2 Samuele 15 - Mawu a Mulluku

Abishalomu anakhozekella ddoowukila

¹ Ddiviralle ddenndda, Abishalomu ahaambeella weeta vamagaretani ookokiwa ni akavalo nave aakhalla ni athu 50 oomuvelleella

² Abishalomu aanavenya ohinase, va ettilla yooya vamullakoni va muzinda. Arive muthu akhalla ni mullatu anaya wa mwene wi eeruziwe, Abishalomu aanamwiithana, anamukoha wi, “Onavenyera muzinda oovi?” Aakhulla wi, “Mi oorumeyellaanyu kinavenyera nlloko nawi yooriyoori, mu ellapo ya Israele,”

³ Abishalomu aanamulleella wi, “Ngoona, nnddo onalloteewe tti ddaphaama ni ddoolungama koma mwene khamutthoollille muthu wi iiweke ddookhupanya ddanyu.”

⁴ Nave aanavirellella ollota wi, “Yakitthoollilleke miyaano wi kikhalle oweeruza mu ellapweella, arive muthu oyo ari ni mullatwaaye apaalle erive yookatamiha, eerekowaana wa miyaano nave keerekomweeruza mwa echilungamo muthooyo.”

⁵ Sika muthooyo aapaallaka omwaatamella wi amullapelle Abishalomooyo, Olliyooyo aanattaphurusa miwono ddaye nave aanamuphara anamukhupaarella.

⁶ Mmo sika Abishalomu eerelleeye ni Aisraele attheene ayo yaawa wa mwene wi yeeruziwe. Vano Aisraele anchichi yaanamukonda wunchichi Abishalomu.

⁷ Viviralle miyakha misese, Abishalomu ahaaveka a mwenaalle wi, “Pepaani mukaakhullelle wi kiye o Hebroni, keere nnddo kallupenlleemi wa Apwiya.

⁸ Enthawi elle kakhalleemi o Geshuri o Siriya kaallupella wi Apwiya yakihokollosella o Yerusalemu, kineerewaallapella o Hebroni.”

⁹ Vano mwenooyo aamulleella wi, “Khawe weete phaama.” Sika Abishalomu aatimulla aya o Hebroni.

¹⁰ Koma Abishalomu ahaarumiha amithenga mwawiipittheya o malloko mattheene a Aisraele yallotaka wi, “Mwiiwa winlla wa nipallapata, mukhuwe wi, ‘Abishalomu sika ari mwene a o Hebroni’ ”

¹¹ Abishalomu aathaanana ni athu 200 a o Yerusalemu. Alliwa monga alleto awiithaniwa yathananana ehidduwellaka ello.

¹² Abishalomu avelleelleeye mukutho o Hebroni, aarumiha mawu wa Ahitofele mulangizi a Davide o muzinda wa Gilo. Owukilanko wahunnuwa wunchichi. Nave athu ayo yaari vatulli va Abishalomu yaanaanjerereyanjerereya.

Davide anamuthawa Abishalomu

¹³ Nllapo nimodda amithenga aaphiya wa Davide aamulleella wi, “Murima wa Aisraele attheene ori va Abishalomu.”

¹⁴ Vano Davide ahaalleella akhoto ayo aariiyena o Yerusalemunko wi, “Timullani, hankoni nithawe wi ninaawe nirame mpata woomuthawella Abishalomu. Akuvani, woova wi aniphwanya mwawaakuva nave aneeroniipha attheene m'muzindanimmu.”

¹⁵ Enduna dda mwenenndde ddaamulleella mwenooyo wi, “Amwene, hiyaano akhotwaanyu niri ookhozeka weera erive ello eyo munaganizeenyu.”

¹⁶ Sika mwenoolle aatimulla ni athu attheene a vanibanjani vaye. Koma mwenooyo ahaahiya awariye ang'onong'ono khumi wi ewehereke enyumbeeyo.

¹⁷ Mwenooyo atimulleeye athu attheene yaamuthwara. Attheenaayo yakelle yiimella va enyumba yookomihera omalireni wa muzindooyo.

¹⁸ Davide ahiimella anawoona athu akhoto ayo aariiyena eviraka vamiitthoni vaye nave oomuweheraaye, Akereti ni Apeleti, owaakattho Agiti 600 ayo yamuthwanre ovenyera o Gati, yaanavira vamiitthoni vaye.

¹⁹ Nave mwenooyo aamukoha Itai Mugiti wi, “Kaambiiwa tini onanithwareewe? Hokollowa wakhalle ni mwene anaanweenooyo. Vallethi weyaano tti mulleto nave weyaano tti muthu oothawa owaniwa, vano hokollowa.

²⁰ Weyaano owiille oddilloddillova. Ollello kuukuse weeteeteke ni miyaano? Nko miyaano mwaneenaka kinayeemiwo nginadduwellawo. Hokollowa ni athwaawo nave Apwiya yuukonde nave eweerelle ddaphaama moollikana ni ororomelleya wiwa.”

²¹ Koma Itai ahaakhulla wi, “Kinimallupella vamiitthoni va Apwiya ni vamiitthoni vanyu, apwiyaaka amwene, orive weko nko nyuwaano apwiyaaka munaakhalleenyuwo, khaya va makhwello apaalle vookumini, mi oorumeyellaanyu kinaakhalle wenko.”

²² Sika Davide aamulleella Itai wi, “Vano hanko.” Vano Itai Mugitoolle aallapuwa muhinje wa Kidroni ni athwaaye, uullupalli ni ang'onong'ono ayo aariiyena.

²³ Vano athu attheene yahaamba winlla mookhuwa mwenoolle ni athu oomuthwara yaviriiwa. Sika mwenooyo aallapuwa muhinje wa Kidroni nave athu attheene yaamuthwara eya ochipululu.

²⁴ Allupa mukutho, Abiyatara ni Zadoki yaathananana ni Alevi attheene, etukhullalle nibokosi na echipangano na Apwiya. Yaarulla vatthi nibokosinno, ophiyera athu attheene ekhumalle mu muzindammo.

²⁵ Vano mwenoolle amulleella Zadoki wi, “Tukhullani nibokosi na echipangano na Apwiyanna muhokollweellena m'muzindani. Apwiya yakeerella echifundo eneerokihokollosa wi kinoonettho nibokosi na echipangano ni nipuro niwa nene.

²⁶ Koma yaahihakallallana miyaano, yeere eyo enaaddivelle.”

²⁷ Vano mwenooyo aamulleella Zadoki, mullupa mukuthoolle wi, “Hokollweella omuzindani mwamurendelle, weyaano ni Abiyatara ni aniinyu eelli, mwanawo Ahimaazi ni Yonatani mwaana a Abiyatara.

²⁸ Vano miyaano kinaaye kakhalle o madoko a muhinje wa Yordani ochipululuni ophiyera kiiwalle mawu oovenyera wa nyuwaano ookilleella mmo ddeko ddikhallelliiwa.”

²⁹ Sika Zadoki ni Abiyatara yaatukhulla nibokosinne eneerohokollweellana o Yerusalemu nave yakhalla wenko.

³⁰ Davide aawella mwaango wa olivi, inllaka, ahiwanre esapato koma iikhunenlle omuruni. Athu attheene aariiyena yahiikhuneellattho omuruni enawella mwaango, yinllaka.

³¹ Davide ahiiwa wi Ahitofele tti mmodda mwa athu oowukila ni Abishalomu. Vano Davide ahaamba ovekella, allotaka wi, “Mi kinimuuvekani Apwiya wi mutthattuse malangizo a Ahitofele wi ekhalle ookarangeya.”

³² Davide aphiyalle vaddullu va mwaango mvo amullapelleeyevo Mulluku, aakumana ni Hushai Mwariki aahullalle mukanjwaaye nave iihenlle ethaya omuruni.

³³ Davide aamulleella wi, “Wathaanana ni miyaano khaddikhalla phaama.

³⁴ Koma weyaano ohokollweelle omuzindani wamulleelle Abishalomu wi, ‘Nyu mwene, mi kinaakhalle oorumeyellaanyu. Valle khalle kaari oowaarumeyella aattiitthaanyu, emoddamoddave yeeyo vano kinaakhalle oorumeyellaanyu.’ Koma wavaanyiheke erive malangizo ayo Ahitofele anaavelleellekeeye.

³⁵ Ethiyo Zadoki ni Abiyatara, khehiyo allupa mukutho oriiwena wenko? Nave oweella mwa yaayo oneerokilleella ddittheddene onaawiwekeewe.

³⁶ Ahimaazi mwaana a Zadoki navettho Yonatani mwaana a Abiyatara, naalliwanittho eri wenko. Nave oweella mwa alliwaayo oneerokilleella nnddo onaawiweewe.”

³⁷ Sika Hushai, mukhwaaye a Davidoolle, aahokollweella m'muzindani mulle, enthawi eyo Abishalomu avolloweeye mu Yerusalemu.