2 Samuele 2 - Mawu a Mulluku

Davide o Yuda

¹ Ddiviralle ddenndda Davide ahaakoha Apwiya wi, “Ethiyo kiye mu muzinda mmodda mwa mizinda dda Yuda?” Apwiya yaamwaakhulla wi, “Ee, khawe.” Vano Davide aakoha wi, “Kiye muzindeene oovi?” Apwiya yaallota wi, “Oye o Hebroni.”

² Sika Davide aayaawo ni awariye eellaalle, Ahinowamu a o Yezireele ni Abigaile, mwaara a muha Nabala, a o Karimele.

³ Davide aari nimodda ni athu akhalleeyena, arive muthu ni nibanja naye. Yaakeraattheya m'matawoni a mu Hebroni.

⁴ Vano Ayuda yaawa nave wenko yaamuzoza Davide wi akhalle mweniiwa. Davide iiwalle wi athu a o etawoni ya Yabeshi mu echigawo ya Giliyadi sika yamuvitthalle Saulo mu mahame,

⁵ ahaarumiha athu amodda ni othenga wawi, “Apwiya yuudaliseni vawi mohooniha ororomelleya wanyu vawaavitthani apwiinyu Saulo.

⁶ Vano enthawi yeella Apwiya eneerowoonihellani echikondiiwa yoohimalla ni ororomelleya wiwa wa nyuwaano. Navettho miyaano kineeroweerellani ddaphaama ekaamba ya ddaphaama mweerilleenyunndda.

⁷ Ekaamba ya yeella mullipe murima nave mukhalleke wonanko allopwana vawi apwiinyu Saulo aakhwa nave athu a o Yuda aakizoza wi kikhalle mweniiwa.”

Ishibosheti anazoziwa wi akhalle mwene a o Israele

⁸ Enthawi yeella Abinere mwaana a Nere, oyo aari akhoto muullupalli a Saulo aari amukusalle Ishibosheti mwaana a Saulo, oyaana okhopella, o Mahanaimu.

⁹ Vano yaamuzoza omwene wi akhalle o echigawo ya Giliyadi, Ashere, Yezireele, Efuremu ni Benjamini nikhulle mi ellapo ya Israele ettheene.

¹⁰ Ishibosheti, mwaana a Saulo, ari ni miyakha 40 aambeeye olamulella ellapo ya Israele nave omwenaaye wamanlle miyakha miilli. Koma nlloko na Yuda naamuthwara Davide.

¹¹ Vano Davide aakhalla a nlloko na Yuda o etawoni ya Hebroni vakhuviru miyakha mitthanu ni miilli ni miyeri mitthanu ni mmodda.

Ekhoto variyari va Israele ni Yuda

¹² Abinere, mwaana a Neri ni akhoto a Ishibosheti, mwaana a Saulo, yaaya m'muzindani wa Gibiyoni ovenyera o Mahanaimu.

¹³ Yowabu, mwaana a Zeruya ni akhoto a Davide, yaaya yakumanana va nthiya na Gibiyoni. Yaakeraatthi vatthi amodda ekhopella emodda amodda ekhopella emodda.

¹⁴ Abinere aamulleella Yowabu wi, “Asombwaanyu ni aahu yiimelle wi ettheelle vamiitthoni vahu.” Yowabu ahaakhullella wi, “Yiimelle.”

¹⁵ Akhotwaayo yaawa yeerengiwa. A nlloko na Benjamini ni a Ishibosheti, mwaana a Saulo, yaari khumi ni eelli nave athu a Davide yaarittho khumi ni eelli.

¹⁶ Vano arive muthu aamuphara mudanaaye muru amuhoma mpararuni ni nsupada naye. Sika athu attheene 24 yakhwelle nimodda. Ekaamba ya yeella nipuro nenna yaanivaha nnddina nawi, “Nipuro na masupada na o Gibiyoni.”

¹⁷ Vano vaakhalla ekhoto yawoopiha nllapo nenno. Abinere ni Aisraele yaagonjihiwa ni akhoto a Davide.

¹⁸ Anamwani araru a Zeruya, Yowabu, Abishai ni Asahele yaari wenko. Asahele aari oothamaka wunchichi wonanko naahe.

¹⁹ Olliye aamwiikariha Abinere. Athamakeeye khaaweha mukhwipi miitthwaaye yaari va Abinere.

²⁰ Vano Abinere aarukunuwa akoha wi, “Ethiyo weyaano ori Asahele?” Olliye ahaakhulla wi, “Ee, tti miyaano.”

²¹ Abinere aamulleella wi, “Khotella erive embali omuphare mmodda a akhotwaayo, omwaakhe ddeko ddaye ddittheddene.” Koma Asahele khaapanlle ohiya omwiikariha Abinere.

²² Vano Abinere aamulleellattho asahele wi, “Kihiye ohinakiikarihaka kaambiiwa tini onakiwanddeellelleewe wi kiwiiphe? Vano miyaano kawiipha kinaaye kallote tini wa mwanamunno Yowabu?”

²³ Koma Asahele khaapanlle ohiya omwiikariha Abinere, sika Abinere aamuhoma Asahelooyo vamirimani ni embali yoohitthokowa ya nivaka naye, nivakanno naakhumellella vamutthanani. Asahele ahiikuha, akhwella vaavo. Athu attheene ayo yaphiyalle mvo vakhwenlle Ahasele kheyaari ni yoollota.

²⁴ Koma Yowabu ni Abishai yahaamba omwiikariha Abinere. Nave nndduwa navollowiiwa yaaphiya va mwaango wa Ama oyo athu enawuphwanyiiwa ehinaphiye o Giya vamusewuni wooya o echipululu ya Gibiyoni.

²⁵ Abenjamini yaatthukumana vamodda omukavihera Abinere nave yaapanga mulloko mmodda wakhoto eya yiimella vamwaangoni.

²⁶ Vano Abinere aamukhuwella Yowabu amukoha wi, “Nivirellelleve owana? Onnadduwella wi mamallihellweene enaakhalle oovoreya? Ethiyo onaawaahihe niini athwaawo wi ehiye oniikariha hiyaano abaliiwa?”

²⁷ Yowabu ahaakhulla wi, “Kinimallupella vamiitthoni va Mulluku wi wahillotilleke ddiiddo, akhotwaaka kheyaahiye owiikariha abaliiwaayo ophiyera osiisello ohinase.”

²⁸ Vano Yowabu ahiipa nipallapata nave athu attheene yaahiya owiikariha Aisraelaayo nave ekhotweeyo yamallelle vaavo.

²⁹ Abinere ni athwaaye yaheeta mahiiyu mattheene ekhwaranya va ntapo na Araba. Yaallapuwa muhinje wa Yordani nave yaheeta ohinase ottheene vano yaaphiya o Mahanaimu.

³⁰ Yowabu aahokollowawo woomwiikariha Abinere wulle. Aatthukumanihalle athu attheene ahoona wi akhoto 19 yaayelleellavo owaakattho Asahele.

³¹ Koma akhoto a Davidaayo yaari ewiiphalle athu ookwakhwana 360 a Abinere, a nlloko na Benjamini.

³² Vano yaakusa mutembo wa Asahele yawuvittha mu mahame a attiitthinnya ayo yaari o Betelehemu. Yowabu ni athwaaye yaheeta mahiiyu mattheene nave wasiiwa yaari ephiyalle o Hebroni.