2 Samuele 19 - Mawu a Mulluku

Yowabu anamuhumullulla Davide

¹ Athu amodda yaamulleella Yowabu wi, “Amwene enamwinllella Abishalomu.”

² Sika ehakallallo ya nllapo nenno yaatthattuwa maliro wa athu attheene vawi athu yahiiwa wi amwene enamwinllella mwaniwa.

³ Nllapo nenno athu yaavollowa m'muzindanimmo moomaalleya wonanko mmo athu oothawa okhotoni enavollowelliiwa m'muzindani moowulliwa muru.

⁴ Mwenooyo aakhuneella owiitthoni aninlla wi, “Mwanaka, mwanaka Abishalomu, mwanaka, mwanaka!”

⁵ Vano Yowabu aavollowa mpa mwa mwenooyo, amuphwanya mwenooyo allota wi, “Ollello mohaawulliha muru akhotwaanyu attheene ayo evullusalle okumaanyu ni okumi wa aniinyu aallopwana ni aatthiyana, owaakattho okumi wa awarinyu ni okumi wa awarinyu ang'onong'ono.

⁶ Nyuwaano munaakonda adanaanyu nave muniitana ni athu ayo enuukondani, ollello moonoonihella vaweella wi khamunnana mutteko mwene ni akhotwaanyu. Koodduwella wi Abishalomu akhwilleeye khamunahakallalla koma nakhwilleke hiyaano othwaanyu olliye akhalla mukumi.

⁷ Koma vano mukhume mwaallipihe murima akhotwaanyu mowaahakallalliha. Kinimallupella vamiitthoni va Apwiya wi mwaahiyaawo, voophiyani osiisello akhoto attheene enaakhalle yuuthawilleni. Vano ddenndda ddineerewuunanarani okhwaranya ddoonanara ddittheddene dduumorelleni ovenyera enamwanaanyu ophiyera ollello”

⁸ Mwenooyo iiwalle ddenndda aatimulla, akeraatthi vakhuviru ni va mullako wa muzindooyo. Sika akhotwaayo yiiwalle wi mwenooyo ari vakhuviru ni mullako wa muzindooyo, yaatthukumana vamiitthoni vaye. Enthawi yeeyo Aisraele yaari ethawille, arive muthu ayiille owaniwa.

Davide anahokollweella o Yerusalemu

⁹ Vano athu attheene a malloko a Aisraele yaanakangana weekhiiwa. Yallota wi, “Mwene Davide aanivullusa wa adanaahu nave aanoopolla wa Afilisti. Koma vano ookhuma mwiillaponimmu, omuthawa Abishalomu.

¹⁰ Koma Abishalomu oyo hiyaano namuzozilleehu wi akhalle mwenaahu aakhwa okhotoni kaambiiwa tini muhinalloteenyu ddoomukusawo mwene Davide wi ahokollowe?”

¹¹ Nnddo yallota Aisraele ddaamuphwanya mwene Davide. Sika aarumiha mawu wa allupa mukuthwaalle, Zadoki ni Abiyatara, allota wi, “Mwaakohe oohoollella o Yuda wi, ‘Kaambiiwa tini munaselliheenyu ddoomukusa wi ahokollweelle o enyumbaaye.

¹² Nyuwaano sika muri abalaakabalaaka. Kaambiiwa tini munapaalleenyu okhalla ookomihera omwiithana mwene?’

¹³ Nave mwamulleelle Amasa mawu awi, ‘Ethiyo weyaano khohiyo mbalaakabalaaka?’ Mulluku akillake ophiyera kikhwe kaahuutthoolla weyaano wi okhalle akhoto muullupalli ovollowa munipuroni na Yowabu waambeella ollello?”

¹⁴ Sika Davide ahaakopa Ayuda attheene nave yahiiwanana ello emodda. Vano athwaayo yaarumiha mawu wa mwene ellota wi, “Waani wuno ni akhotwaanyu attheene.”

¹⁵ Vano mwenoolle aahokollweella o muhinje wa Yordani. Nave athu attheene a nlloko na Yuda yaaphiya o Giligala ekumana ni mwene, emullapusa muhinje wa Yordani.

¹⁶ Vano Shimei, mwaana a Gera, Mubenjamini o Bahurimu, aawa mwawaakuva ni Ayuda ekumana ni mwene Davide.

¹⁷ Olliyooyo aari ni athu 1,000 o Benjamini. Ziba oorumeyella a nibanja na Sauloolle ni anaaye aallopwana khumi ni atthanu owaakattho allupa muttekwaaye 20, yaathamakella o Yordani, yaphiyawo mwene ahinaphiye.

¹⁸ Vano yahaallapusa attheene a mu nibanja na mwene nave yaheera ddittheddene ddoomuhakallalliha mwenooyo. Vano mwenooyo ariiye vakhuviru ollapuwa muhinje wa Yordani, Shimei mwaana a Gera, ahiivokhella vatthi vamiitthoni va Davide.

Davide anamweerella Shimei echifundo

¹⁹ Aamulleella mwenooyo wi, “Apwiya kikhululukelleni, muhinuupuwella yoonanara elle kaweerelleemini va nllaponne nyu apwiyaaka mwakhumenyu mu Yerusalemu mulle. Amwene muhinaddivittha ddenndda vatthi va murima.

²⁰ Miyaano kaporwaanyu kinnadduwella wi kaachimwa. Ella sika ekaambiiwa kiwiilleemi ollellova. Mu nibanja nittheene na Yosefe awaamba tti miyaano owa okumana ni nyuwaano apwiyaaka amwene.”

²¹ Enthawi yeeyo Abishai mwaana a Zeruya aakoha wi, “Ethiyo Shimeyoolla khiiphiwa vawi aamuruwana oozoziwa* a Apwiya?”

²² Koma Davide aamwaakhulla wi, “Mi kiri ni tini ni nyuwaano anamwani a Zeruya? Ttaani uutthoonlleni wi mukilleelleke ayo yenre ddoonanara? Ollellova, miyaano sika kiri Aisraele nave khaavo mu Israele oyo anaawiiphiwe.”

²³ Sika mwenooyo aamulleella Shimei wi, “Kinimallupella wi weyaano khawiiphiwa.”

Davide anamweerella echifundo Mefibosheti

²⁴ Vano Mefibosheti, edduullu ya Saulo, aaya akumana ni mwene. Khaasuusullalle meto, khaachemille ereru, khaachapille ddoowara ddaye waambeella nllapo nno mwenooyo akhumalleeye mu Yerusalemu, ophiyera nllapo nno ahokollowilleeye mwamurendelle.

²⁵ Sika awiilleeye ovenyera o Yerusalemu akumanaka ni mwene, mwenooyo amukoha wi, “Mefibosheti kaambiiwa tini wahithaananilleewe ni miyaano?”

²⁶ Mefibosheti aamwaakhulla wi, “Mi apwiyaaka amwene, akilakwihalle tti mullupa muttekwaaka. Miyaano kaporwaanyu kaamulleella phaama ddene mullupa muttekooyo wi, ‘Okihiyere esaduro va bulwaaka wi kimuwelle kaathwareke amwene’ vawi valle miyaano kaporwaanyu kiri oorakalla.

²⁷ Koma olliyooyo aakilleka miyaano kaporwaanyu dda nyu apwiyaaka amwene. Nave nyuwaano muri wonanko mungelo a Mulluku. Vano mweere eyo enaawuuddivelleni.

²⁸ Vallethi athu attheene a munibanjani na attiitthaaka yaari oophwanella wiiphiwa ni nyu apwiyaaka amwene. Koma mi oorumeyellaanyu mwaakitthoolla wi kicheke nimodda ni nyuwaano. Vano ehanlle tti tini wi kuuvekeni mukeerelle echifundo, nyu amwene?”

²⁹ Mwenoolle aallota wi, “Kohiiwa ohinoonjereravottho mawu mamodda. Miyaano kinapaalla wi weyaano ni Ziba mukawane eyuuma ya Saulo.”

³⁰ Koma Mefibosheti aamulleella mwenooyo wi, “Ziboolla akuse eyuuma ettheeneeyo. Ohokollowa wanyu wuno ni murendelle wookikwakhwanella.”

Davide anamweerella echifundo Barizilai

³¹ Vano Barizilai Mgiliyadi aaphiya ovenyera o Rogelimu. Aathaanana yaaphiya o muhinje wa Yordani wi amuvelleelle voollapuwani muhinje wa Yordani.

³² Barizilai aari muthu awuulluvalla, a miyakha 80 ddooyariwana. Olliyoolla sika amuvaha yoocha Davide enthawi eyo aariiye o Mahanaimu vawi olliyoolla aari muthu eeyuuma yinchichi.

³³ Sika mwenooyo aamulleella Barizilai wi, “Hanko nillapuwe, wakhalleke ni miyaano o Yerusalemu.”

³⁴ Koma Barizilai aamukoha mwenooyo wi, Ethiyo mi okumaaka ohanlle ni mallapo makavi? Wi kakhalleke ni nyuwaano o Yerusalemu?

³⁵ Vano miyakha ddaka ddiri 80. Ethiyo mi ttuuwora ohiyaniha ddeko ddoohakallalliha ni ddeko ddoohihakallalliha? Ethiyo mi oorumeyellaanyu ttuuwora odduwella oddiva wa yoocha apaalle wa yoowirya? Ethiyo mi ttuuwora wiiwa wiipa waallopwana apaalle waatthiyana? Kaambiiwa tini miyaano kinaakhalleemi wonanko katundu oollemella ootthinddanyeriwa va nyuwaano, apwiyaaka amwene.

³⁶ Koma mi oorumeyellaanyu kinapaalla killapuwe vang'ono muhinje wa Yordani vamodda ni nyu amwene. Vano amwene munaakithuvelle tini mwawi ddiidda?

³⁷ Mukaakhullelle mi oorumeyellaanyu wi kihokollowe wi kakhwelle owanihu vakhuviru ni mahame a attiitthaaka ni amoowaaka. Koma mwanakoolla Kimuhamu, akhalle oorumeyellaanyu. Olliyoolla sika anaallapuwe ni nyu apwiyaaka amwene. Nave mumweerelle erive ello enaawuuddivelleni.

³⁸ Mwenooyo ahaakhulla wi, “Kimuhamoolla kineerollapuwana nave kineeromweerella erive ello enaawuuddivelleni nyuwaano. Nnddo munaganizeenyu wi kiweerelleni, kineeroweerellani.”

³⁹ Sika athu attheene yaallapuwa muhinje wa Yordani nave mwenooyo aallapuwattho. Vano mwene aamukhupaarella Barizilai amudalisa nave olliye aahokollweella owaniwa.

⁴⁰ Mwenooyo aavirellella ni olendwaaye ophiyera aaphiya o Giligala, Kimuhamu aathaanana. Athu attheene a o Yuda ni hafu a athu a o Israele, yaamuvelleella mwenooyo.

⁴¹ Vatulli viwa Aisraele attheene yaaya wa mwene, yamukoha wi, “Kaambiiwa tini abalaahu Ayuda yeerilliiwa ddenndda wonanko emawiiyani, yuwiihani ni nibanja nanyu ni athwaanyu attheene, ollapuwa muhinje wa Yordani?”

⁴² Ayuda yaawaakhulla Aisraelaayo wi, “Ekaambiiwa tti yawi mwenoolla tti mbalaahubalaahu. Vaava nyu yuushihalleni murima tti tini? Mwenoolla nimuchenlle tini? Apaalle anivahille tini?”

⁴³ Aisraelaayo yaawaakhulla Ayudaayo wi, “Mwa yoolla mookhalla milloko khumi dda hiyaano. Nave mu omwene wa Davide hiyaano nookhalla ni milloko ddinchichi wuukhwaranyani nyuwaano. Vano kaambiiwa tini nyuwaano munanivevulleenyu? Ethiyo khanihiyo hiyaano naambille ollota wi mwenaahu aweewo?” Koma athu a o Yuda yaallota moowalli wunchichi waakhwaranya Aisraele attheene.