2 Samuele 18 - Mawu a Mulluku

Ogonjihiwa ni wiiphiwa wa Abishalomu

¹ Davide ahaatthukumaniha athu attheene aariiyena wi aakawe ekhalle m'millokoni. Nave ahaatthoolla amodda wi ekhalle oolamulella akhoto ma 1,000 nave amodda ekhalle oolamulella akhoto ma 100.

² Vano Davide aarumiha mulloko wa akhoto aakawille milloko miraru. Mulloko mmodda awuuhoollella tti Yowabu, mmodda Abishai, mwaana a Zeruya, mung'onong'onwaaye a Yowabu, mmodda Itai Mugiti. Vano mwenooyo ahaalleella athwaayo wi, “Mi kineerewuuthwarani.”

³ Koma athwaayo yaallota wi, “Nyu khamunithwara kaambiiwa hiyaano nathawa adani khenipwatha nave hafu a hiyaano akhwa alliwaayo khenipwatha. Koma nyuwaano tti oopaalleya okhwaranya athu 10,000 a hiyaano. Ella sika ekaambiiwa oriiwa woopaalleya wunchichi wi nyuwaano munirumihelleke nikavihero ovenyera omuzindani wuno.”

⁴ Mwenooyo ahaalleella wi, “Erive ello enaawuuddivelleni kineereweera,” Sika Davide ahiimella va mullako wa muzindooyo enthawi eyo akhotwaaye yakhumiiwa eri m'millokoni dda athu ma 100 ni ma 1,000.

⁵ Nave mwenooyo aamulamula Yowabu, Abishai ni Itai wi, “Moonesese wi musombwe Abishalomu ooteteziwa kaambiiwa tti mwanaka.” Athu attheene yahiiwa dda Abishalomu, mwenooyo aalamuleeye ooholleella akhotwaalle.

⁶ Vano akhotwaayo yaakhuma oya ochipululuni woowana ni Aisraele. Nave ekhotweeyo yawaniwe o otthako wa Efuremu.

⁷ Aisraele yaagonjihiwa ni akhoto a Davide. Nllapo nenno yahiiphiwa athu anchichi 20,000.

⁸ Ekhotweeyo yaamwareyella ellapo ettheeneeyo nave athu ayo yakhwelle muutthakoni yaari anchichi waakhwaranya ayo yiiphiwe ni nsupada.

⁹ Moorurumusa Abishalomu aakumana ni akhoto a Davide. Abishalomooyo aari awenlle enyurwaaye* nave enyurweeyo yaavollowa vatthi va enthambi dda muteekho wa muthundu. Sika Abishalomu aahalla ari llellee! Murwaaye waangille va enthambinnddo, enyuru awenlleeyeeyo ekhwaranyille.

¹⁰ Muthu mmodda oonille ddenndda aamulleella Yowabu wi, “Koomoona Abishalomu ari llellee m'muteekhoni wa muthundu.”

¹¹ Yowabu aamukoha muthooyo wi, “Vano wahimwiiphelle tini vaavo? Miyaano keerohakallalla nave keerewuuvaha makobiri a siliva khumi owaaka laamba.”

¹² Koma muthooyo aamulleella Yowabu wi, “Naari kaakhenlleke m'mattani mwaka makobiri a siliva 1,000, ngaatukhulle nnatta naka wi kimwiiphe mwaana a amwene. Vano amwene yahuulamulani nyuwaano, Abishai ni Itai hiyaano niiwaka wi, ‘Moonesese wi musombwe Abishalomu ooteteziwa kaambiiwa tti mwanaka.’

¹³ Kavevullalleke mawu aamwenaayo voomwiiphani mwaniwa, ddeerodduwanyeya vawi kheyiivo ello eri yoovittheya vamiitthoni va amwene nave nyuwaano khamwaakiteteze.”

¹⁴ Yowabu aallota wi, “Onimakiselliha!” Nave aakusa mavaka mararu amuhomana Abishalomu vamurimani ahinakhwe aangille m'muteekhoni wa muthundooyo.

¹⁵ Akhoto 10 ootukhulla ezida dda Yowabu yaamwaapheella Abishalomu, emwiipha.

¹⁶ Vatulli viwa Yowabu ahiipa nipallapata nowaalleella athu wi ehiye owana nave akhotwaaye yaawaawo nko yaathwariiwa Aisraele.

¹⁷ Nave akhotwaayo yaakusa mutembo wa Abishalomu ewutathillella munllitini nuullupalli, muutthakoni. Yuukellavo malluku manchichi vanllitini mvo. Aisraele attheene yaathawa, arive muthu athawella owaniwa.

¹⁸ Abishalomu ari mukumi, ahiimakella ezipilala va ntapo na mwene vawi allota wi, “Mi nginna mwaana aamullopwana oyo anaahallena nnddina naka. Vano echipilaleeyo aayivaha nnddina naye nenno, ophiyera ollello ninadduwenyeya wi apoto a Abishalomu.”

¹⁹ Vano Ahimaazi, mwaana a Zadoki allota wi, “Tiyerani kithamake kaalleelle amwene othenga woohakallallihoolla wawi Apwiya ahaavullusa amwene wa adaniiwa.”

²⁰ Yowabu aamulleella Ahimaazooyo wi, “Ohinallota ddennddo ollello. Ollote ddennddo nllapo nimodda koma ollellova ohinallota erive ello kaambiiwa mwaana a mwene ohiiphiwa.”

²¹ Vatulli viwa Yowabu aamulleella Kushi wi, “Khawe waalleelle amwene nnddo oddoonilleewe.” Kushooyo aawarama moomuvaha olemu Yowabu aamba othamaka.

²² Vano Ahimaazoolle, mwaana a Zadoki, aamulleellattho Yowabu wi, “Mukaakhullelle wi nameenettho kimuthamakelle Mukushoolle.” Yowabu aamukoha wi, “Mwanaka, onathamakella tini? Khothuviwa ello ekaamba ya othenga yoolla.”

²³ Ahimaazi aallota wi, “Mi kineerothamaka.” Vano Yowabu aamulleella wi, “Khawe.” Sika Ahamaazi aathamaka, oweella ettilla yamutapo, amukhwaranya Mukushoolle.

²⁴ Enthawi yeeyo Davide aari akeraatthille variyari va millako miilli dda miilli dda muzindooyo, mullako wa muwari ni wa otte. Mulonda aawella vasirini aya iimella vaddullu vamullakonimvo. Awehaka aamoona muthu athamakaka yeekha.

²⁵ Vano mulondooyo aakhuwa amulleella mwene. Nave mwenooyo aallota wi, “Aarimi ari yeekha, yooyo ookhalla ni othenga waphaama.” Vano muthu oothamakoolle aaphiya vakhuviru.

²⁶ Mulondoolle aamoona muthu mmoddattho athamakaka. Vano aamukhuwella mulonda oyo aari vatthi va mullako allota wi, “Ngoonani, muthu mmodda anathamaka yeekha.” Mwenooyo aallota wi, “Olliyettho anawa ni othenga waphaama.”

²⁷ Mulondoolle aallota wi, “Muthu oyo ari vahoollo va oothamakaayo, anathamaka wonanko Ahimaazi, mwaana a Zadoki.” Mwenooyo aallota wi, “Yooyo tti muthu aphaama nave anawa ni othenga waphaama.”

²⁸ Vano Ahimaazi aakhuwa wa mwene allota wi, “Etitimiheye Apwiya Mullukwaanyu ayo yaavelleelle m'mattani mwanyu athu ayo yuuwukilalleni nyuwaano apwiyaaka amwene.”

²⁹ Mwenooyo aamukoha wi, “Ethiyo musombwe Abishalomu ddoomweetellawo phaama wenko?” Ahimaazi aamulleella mwenooyo wi, “Yowabu akirumeeye miyaano kaporwaanyu kaawoona athu anchichi etokollollaka koma nginadduwella wi yeereyille tti tini.”

³⁰ Enthawi yeeyo mwenooyo aallota wi, “Hapuwa wiimelle mvo.” Olliyooyo aahapuwa iimella vaavo.

³¹ Mukushoolle nayeene aaphiya nave aallota wi, “Kiwiille ni othenga waphaama, apwiyaaka amwene. Ollello Apwiya ahuuvullusani wa athu attheene yuuwukilallenaalle.”

³² Vano mwenooyo aamukoha Mukushoolle wi, “Ethiyo musombwe Abishalomu ddoomweetellawo phaama wenko?” Mukushoolle ahaakhulla wi, “Apwiyaaka mwene, adanaanyu ni athu attheene ayo yuuwukilalleni ddooweereyella nnddo ddimweereyelle mwaninyu.”

³³ Enthawi yeeyo mwenooyo aamoriwa ethakaraka wunchichi awella aninlla mu echipinda yavaddullu va mullako wa muzindooyo. Vano akhwaranyeeye, inlla wi, “We mwanaka Abishalomu, mwanaka, mwanaka Abishalomu, kakhwilleke miyaano munipuroni na weyaano! Mwanaka Abishalomu, mwanaka!”