2 Samuele 17 - Mawu a Mulluku

Hushai anamuchimwiha Abishalomu

¹ Ahitofele aamulleella Abishalomu wi, “Mukaakhullelle wi kaatthoolle athu 12,000, kitimullena wi kimuthamakelle Davide mahiiyu vaava.

² Vano kineerooya kawanena atopille nave atathillalle murima. Nave kineeromoopopiha. Athu attheene ayo ariiyena eneerothawa. Miyaano kineeromwiipha mweneve yooyo.

³ Vano athu attheene eneerohokollweella wa nyuwaano wonanko mutthiyana anahokollweella wa mamune. Okhwa wa muthu mmodda Davide oneeroweeriha athu wi ekhalle vamurendelleni.”

⁴ Malangizwaayo yaamuddivella Abishalomu ni attekweene attheene a Aisraele.

⁵ Abishalomu aallota wi, “Omwiithane Hushai, Mwaariki wi niiwettho nnddo anaalloteeye.”

⁶ Hushai awiille wa Abishalomu, Abishalomooyo aamulleella wi, “Allotille Ahitofele tti nndda, ethiyo neere moollikana ni mmo anilangizelleeye? Ddaahikhalla ddiiddo, weyaano onilleelle yaweera.”

⁷ Hushai aamulleella Abishalomu wi, “Ollellova malangizo evelleelliwe ni Ahitofele khe aphaama.”

⁸ Hushai aallotattho wi, “Munnadduwella wi attiitthaanyu tti amasiva, athwiiwattho tti amasiva nave wi attheene murimiiwa onavoreya wonanko ezimbalangondo ddaakhiwe asaaniiwa muchipululuni. Woonjerera vaavo attiitthaanyu tti akhoto. Kheni ekhalle ni akhotwiiwa mahiiyu mattheene.

⁹ Ngoonani, vano eniipittha munllitini nimodda apaalle nipuro nimodda. Sika akhotwaanyu amodda yiiphiwe vawaamba vene, arive muthu anaawiiwe aneerollota wi, ‘Athu attheene ayo yaari otulli wa Abishalomu ahiiphiwa.’

¹⁰ Vano naari muthu oollipa murima wonanko mukango, enama yoohoova, aneerewoova. Vallethi Aisraele attheene ennadduwella wi attiitthaanyu tti muthu amasiva nave wi athu ariiyenaayo tti oollipa murima.”

¹¹ “Mi malangizo kiriimina tti awi, Aisraele attheene etthukumane wa nyuwaano wuno, waambeella o Dani ophiya o Beeresheba, ekhalle awaata wonanko mihava dda mu enyanja. Nave nyuwaano nyookhaanyu mwaakuse muyeena okhotoni.

¹² Vano hiyaano nineeromuphwanya Davide orive weko nko anaakhalleeyewo nave nineerowanana ekhoto wonanko mmo nikame ninimmelliiwa virive veko. Khaavo naari mmodda anaavulluwe.

¹³ Yavollowa mu muzinda, mmodda a Aisraele attheene eneerowaana mikwe omuzindaninko. Nave nineerowuukokella muzindooyo mutapo nave khaviwa vihalla naari mwananlluku.”

¹⁴ Yiiwalliiwa ddenndda Abishalomu ni Aisraele attheene yaallota wi, “Malangizo aphaama tti alla a Hushai Mwarikoolla woohikhalla a Ahitofelaalle.” Ddaari ddiiddo kaambiiwa Apwiya sika yeerihalle wi malangizo aphaama a Ahitofele ekukureye, ddeko ddihimweetelle phaama Abishalomu.

Hushai anamuchenjeza Davide

¹⁵ Hushai ahaalleella Zadoki ni Abiyatara, allupa mukuthwaalle wi, “Nnddo Ahitofele aalangizalleeye Abishalomu ni attekweene a Aisraele tti nndda.

¹⁶ Sika nyuwaano murumihe mawu wa Davide mwawaakuva oomulleella wi ahikone o madoko a muhinje wa Yordani ochipululuni. Koma allapuwe wi olliye ni athu ayo ariiyena ehiphariwe ni wiiphiwa.”

¹⁷ Vano Yonatani ni Ahimaazi yaanatiyera va muhinje wa Enirogele vakhuviru ni Yerusalemu. Mullupa mutteko aamutthiyana sika aalleella ddeko nave alliwaayo enaya yamulleellaka Davide vawi kheyaapaalla wooniwa evollowaka mu muzinda wa Yerusalemu.

¹⁸ Koma nllapo nimodda musombwe mmodda aawoona nave aamulleella Abishalomu. Sika Yonatani ni Ahimaazi yaathawa mwawaakuva yaphiya o Bahurimu o enyumba ya muthu mmodda oyo aari ni ehime vaatte vaye. Eellaayo yaakitthella mwiihimenimmo.

¹⁹ Vano mwaara a muthoolle aakusa yookhuneella ayikhuneellana ehimeeyo, amwaaneyavo tirigu sika ehimeeyo kheyaadduwanyeya

²⁰ Akhoto a Abishalomu ephiyalle o enyumba wulle yaamukoha mutthiyanoolle wi, “Ethiyo moomoona Ahimaazi ni Yonatani?” Mutthiyanoolle ahaakhulla wi, “Yaayo aallapuwa muhinjoolla.” Nave yaawaashaasha koma kheyaawaphwanyille sika akhotwaayo yaahokollweella o Yerusalemu.

²¹ Akhotwaalle erowille Ahimaazi ni Yonatani yaakhumamo mwiihimeni mmo. Nave yaamulleella Davide wi, “Timullani mullapuwe muhinje mwawaakuva vawi Ahitofele ohaalangiza athu wi ewane ekhoto ni nyuwaano.”

²² Davide aatimulla ni athu attheene ayo aariiyena, ellapuwa muhinje wa Yordani. Wasiiwa, athu attheene yaari ellapuwalle muhinje wa Yordani.

²³ Ahitofele oonille wi athu khethwarihalle malonjezwaayaalle, aamuwella bulwaaye, aya omuzindanaaye. Vano aakhoza ddittheddene dda mpa mwaye, iimakellella, aakhwa nave aavitthiwa mu mahame a attiitthinnya.

²⁴ Davide aphiyaaye o etawoni ya Mahanaimu, Abishalomu aallapuwa muhinje wa Yordani ni Aisraele attheenaalle.

²⁵ Abishalomu aamweeriha Amasa wi akhalle oohoollella ekhoto munipuroni na Yowabu. Amasa aari mwaana a muthu mmodda nnddina naye Yetere Muishmaele oyo amutthenlle Abigaile, mwaana a Nahashi, murokora a Zeruya, amennya a Yowabu.

²⁶ Vano Aisraele ni Abishalomu yaatthipella misasa dda akhoto mu echigawo ya Giliyadi.

²⁷ Davide aphiyalle o Mahanaimu, Shobi mwaana a Nahashi Mwaamoni oovenyera o Raba ni Makiri mwaana a Amiyele a o Lodebara navettho Barizilai a o etawoni ya Rogelimu a o echigawo ya Giliyadi,

²⁸ Yaawa ni mabedi, mabeseni manchichi, ddeko ddawoopiwa ni olloko, tirigu, othu, tirigu awaarika, mbwanda ni namurovo.

²⁹ Yaawattho ni enwi, mukaka woonyuunya, enkhosa ni makhura oollipa a mukaka wa eng'ombe. Ddittheddenenndda yawiillena wi Davide ni athu aariiyena eche. Alliwaalla yaadduwella wi athu attheenaalla yaavolliwa ettalla, yaatopa nave yaavolliwa nthona ochipululuninko.