omwene wa Davide, khaniinnattho yoohallana mu omwene wa Yese! Nyu Aisraele, arive muthu ayeeke o enyumbaaye.”

² Sika Aisraele attheene yaahiya omuthwara Davide, yaambeella omuthwara Sheba, mwaana a Bikiri. Koma athu Ayuda yaamuwanddeellella Davide, mweniiwa. Ovenyera o muhinje wa Yordani ophiya o Yerusalemu.

³ Davide aphiyalle o enyumbaaye o Yerusalemu ahaakusa awariye ang'onong'ono ayo aahiyalleeye wi ewehereke enyumbaaye aawallella mpa mmo amuhiyalleeyemo mulonda. Aanaavaha yoocha koma Davide khaakonana awariyaayo. Ahaawallella mpa ophiyera nllapo yakhwilliiwa nave yakhalla wonanko anaamukhwelle

⁴ Vano mwenooyo aamulleella Amasa wi, “Okiithanelle athu attheene a o Yuda, ewe wuno vihinavire mallapo mararu nave weyaano okhallevo.”

⁵ Vano Amasa aawiithana Ayuda. Koma aaselliwa, akhwaranya enthawi eyo mwenooyo amulleelleeye

⁶ Vano Davide aamulleella Abishai wi, “Sheba, mwaana a Bikiri, aneeronikatamiha omukhwaranya Abishalomu. Waakuse akhotwaaka mumuthware ahiniiphwanyelle mizinda dda mipanda ddoollipa ni onihoosa hiyaano.”

⁷ Sika Abisayoolle ni akhoto a Yowabu, Akereti ni Apeleti ni athu attheene amasiva yaakhuma mu Yerusalemu omuthwara Sheba, mwaana a Bikiri.

⁸ Enthawi eyo yaphiyiiwa vanllukuni nuullupalli nno naari o Gibiyoni, Amasa aawa wi akumane ni alliwa. Vano Yowabu aawara yoowara yakhoto, vaddullu va yoowareeyo muyuununi mwaakhalla laamba oomakellellavo nigonelo na nsupada. Eeteeye naahullulluwa.

⁹ Vano Yowabu aamukoha Amasa wi, “Ethiyo mbalaaka waweella waarera?” Yowabooyo aamuphara Amasoolle ereru ni nnattanatta naye wi amukhupaarelle.

¹⁰ Koma Amasa khaadduwella yaweera ni nsupada nno naari m'mattani mwa Yowabu. Enthawi yeeyo Yowabooyo aamuhomana vamirimani omodda, marupo ekhuma nave akhwenlle vaavo. Vano Yowabu ni Abishai, mwanamunne, yaamuthwara Sheba mwaana a Bikiri.

¹¹ Muthu mmodda a akhoto a Yowabu vakhwipi va mutembo wa Amasa, allota wi, “Arive muthu anapaalla omuthwara Yowabu ni Davide, amuthwareke Yowabooyo.”

¹² Enthawi yeeyo Amasa aari iihuruwelle ni nikhame naye variyari va musewu. Arive muthu oyo amoona aaniimella. Vano muthu a o Yowaboolle oonille wi athu enniimella, aamutukhullavo Amasooyo, amuvenyihavo vamusewunimvo amuhiya vahakani amukhuneella ni yoowara.

¹³ Amasooyo avenyihiwevo vamusewunimvo athu attheene yaamuthwara Yowabu wi yamuthware Sheba mwaana a Bikiri.

¹⁴ Sheba aaphiya omallokoni mattheene a Aisraele ophiyera aaphiya o etawoni ya Abele mu echigawo ya Betemaki. Athu attheene a nlloko na Abikiri yaatthukumana evollowana mu etawoneeyo.

¹⁵ Vano athu attheene ayo yaari ni Yowabu yaamwaapheella Shebooyo ni misasa dda akhoto mu etawoni ya Abele a o Betemaki. Yaallima mikhuttu ddakhoto ddattannya oddullu wa mpandooyo opaalla okumulla esiri ya mpanda wa etawoneeyo.

¹⁶ Sika mutthiyana mmodda eezeru ddaye ahaamba wiithana mu etawoneeyo allotaka wi, “Ngiiwani! Ngiiwaani! Mmulleelle Yowabu wi awe wuno wi killotena.”

¹⁷ Yowabooyo aawa vakhuviru ni mutthiyanooyo nave mutthiyanooyo aamukoha wi, “Ethiyo nyuwaano tti Yowabu?” Yowabu ahaakhulla wi, “Ee tti meene.” Mutthiyanooyo aamulleella wi, “Mukiiwellelle mi mullupa muttekwaanyu aamutthiyana.” Yowabu ahaakhulla wi, “Ee, kinnawiiwani!”

¹⁸ Mutthiyanoolle aallota wi, “Vallethi athu akhalle yaanallota wi, ‘Khaweni mwaveke ezeru o etawoni ya Abele.’ Miyaha ddiwa ddamalla mwawi ddiiddo.

¹⁹ Hiyaano tti athu amurendelle ni oororomelleya mu ellapo ya Israele. Nyuwaano munapaalla woononga etawonaahu eyo tti wonanko nikhollo na ellapo ya Israele. Kaambiiwa tini munapaalleenyu woononga eyo eri yoohallana ya Apwiya?”

²⁰ Yowabu ahaakhulla wi, “Iyaayi, nginapaalla woononga etawoniilla.

²¹ Ddennddo khe ddawoona. Koma muthu mmodda oovenyera mu ellapo yamiyaango ya Efuremu, nnddina naye Sheba mwaana a Bikiri, amuwukilalle Davide. Mwaninnya yooyo, etawonaanyu kheyoonongeya.” Mutthiyanoolle aamulleella Yowabu wi, “Nineerewuuvokhellani murwaaye oweella vasirini.”

²² Mutthiyanooyo mwa ezeru ddaye aaya wa athu aatthopoollella mwahoolla. Sika athwaayo yaaphadda muru wa Sheba, mwaana a Bikiri, emuvokhella Yowabu. Vano Yowabu ahoopa nipallapata nave akhotwaaye attheene yaavenyawo o etawoninko arive muthu anaya owaniwa nave Yowabu aahokollweella o Yerusalemu wa Davide.

Enduna ddimodda dda Davide

²³ Yowabu aanalamulella mulloko muttheene wa wakhoto wa Israele. Nave Benaya, mwaana a Yehoyada, aanalamulella Akereti ni Apeleti.

²⁴ Adoramu aari mulonda muullupalli a mitteko dda athu oophara moowatiheriwa. Yehoshafati, mwaana a Ahiludi, aari namalembella a epilli ya ellapweeyo.

²⁵ Sheva aari namalembella a mwene. Zadoki ni Abiyatara yaari allupa mukutho.

²⁶ Nave Ira Muyairi olliyettho aari mullupa mukutho a Davide.